Luka 23 - MUKANDA USANDU WA ZAMBI 1975

¹ Mba chizavu cho cheswe akatukile, amutwalile kuli Pilatu.

² O aputukile kumusuma ngwo, Twawanyine yono mutu nikuhengesa vungu lietu, nikukanjisa kufweta lijimu kuli Sesare, chikwo ngwenyi, Kristu mwanangana yami mwene.

³ Pilatu wamuhulile ngwenyi, Mwanangana wa A-Yunda yena, nyi? Iye wakumbulwile ngwenyi, Yena unambe.

⁴ Pilatu wambile kuli asasendote akwa lutwe ni mbunga ngwenyi, Chawanyine chitela nichimwe muli yono mutu.

⁵ Alioze ashinjikile kuhiana chikolo, ngwo, Kakuvundula atu eswe, nikulongesa kweswe mu Yundeya, nikuputuka ku Ngalileya ndo ku kuno.

⁶ Alioze muze Pilatu evwile ngwo, Ngalileya, wahulile kachi mwe lunga, Ka-Ngalileya.

⁷ Muze asele chinyingi ngwe kanakatuka ku chifuchi cha Heronde, wamutumine kuli Heronde, se iye mwene wapwile ku Yerusaleme ha matangwa aze.

⁸ Achi, muze Heronde amwene Yesu, wawahililile chikolo; mumu ha shimbu linene wazangile kumumona, mumu wevwile kulu ha kutwala kuli iye; iye wataliletalile akamumone kulinga chilayi chimwe.

⁹ Iye wamuhulile ni maliji anji; alioze kakumbulwile nichimwe.

¹⁰ Asasendote akwa lutwe ni akwa kusonyeka amanyine nikumusuma chikolo.

¹¹ Heronde hamwe ni mbunga ya maswalale jenyi amulelesele, amulenyene, nikumujika hina lia mukambo lia uhenya, amuhilwishile nawa kuli Pilatu.

¹² Heronde ni Pilatu alikwachile usepa ha tangwa lize liene; mumu kunyima apwile ni kole hakachi ko.

¹³ Pilatu muze hakungulula asasendote akwa lutwe ni akwa kuyula ni atu,

¹⁴ wambile kuli ayo ngwenyi, Nwanehanga kuli yami yono mutu, ngwe umwe wakuhengesa atu; alioze yami, se namusopesanga kumeso jenu, chawanyine chitela nichimwe muli yono mutu, ha kutwala ku yize yuma nunamusumu nayo.

¹⁵ Chipwe Heronde nawa, ka: mumu namutumanga kuli iye; kumanyi, nichimwe chakutela kufwa kachilingile.

¹⁶ Kashika mungumulamba ni shikote, mungumutusula.

¹⁷ (Achi, chamutamba kutusula mutu umuwika kuli ayo ha chiwanyino.)

¹⁸ Alioze akololokele hamuwika ngwo, Chizenu yono, ututuswile Mbarapa.

¹⁹ Mwenawo ha vunda yimwe alingile mu limbo, ni ha ungalwe, amumbilile mu zuwo lia ususu.

²⁰ Pilatu wahanjikile kuli ayo cheka nawa, nikuzanga kutusula Yesu.

²¹ Alioze akalumiokene, ngwo, Muhachilenu ha kulusu, muhachilenu ha kulusu.

²² Iye wambile kuli ayo chisuho chamuchitatu ngwenyi, Kuchi te, chipi chika hanalingi? Chawanyine chitela cha kufwa muli iye, nichimwe; mungumulamba ni shikote, ngumutusule.

²³ Alioze ashinjikile ni kukololoka chinene, nikumwita akamuhachile ha kulusu. Ni maliji jo akumbile.

²⁴ Mba Pilatu Wapatwile chikapwe ngwe azangile.

²⁵ Iye watuswile yoze ha vunda ni ungalwe amumbilile mu zuwo lia ususu, yoze amwichile; alioze wakunjikile Yesu, ku upale wo.

²⁶ Shimbu machimutwala, akwachile umwe Semone, Ka-Serene, kanakatuka ku minda, o amutwikile kulusu, ayimbate kunyima lia Yesu.

²⁷ Chizavu chinene cha atu ni cha mapwo amukawile, eno te kanalili mbimbi, nikulinyenga hali iye.

²⁸ Alioze Yesu, nikutewulukila kuli ayo, wambile ngwenyi, Yenu mapwo ja Yerusaleme, kanda nungulilila yami, alioze lililenu yenwene ni ana jenu.

