Luka 24 - MUKANDA USANDU WA ZAMBI 1975

¹ Alioze ha tangwa litangu lia semana, chimenemene ayile ku fuka, nikutwala mbuto ya vumba lipema yize alulikile kulu.

² O awanyine liwe halilangumuna ku fuka.

³ O anjililemo alioze kawanyinemo mujimba wa Mwene Yesu.

⁴ Shimbu machikakashana ha chino, kumanyi, malunga aali amanyine hehi no ni mazalo a kuhenya.

⁵ Ni shimbu achili ni woma, nikuhetamina hashi, o ambile kuli ayo ngwo, Kuchi te nunafupu mukwa mwono hakachi ka afu?

⁶ Amuno keshimo, alioze hahinduka: Iwulukenu ngwe chize ahanjikile kuli yenu shimbu apwile mu Ngalileya.

⁷ Ngwenyi, Chatamba kukunjika mwe Mwana Mutu ku moko ja yivulumunyi, akamuhachile ha kulusu, ni ha tangwa liamuchitatu akahinduke.

⁸ O ewulukile maliji jenyi.

⁹ Yakatuka ku fuka, yahiluka, yambulula yino yuma yeswe kuli kumi ni kashi, ni kuli akwo eswe.

¹⁰ Achi, kwapwile Maria Ka-Mandala, ni Yoana, ni Maria naye ya Tiangu, ni mapwo akwo hamwe no ambulwile yino yuma kuli apostolo.

¹¹ Alioze maliji ano asotokele kuli ayo ngwe saki; o kaafulieleleko.

¹² Alioze Petulu wakatukile, wazombokele ku fuka; iye ha kuhetama, yamona mahina a linyu anapombo ukawo, iye wakatukile akaye ku mahienyi, nikukomoka ha chize chapwile.

¹³ Mba aali a kuli ayo, ayile ha tangwa lize liene ku chihunda, jina liacho Emeu, chenacho chapwile kumi lia kilometro ni kilometro jiali ku Yerusaleme.

¹⁴ O alishimwinyine umwe ni mukwo ha yuma yize yeswe yapwile.

¹⁵ Shimbu alishimwinyine nikulihula umwe kuli mukwo, Yesu mwene wakundamine mukuya hamwe no.

¹⁶ Alioze meso jo aajikile, hanga kechi kamunyingika.

¹⁷ Alioze wambile kuli ayo ngwenyi, Maliji aka wano nunalihanjieka umwe kuli mukwo shimbu nunende, nikuhombola ku meso?

¹⁸ Mba umwe wa kuli ayo, jina lienyi Keleofwa, wamukumbulwile ngwenyi, Uli ngeji mu Yerusaleme, kwanyingikine yuma yize yinakapwako ha matangwa ano, nyi?

¹⁹ Iye wambile ngwenyi, Yuma yika? O ambile kuli iye ngwo, Yuma yize ya kutwala kuli Yesu Ka-Nazare, mwenawo wapwile profeta mukwa tachi ni chitanga ni liji kumeso ja Zambi ni atu eswe.

²⁰ Ngwe asasendote akwa lutwe ni akwa kuyula jetu amukunjikile ku upatwilo wa kufwa, amuliachilile ha kulusu.

²¹ Alioze twapwile nikutalatala hanji iye yoze makula A-Izalele. Ewa, nikuweza ku yino yuma yeswe, musono lie tangwa liamuchitatu hanga yino yuma yinakapwa.

²² Chikwo nawa, amwe mapwo a ku mbunga yetu atukomwesanga, mumu kayanga ha chimenemene ku fuka;

²³ O muze kawanyineko mujimba wenyi, kezanga, nikwamba ngwo twamonanga nawa usolwelo wa angelo waze ambanga ngwo, Ni mwono ali.

²⁴ Mba amwe a kuli waze apwanga hamwe ni yetu kayanga ku fuka, kachiwananga chizechene ngwe mapwo ambanga; alioze iye kamumweneko.

²⁵ Iye wambile kuli ayo ngwenyi, Yenu yelo, ni akwa makoke ku mbunge kufuliela yuma yize yeswe aprofeta ahanjikile.

