Luka 21 - MUKANDA USANDU WA ZAMBI 1975

¹ Iye wahetwile meso wamwene pichi waze anambila yawana yo mu milambu.

² Wamwene nawa umwe twamishi wa pwo chiswale kanambilamo tumbongo tukepe twaali.

³ Iye wambile ngwenyi, Chamwenemwene, ngunambe kuli yenu ngwami, Yono twamishi wa pwo chiswale kambilamo kuhiana eswe:

⁴ mumu wano eswe cha ku upite wo hahana ku milambu; alioze iye cha ku uswale wenyi hahana cheswe anakapwa nacho.

⁵ Shimbu amwe ahanjikile ha kutwala ku tembele, ngwe hayihenyamisa ni mawe apema ni milambu, wambile ngwenyi,

⁶ Ha kutwala ku yuma yino nunamono, matangwa kumakeza muze kechi kahichika kuno liwe nilimwe ha likwo, lize kechi kalipuzula.

⁷ O amuhulile, ngwo, Longeshi, mwiji muka kashika yino yuma muyikapwa? Chilayi cha kwiza cha yino yuma chika?

⁸ Iye wambile ngwenyi, Kanyamenu kanda akanupiangula, mumu anji kumakeza mu jina liami, ngwo, Yami Kristu, ni mwaka hiwakundama: kanda nwakaula.

⁹ Muze munwivwa ha jita ni yizungozungo, kanda nukasusumiana; mumu chatamba yino yuma kupwa hatangu; alioze songo kulichi kapwa kamunomuno.

¹⁰ Hohene wambile kuli ayo ngwenyi, Akwa vungu limwe kumakakatukila akwa vungu likwo, ni akwa wanangana umwe Kumakakatukila akwa wanangana ukwo.

¹¹ Kumukukapwa minyiko yinene kweka ni kweka, ni tupunga ni yilungo. Kumukukapwa yuma ya kuvwisa woma ni yilayi ya mwilu.

¹² Alioze shimbu yino yuma yeswe kanda yipwa, kumakanukwata, kumakanuhungumiona, kumakanukunjika ku masunangonga ni mazuwo ja ususu, nikununeha kumeso ja mianangana ni manguvulu mumu ha jina liami.

¹³ Alioze Kumuchikapwa kuli yenu mukuhana Shindakenyo,

¹⁴ chipatulenu kashika mu mbunge jenu kanda nukapukuna shimbu kanda chize manukumbulula.

¹⁵ Mumu kumungukanwaha kanwa ni mana, aze akwa kulimika ni yenu eswe kechi kahasa kuchinda chipwe kuhamika.

¹⁶ Alioze kumakanukunjika chipwe kuli yisemi, ni asongo-ni-atu, ni usoko, ni tusendo; o kumakashiha amwe a kuli yenu.

¹⁷ Kumakanuvwila kole kuli eswe mumu ha jina liami.

¹⁸ Lukambu niumwe wa mitwe yenu kechi katoka.

¹⁹ Mu uhumikizo wenu nukazuke mwono wenu.

²⁰ Alioze muze munumona Yerusaleme hayijingilika ni yilombo ya maswalale, hohene nukanyingike ngwenu, Kukuwa chayo hichakundama.

²¹ Hohene waze mapwa mu Yundeya akachinyine ku milundu, ni waze mapwa muchima liayo akatuhukemo; ni waze mapwa mu yambu kanda akanjilamo.

²² Mumu wano e matangwa a kukala milonga, hanga yuma yize yeswe yinasonewa yikamanunuke.

²³ Alioze lamba kuli waze mapwa ni ufumba ni kuli waze maamwisa ha matangwa aze! mumu kumukukapwa huli linene ha chifuchi ni utenu kuli atu ano.

²⁴ Kumakafwa ku lutwilo wa katana, kumakaatwala funge ku mavungu eswe; ni Yerusaleme kumakayiliata kuli akwa mavungu, ndo miaka ya akwa mavungu muyikamanunuka.

²⁵ Mba kumukukapwa yilayi mu tangwa ni kakweji ni matongonoshi; ni hashi kupinda cha mavungu ni kulifwita, ha lundunjila wa kalunga-lwiji, ni mikanya yenyi;

²⁶ atu nikulezumioka ha woma, ha kutalatala yuma yize muyiza ha yifuchi yeswe ya hashi, mumu tachi ja malilu kumujikanyika.

²⁷ Hohene kumakamona mwe Mwana Mutu kaneza mu lelwa ni tachi ni uhenya unene.

²⁸ Muze yino yuma muyiputuka kupwa, hetukenu, nutale kwilu; mumu ukule wenu unakundama.

²⁹ Iye wahanjikile chishima kuli ayo ngwenyi, Talenu mukuyu ni mitondo yeswe;

³⁰ muze muyisokoloka, munuchimona, mununyingika yenwene ngwenu, Lwiza hapwa hakamwihi.

³¹ Chizechene ni yenu nawa muze munumona yino yuma kumanunuka, nukanyingike ngwenu, Wanangana wa Zambi uli hakamwihi.

³² Pundu, ngunambe kuli yenu ngwami, Chisemuko chino kuchichi kahwa nichimwe ndo yuma yeswe muyiza kupwa.

³³ Lilu ni hashi kumuyikahwa, alioze maliji jami kechi kahwa nichimwe.

³⁴ Alioze keyelenu kuli yenwene kuchina hanji mbunge jenu mujilema ni upulutu, ni kuzengewa, ni yipikalo ya mwono uno, ni tangwa lize mulitulumuka hali yenu ngwe muheto susumuku hiliasoloka.

³⁵ Mumu chocho mulikeza hali waze eswe akutwama ha kuzazuluka cha hashi heswe.

³⁶ Alioze lenu ha shimbu lieswe, nikuliumba, hanga nukakumbe, nupuluke ku yino yuma yeswe kumuyikapwa, nukamane kumeso ja mwe Mwana Mutu.

³⁷ Ni tangwa ha tangwa, wapwile nikulongesa mu tembele; ni ufuku ha ufuku wapwile nikutuhwoka nikuuhwisa ha mulundu uze ngwo, Olevwe.

³⁸ Ni atu eswe alimenekene nikwiza kuli iye mu tembele mukumwivwa.