²⁹ Mumu matangwa meza kwiza muze makamba ngwo, Kawaha miumba, ni majimo aze kasemene nilimwe tangwa, ni mele aze kaamwishine nilimwe tangwa.

³⁰ Hohene makapuluka kwamba ku milundu ngwo, Holokelenu hali yetu; ni ku mindundena ngwo, Tufukenu.

³¹ Mumu kachi malinga yino yuma ha mutondo wa wisu, kuchi makalinga ha mutondo umu?

³² Kwapwile nawa aali akwo, yingulungulu, aatwalile hamwe nenyi akaashihe.

³³ Muze ejile kuma kuze anavulukako ngwo, Kavwale, kuze kwene amuliachilile ha kulusu, ni yingulungulu, umwe ku chindume, ni mukwo ku chimeso.

³⁴ Yesu wambile ngwenyi, Tata, uakonekene kama; mumu kanyingikine chize analingi. O, nikulianyina mazalo jenyi hakachi ko, atele chela.

³⁵ Atu amanyine nikutala. Akwa kuyula nawa amukekwine, ngwo, Walamwinyine akwo; alilamwine mwene kachi yono mwe Kristu ya Zambi, yoze hanamutongola.

³⁶ Maswalale nawa amulenyene, nikukundama kuli iye, nikumwaha vinagre.

³⁷ Ngwo, Kachi mwe Mwanangana wa A-Yunda yena, Ulamwine yena mwene.

³⁸ Kwapwile nawa chisoneko helu lienyi ngwo, Yono Mwe Mwanangana wa A-Yunda.

³⁹ Mba umwe wa kuli yingulungulu waze aasukikile, wamusawile ngwenyi, Kachi mwe Kristu yena, Ulamwine yena mwene ni yetu nawa.

⁴⁰ Alioze mukwo nikukumbulula wamukanjishile ngwenyi, Yena kushi woma chipwe wa Zambi, nyi? Se uli ni uhiso umuwika.

⁴¹ Yetu chamwenemwene chinatute; mumu tunatambula fweto ya kutela yitanga yetu; alioze yono kalingile nichimwe cha kupiasuka.

⁴² Iye wambile kuli Yesu ngwenyi, Mwene, ngwiwuluke kama muze muwiza mu wanangana we.

⁴³ Wambile kuli iye ngwenyi, Pundu, ngwami, Musono uno kumukapwa hamwe ni yami mu Paraisu.

⁴⁴ Hapwile ngwe ola yamuchisambano, ni milima yejile hashi heswe ndo ola yamuchilivwa.

⁴⁵ Tangwa lialayile, ni chikalakala cha hina cha tembele chapulikile mukachi.

⁴⁶ Yesu, nikutambika ni liji linene, wambile ngwenyi, Tata, mu moko je ngunakunjika Spiritu yami; muze te hamba chino, watulile mwono wenyi.

⁴⁷ Muze kapitau amwene chize alingile, wachichimiekene Zambi ngwenyi, Chamwenemwene yono mukwa ululi.

⁴⁸ Mbunga jize jeswe akungulukile ku chitala chino, muze amwene yuma yize alingile, ahilukile, nikulamba tulo jo nikupihilila.

⁴⁹ Ni waze eswe amunyingikine, ni mapwo waze amukawile ku Ngalileya, amanyine kusuku, nikumona yino yuma.

⁵⁰ Mba umwe lunga, jina lienyi José, mwenawo wapwile mukwa kuyula, iye lunga mupema, mukwa ululi.

⁵¹ (Yono katayijile ku upatwilo wo ni chitanga cho), wa ku Arimatea, limbo lia mu Yunda; mwenawo wapwile nikutatatata wanangana wa Zambi:

⁵² yono wayile kuli Pilatu mukwita mujimba wa Yesu.

⁵³ Iye wausunwishine, wauvungile mu hina lia linyu, wamusele mu fuka lia kutota mu liwe, muze kanda achipomba niumwe nilimwe tangwa.

⁵⁴ Lize liapwile tangwa lia kululika, ni tangwa lia Sambata liakundamine.

⁵⁵ Mapwo waze akatukile hamwe nenyi kulu ku Ngalileya, akawile kunyima, amwene fuka, ni ngwe chize asele mujimba wenyi.

⁵⁶ O ahilukile, alulikile mbuto ya vumba lipema ni yitumbo yipema ya kukwita. Ha tangwa lia Sambata anamine nikulita ni liji lia shimbi.