Luka 4 - MUKANDA USANDU WA ZAMBI 1975

¹ Yesu wa tò ni Spiritu Musandu, yakatuka ku Yordau yahiluka, yamutwala muli Spiritu ku puya;

² ha shimbu lia makumi awana a matangwa, kanamweseka kuli Ndiapu, kalile nichimwe ha matangwa aze: ni muze amanunukine wevwile zala.

³ Mba Ndiapu wambile kuli iye ngwenyi, Kachi yena uli mwe Mwana Zambi, amba liwe lino, lialumuke mbolo.

⁴ Yesu wamukumbulwile ngwenyi, Chinasonewa ngwo, Hi ku mbolo wika ko mutu matwama ni mwono, alioze ku maliji eswe a Zambi.

⁵ Ndiapu wamutwalile helu lia mulundu usuku, wamulwezele mawanangana eswe a yifuchi ya hashi ha kashimbu kakepekepe.

⁶ Ndiapu wambile kuli iye ngwenyi, Mungukwaha chiyulo chino cheswe ni uhenya wacho, mumu hanangukunjikawo; kuli mweswawo mungumupala, mungumwahawo.

⁷ Kashika kachi munguwayila, kachi weswe kumuukapwa niwe.

⁸ Yesu wamukumbulwile, ngwenyi, Sosoloka kunyima yami, Satana, mumu chinasonewa ngwo, Ukawayile Mwehe Zambi ye, Iye wika ukamulingile.

⁹ Iye wamutwalile ku Yerusaleme, wamusele ha kasonga ka tembele, ngwenyi, Kachi uli mwe Mwana Zambi, limbile hashi;

¹⁰ mumu chinasonewa ngwo, Kumakahana shimbi kuli angelo jenyi ha kutwala kuli yena kukufunga kawape:

¹¹ ha moko jo kumakakumbata, kuchina muhukana chiliato che ku liwe.

¹² Yesu wamukumbulwile, ngwenyi, Kanachambe ngwo, Kanda ukeseka Mwene Zambi ye.

¹³ Muze te Ndiapu hamanununa yeseko yeswe, wakatukile kuli iye ndo ku mwaka ukwo.

¹⁴ Yesu wahilukilile ni tachi ja Spiritu ku Ngalileya; ni lufuma wenyi wafumanyine ndusu mu chifuchi cheswe cha kujingilika.

¹⁵ Iye walongesele mu masunangonga jo, ni eswe amuchichimiekene.

¹⁶ Iye wejile ku Nazare, kuze amulelele, wanjilile nikulita ni ndako yenyi, mu sunangonga ha tangwa lia sambata, wakatukile mukutanga.

¹⁷ Mba amukunjikile mukanda wa profeta Izaia, iye wapakwile mukanda, wawanyine kuze asonekene ngwo,

¹⁸ Spiritu ya Mwene hwali hali yami, Mumu hananguwayisa ni maji kwambujola sango lipema kuli yiswale; Kuhindwisa waze akumakuka ku mbunge; Hanangutumu kwambujola utuswilo kuli funge, Kulawisa cha meso kuli tupuputa; Kutusula waze ali mu upinjilo.

¹⁹ Mukwambujola mwaka wa kupemena kuli Mwene.

²⁰ Iye wapakikile mukanda waukunjikile cheka nawa kuli kalala, Watwamine, ni meso ja eswe mu sunangonga ahulikilile kuli iye.

²¹ Iye waputukile kwamba kuli ayo ngwenyi, Musono uno chisoneko chino chinamanunuka mu matwi jenu.

²² Eswe amushindakenyene, nikukomoka ha maliji a vumbi aze atuhukile mu kanwa lienyi; no ambile ngwo, Yono hi mwana José ko, nyi?

²³ Iye wambile kuli ayo ngwenyi, Munwamba kuli yami chishima chino ngwo, Mbuki, liwuke yena mwene; chize cheswacho twevwile alingile ku Kafwanaume, linga kuno nawa mu chijima cha yena mwene.

²⁴ Iye ngwenyi, Pundu ngunambe kuli yenu ngwami, Profeta niumwe mapemena akwa chijima chenyi mwene.

²⁵ Alioze chamwenemwene ngwami, Mwapwile twamishi anji mu Izalele ha matangwa ja Eliya, muze ájilile lilu ha miaka yitatu ni tukweji asambano, chocho kapunga munene wejile mu chifuchi cheswe;

²⁶ alioze katumine Eliya kuli niumwe shina kuli Sarepeta, chihunda cha mu Sendone, kuli twamishi wa pwo.

²⁷ Mwapwile akwa mbumba anji mu Izalele ha matangwa ja Eliseu; alioze niumwe wa kuli ayo wapemene shina Naamane, Ka-Seria.

²⁸ Waze eswe mu sunangonga azalile tò ni ufwatulo ha kwivwa yino yuma;

²⁹ o akatukile, amumbilile haze lia limbo, amutwalile ku mungilingili wa mulundu haze hatungile limbo lio, hanga amunyasemo.

³⁰ Alioze iye, nikupalika ndusu mukachi ko, wayile kwenyi.

³¹ Iye wapalumukine ku Kafwanaume, limbo lia mu Ngalileya, waalongesele ha masambata.

³² O alishimwokene ha longeso lienyi; mumu liji lienyi liapwile ni chiyulo.

³³ Mba mu sunangonga mwapwile mutu ni Spiritu ya ndemoniu ya luchisa, iye wakololokele ni liji linene,

³⁴ ngwenyi, Kuchi yetu ni yena, Yesu, Ka-Nazare? Hiuneza mukutwonwona, nyi? Ngunakunyingika mwe Musandu wa Zambi.

³⁵ Yesu yamwambila ngwenyi, Hola, tuhuka muli iye, ni muze te ndemoniu hamulimbwila hashi mukachi ko, watuhukile muli iye, kamulemekene nichimwe.

³⁶ Mba eswe akomokene, o ahanjikile umwe kuli mukwo ngwo, Liji lino lika, mumu ni chiyulo ni tachi mamba maspiritu a luchisa, o matuhuka?

³⁷ Ndundumwino yino yayile kweswe ku chifuchi cha kujingilika.

³⁸ Iye wakatukile ku sunangonga, wanjilile mu zuwo lia Semone; alioze naye-weno ya Semone wayijile ni kachiki munji; o aliumbile kuli iye, amuhindwise.

³⁹ Iye wamuzulaminyine, wakanjishile kachiki, iye wamukatukile, ni haze hene wahindukile, waavumbikile.

⁴⁰ Muze tangwa mulichinjila, waze eswe apwile ni mieji a kuyiza ni misongo yeka ni yeka, aanehene kuli iye; neye wasayikile moko jenyi hali eswe, waawukile.

⁴¹ Ni andemoniu nawa atuhukile muli anji, nikukololoka, ngwo, mwe Kristu yena, mwe Mwana Zambi. Iye nikwakanjisa, kaatayijile kuhanjika, mumu anyingikine ngwo, Iye Kristu.

⁴² Muze hapwile mwalwa, wakatukile, wayile ku puya: ni mbunga amufupile, ejile kuli iye, afupile kumukwata, hanga kechi kakatuka kuli ayo.

⁴³ Alioze wambile kuli ayo ngwenyi, Changutamba kwambujola sango lipema lia wanangana wa Zambi ku membo akwo nawa: mumu ha chino angutumine.

⁴⁴ Iye wapwile nikwambujola mu masunangonga a mu Ngalileya.