Luka 5 - MUKANDA USANDU WA ZAMBI 1975

¹ Shimbu mbunga amushinjikile mukwivwa liji lia Zambi, wamanyine ku sesa lia Chitende cha Ngenezare;

² wamwene maulungu aali ku sesa lia Chitende; alioze akwa kutela yishi hatuhukamo kulu, te kanakoso manda jo.

³ Wanjilile mu ulungu umwe uze wapwile wa Semone, wamwichile asosoloke hakepe ku ngenge; iye watwamine nikulongesa mbunga ku ulungu.

⁴ Muze alitwaminyine kuhanjika wambile kuli Semone ngwenyi, Shinjika haze hasuku, nusunwise manda jenu nukoze.

⁵ Semone wakumbulwile ngwenyi, Mwata, twakilikitanga ufuku weswe, kutwakwachile niumwe; alioze ha liji lie mungusunwisa wanda.

⁶ Muze te halinga chino, ajingilikile chizavu chinene cha yishi, ni wanda wo watanukine.

⁷ O alahwile kuli masepa jo waze apwile mu ulungu ukwo, eze aakwase; o yeza, yazalisa maulungu eswe aali, chocho aputukile kushimbama.

⁸ Alioze Semone Petulu muze achimwene, wafulamanyine ku makungunwa ja Yesu, ngwenyi, Mwene, katukenu kuli yami, mumu nguli chivulumunyi.

⁹ Mumu wakomokene ni waze eswe apwile hamwe nenyi, ha yishi waze ozele;

¹⁰ chizechene nawa Tiangu ni Yoano, ana ja Zembendeu, eno apwile masepa ja Semone. Yesu wambile kuli Semone ngwenyi, Kanda wivwa woma; chize ku haliapwila ndo ku miaka kumukatela atu.

¹¹ Mba muze te haneha maulungu jo hashi, yehuka yeswe, yamukaula.

¹² Muze apwile mu limbo limwe, kumanyi, mwapwile lunga wa tò ni mbumba, muze amwene Yesu, wafulamanyine, waliumbile kuli iye, ngwenyi, Mwene, nyi unapale, muhasa kungupemesa.

¹³ Iye wolwele kwoko lienyi, wamusele minwe, ngwenyi, Ngunapale; pwako mungunu; haze hene mbumba yenyi yamukatukile.

¹⁴ Iye wamuhele koki kanda akaambulwila niumwe: alioze ngwenyi, Yako kwe, ukalilweze kuli sasendote, ukalambule ha kupemesa che, ngwe ambile Mose, chikapwe Shindakenyo kuli ayo.

¹⁵ Alioze lufuma wenyi wamwanganyine mwamwa kuhiana nawa, ni mbunga yinene akungamine mukwivwa, hanga akaawuke ku kukokoloka cho.

¹⁶ Alioze wapwile nikuyaya ku puya, nikulembako.

¹⁷ Mba ha tangwa limwe shimbu machilongesa, A-Fwariseu ni akwa shimbi atwamineko, waze te hakatuka ku yihunda yeswe ya mu Ngalileya ni ya mu Yundeya ni a ku Yerusaleme, ni tachi ja Mwene japwileko kwahindwisa.

¹⁸ Kumanyi, malunga anehene ha muhela mutu umwe wapwile mukwa kalepa; o afupile kumunjisa, akamutumbike kumeso jenyi.

¹⁹ Muze kawanyine haze mamunjishila, mumu ha mbunga, anyinyine ha fulumba ya zuwo, amusunwishine ndusu mu telya hamwe ni chalo chenyi mukachi, kumeso jenyi.

²⁰ Iye, ha kumona Ufulielo wo, ngwenyi, Yena lunga, ngunakukonekena milonga ye.

²¹ Akwa kusonyeka ni A-Fwariseu aputukile kunyonga ngwo, Iya yono unahanjika kushililika Zambi? Iya mahasa kukonekena milonga shina Zambi wika?

²² Alioze Yesu, nikunyingika manyonga jo, wakumbulwile ngwenyi, Kuchi te nunanyongo mu mbunge jenu?

²³ Chashi chika shina kwamba ngwami, Ngunakukonekena milonga ye, nyi? Shina kwamba ngwami, Katuka, wende?

²⁴ Alioze hanga nunyingike mwe Mwana Mutu chiyulo akwete hano hashi cha kukonekena milonga, (wambile kuli mukwa kalepa) ngwenyi, Ngunambe kuli yena ngwami, Katuka, anda chalo che, uye ku zuwo lie.

²⁵ Haze hene wakatukile kumeso jo, wanjile chalo haze wapombele, iye wakatukile nikuya ku zuwo lienyi nikuchichimieka Zambi.

²⁶ Eswe alishikishilile, o achichimiekene Zambi; nikuzala tò ni woma, ngwo, Hitunamono yuma ya yipupu musono uno.

²⁷ Kulutwe lia yino yuma, watuhukile, wamwene mukwa kufwetesa lijimu, jina lienyi Levi, kanatwama mu zuwo lia lijimu, wambile kuli iye ngwenyi, Ngukaule.

²⁸ Iye Wehukile yeswe, wakatukile, wamukawile.

²⁹ Mba Levi wamulingilile chiteleka chinene mu zuwo lienyi; kwapwile mbunga yinene ya akwa kufwetesa lijimu ni akwo waze atwamine ku mesa hamwe no.

³⁰ A-Fwariseu ni akwa kusonyeka jo alinyenyetene hali tumbaji twenyi, nikwamba ngwo, Kuchi te nunali, nunanu hamwe ni akwa kufwetesa lijimu ni yivulumunyi?

³¹ Yesu waakumbulwile ngwenyi, Angunu keshi kufupa mbuki; alioze waze ayiza.

³² Chejile mukutambika akwa ululi alioze yivulumunyi alikonyeke.

³³ O ambile kuli iye ngwo, Kuchi te tumbaji twa Yoano akulitwamina kulia kanji, nikulemba; chizechene waze a kuli A-Fwariseu nawa, alioze nie kakulialia, kakunwanwa?

³⁴ Iye ngwenyi, Munuhasa kukanjisa akwa ulungi alitwamine kulia shimbu sandungi ali hamwe no, nyi?

³⁵ Alioze matangwa makeza muze makachiza sandungi kuli ayo, hohene makalitwamina kulia ha matangwa aze.

³⁶ Iye wahanjikile cheka nawa chishima kuli ayo ngwenyi, Niumwe mapula chando ku hina liaha akachise ha hina likulu, nyi chocho, mapula liaha, ni chando cha liaha kuchishi kulita ni likulu.

³⁷ Mutu niumwe malonga vinyu yaha mu tuku ja malambu akulu; kuchina vinyu yaha muyimengununa malambu, yene muyimwangana, ni malambu mafwa.

³⁸ Alioze vinyu yaha mayilonga mu tuku ja malambu aha, ni yeswe yiali muyiwaha.

³⁹ Mutu niumwe muze hanwa vinyu yikulu, mazanga yaha; mumu mamba ngwenyi, Yikulu Shinaho.