²⁶ Te kuchatambile Kristu kwivwa lamba lia yino yuma, nikunjila mu uhenya wenyi, nyi?

²⁷ Iye nikuputuka ku mikanda ya Mose ni ya aprofeta eswe, walumbunwine kuli ayo mu yisoneko yeswe yuma ya kutwala kuli iye mwene.

²⁸ Akundamine ku chihunda kuze ayile; iye walingile ngwe mahiana.

²⁹ O amukwikile ngwo, Twama hamwe ni yetu; mumu chinakundama ku chingoloshi, ni tangwa kuliendala chikolo. Iye wanjilile mukutwama no.

³⁰ Muze te hatwama ku mesa hamwe no, wanjile mbolo, wayiwahishile; iye nikuyipalula waaheleyo.

³¹ Ni meso jo alawile, o amunyingikine; iye watokele ha meso jo.

³² O aliambile umwe kuli mukwo ngwo, Mbunge jetu kujevwile chivukuminya muli yetu shimbu ahanjikanga kuli yetu mu jila, shimbu alumbununanga kuli yetu ye yisoneko, nyi?

³³ O akutukile ha ola yize yene, ahilukilile ku Yerusaleme, awanyine kumi ni kashi kanakungama, ni waze apwile hamwe no.

³⁴ Ngwo, Chamwenemwene Mwene hahinduka, hasoloka kuli Semone.

³⁵ O ambulwile yuma yize yaawananga mu jila, ni ngwe chize amunyingikine ha kupatula mbolo.

³⁶ Shimbu machihanjika yino yuma, Yesu Mwene wamanyine mukachi ko, yamba kuli ayo ngwenyi, Sambukila kuli yenu.

³⁷ O atungumukine nikuzala tò ni woma, o ashinginyekene ngwe anamono mujimu.

³⁸ Iye wambile kuli ayo ngwenyi, Kuchi te nunalipikala? Kuchi te manyonga ano aneza mu mbunge jenu?

³⁹ Talenu moko jami ni molu jami, yami mwene: nguvwavwate, talenu; mumu mujimu keshi musunya ni yifwaha ngwe nunangumono nayo.

⁴⁰ Muze te hamba chino waalwezele moko jenyi ni molu jenyi.

⁴¹ Shimbu kanda achifuliela ha uwahililo, machikomoka, wambile kuli ayo ngwenyi, Chuma chimwe cha kulia nuli nacho kuno, nyi?

⁴² O amuhele chihanda cha yishi wa kwocha, ni chishila cha wuchi.

⁴³ Iye wayitambwile, walile kumeso jo.

⁴⁴ Iye wambile kuli ayo ngwenyi, Wano e maliji aze nahanjikile kuli yenu shimbu napwile hamwe ni yenu, ngwami, Chatamba yuma yeswe kumanunuka yize yinasonewa mu shimbi ya Mose ni mu mikanda ya aprofeta ni ya masamu, ya kutwala kuli yami.

⁴⁵ Hohene walawishile kunyonga cho, hanga anyingike ye yisoneko;

⁴⁶ Iye wambile kuli ayo ngwenyi, Chocho chinasonewa, ni chocho chatamba Kristu kwivwa lamba ni kuhinduka hakachi ka afu ha tangwa liamuchitatu;

⁴⁷ akambujole mu jina lienyi kulikonyeka ni ukonekeno wa milonga ku mavungu eswe, nikuputuka ku Yerusaleme.

⁴⁸ Yenu nuli yela ja yino yuma.

⁴⁹ Nyingikenu, mungutuma chilakenyo cha Tata hali yenu: alioze twamenu mu limbo ndo manujika ni tachi ja mwilu.

⁵⁰ Iye Waatwalile haze ndo hatalanganyi ni Mbetaniya; iye wazundwile moko jenyi, waawahishile.

⁵¹ Shimbu machiawahisa, amuhandunwine kuli ayo, amumbachile mwilu.

⁵² O amuwayilile, ahilukile ku Yerusaleme ni uwahililo unene.

⁵³ O apwile matangwa eswe mu tembele nikuhalisa nikufumanyisa Zambi.