Luka 3 - MUKANDA USANDU WA ZAMBI 1975

¹ Achi, ha mwaka kumi ni wamuchitano wa kuyula cha Tiperiu Sesare, Ponteu Pilatu te achili nguvulu munene ya Yundeya, ni Heronde nguvulu ya Ngalileya, ni mwanakwo Fwilipe nguvulu ya Itureya ni ya chifuchi cha Trakonite, ni Lisane nguvulu ya Apiliniya,

² ha usasendote wa lutwe wa Anase ni Kayafwa, liji lia Zambi liejile kuli Yoano, mwana Zakaria, mu puya.

³ Iye wejile mu chifuchi cheswe cha kujingilika Yordau, nikwambujola upapachiso wa kulikonyeka ha ukonekeno wa milonga;

⁴ ngwe chinasonewa mu mukanda wa maliji a profeta Izaia ngwo, Liji lia yoze unakololoka mu puya, Lulikenu jila ya Mwene, Lulamisenu yikoka yenyi.

⁵ Mbongo jeswe kumujikashikiwa, Milundu yeswe ni mindundena yeswe kumuyikashikumuka; Yize ya kuhenga kumuyikalulama; Majila a lamba kumakasalama;

⁶ Atu eswe kumakamona ulamwino wa Zambi.

⁷ Iye wambile kashika ku mbunga jize ayile kuze akaapapachise ngwenyi, Vungu lia yihili, iya hanutoweza kuchina utenu uze muwizaho?

⁸ Imenu kashika mihuko ya kutela kulikonyeka, kanda nuputuka kwamba mu mbunge jenu ngwenu, Apalahama tuli nenyi kulwetu; mumu ngunambe kuli yenu ngwami, Ku mawe ano Zambi kanahase kusangula ana kuli Apalahama.

⁹ Chipwe haliapwila hanase njimbu ku miji ya mitondo; kashika mitondo yize yeswe kuyishi kwima mihuko yipema, mayipakula, mayimbila mu kahia.

¹⁰ Ni mbunga amuhulile, ngwo, Kuchi kevwe chatutamba kulinga?

¹¹ Waakumbulwile ngwenyi, Yoze uli ni yikuto yiali akalianyine ni yoze keshi nacho; ni yoze uli ni kulia akalinge chizechene.

¹² Akwa kufwetesa lijimu nawa ejile akaapapachise, o ambile kuli iye ngwo, Longeshi, kuchi chatutamba kulinga?

¹³ Iye ngwenyi, Kanda nufwetesa kuhiana chize hananwambe.

¹⁴ Maswalale nawa amuhulile, ngwo, Ni yetu, kuchi chatutamba kulinga? Iye wambile kuli ayo ngwenyi, Kanda nukapinjisa niumwe, chipwe kanda nukasanyina; yukenu ni fweto yenu.

¹⁵ Shimbu atu machitalatala, ni eswe apwile nikunyonga mu mbunge jo ha kutwala kuli Yoano, shina iye mwe Kristu nyi, shina ka?

¹⁶ Yoano waakumbulwile eswe, ngwenyi, Yami chamwenemwene, nakunupapachisa mu meya; alioze kumeza yoze wakangana kuhiana yami, yoze lusapo wa ku haku jenyi chatelele kumujitula; iye kumakanupapachisa muli Spiritu Musandu ni mu kahia.

¹⁷ Chifujilo chenyi mu kwoko lienyi chili, kumakapemesa liakulu chizungwilo chenyi; iye kumakakungika tiliku mu chila yenyi; alioze yizungu kumakayocha ni kahia kaze kukeshi kuhasa kujima.

¹⁸ Iye wambujolele sango lipema kuli atu, ni kwashinjila yuma yinji yikwo nawa.

¹⁹ Alioze nguvulu Heronde, se hamukanjisa kuli Yoano, ha kutwala kuli Herondeya pwo lia mwanakwo Fwilipe, ha kutwala ku yuma ya ungulungulu yize yeswe Heronde walingile kulu,

²⁰ wawezele chino nawa ku yikwo yeswe, wájilile Yoano mu zuwo lia ususu.

²¹ Mba muze te hapapachisa atu eswe, hapapachisa Yesu nawa, iye nikulemba, lilu liazulukile.

²² Ni Spiritu Musandu wahulumukine hali iye nikusoloka ni mujimba, ngwe katele, ni liji liatuhukile mwilu, ngwo, Mwanami yena, ngunakuzange; muli yena ngunawahilila chikolo.

²³ Ni Yesu mwene, muze aputukile uvumbiko wenyi, wapwile ni ngwe makumi atatu a miaka, mwana (chocho anyongene) wa José, ni José mwana Heli,

²⁴ mwana Mata, mwana Levi, mwana Melichi, mwana Yanai, mwana José,

²⁵ mwana Matatia, mwana Amose, mwana Naume, mwana Eseli, mwana Nahai,

²⁶ mwana Maata, mwana Matatia, mwana Semine, mwana José, mwana Yunda,

²⁷ mwana Yoanane, mwana Resa, mwana Zorobabele, mwana Salatiele, mwana Neri,

²⁸ mwana Melechi, mwana Andi, mwana Kozau, mwana Elemotau, mwana Ere,

²⁹ mwana Yoshua, mwana Elieza, mwana Yorime, mwana Mata, mwana Levi,

³⁰ mwana Semone, mwana Yunda, mwana José, mwana Yonane, mwana Eliakimi,

³¹ mwana Melea, mwana Mainane, mwana Matata, mwana Natane, mwana David,

³² mwana Yese, mwana Opete, mwana Mboaze, mwana Salamone, mwana Nasone,

³³ mwana Aminandambe, mwana rame, mwana Hezerone, mwana Pereze, mwana Yunda,

³⁴ mwana Yakomba, mwana Izake, mwana Apalahama, mwana Tera, mwana Nehore,

³⁵ mwana Selugu, mwana Reu, mwana Pelege, mwana Epere, mwana Shela,

³⁶ mwana Kenane, mwana Apakasha, mwana Sheme, mwana Noe, mwana Lameke,

³⁷ mwana Metusela, mwana Enoke, mwana Yara, mwana Mahalale, mwana Kenane,

³⁸ mwana Enoshe, mwana Sete, mwana Alama, mwana Zambi.