Luka 20 - MUKANDA USANDU WA ZAMBI 1975

¹ Ha tangwa limwe shimbu machilongesa atu mu tembele, nikwambujola sango lipema, asasendote akwa lutwe ni akwa kusonyeka hamwe ni makulwana ejile kuli iye.

² Ambile ngwo, Twambulwile; chiyulo chika wakulinga nacho yino yuma, hanji iya yoze wakuhele chiyulo chino?

³ Iye waakumbulwile ngwenyi, Ni yami nawa mungunuhula chuma, ngwambulwilenu:

⁴ upapachiso wa Yoano shina wakatukile mwilu, nyi? Shina kuli atu?

⁵ O anyongene hakachi ko ngwo, Kachi mutwamba ngwetu, Mwilu; iye mamba ngwenyi, Mba kuchi te kunwamufulielele?

⁶ Alioze kachi mutwamba ngwetu, Kuli atu; atu eswe kumatwasa mawe; mumu kanakunuka ngwo, Yoano iye profeta.

⁷ O akumbulwile ngwo, Kutwanyingikine kuze wakatukile.

⁸ Yesu wambile kuli ayo ngwenyi, Ni yami nawa, chishi kunwambulwila chiyulo chize nakulinga nacho yino yuma.

⁹ Iye waputukile kutela chishima chino kuli atu ngwenyi, Umwe mutu watumbile munda wa uva, waukunjikile kuli njimi, wakatukile akaye mu wenyi ku chifuchi chikwo, mukutwama shimbu linene.

¹⁰ Ni ha mwaka wa kuhela, watumine ndungo kuli njimi, akamwehe yimwe ya ku mihuko ya munda; alioze njimi amulambile, amukatwishile mokomoko.

¹¹ Cheka nawa watumine ndungo mukwo; iye nawa yamulamba, yamusaula, yamukatwisa mokomoko.

¹² Cheka nawa watumine wamuchitatu; neye nawa amulemekene, amumbilile haze.

¹³ Mwenya munda wambile ngwenyi, Kuchi mungulinga? Ngwami, Mungutuma mwanami, ngunamuzange chikolo; hanji makamulemesa.

¹⁴ Alioze muze njimi amumwene, anyongene hakachi ko, ngwo, Yono mwe swana, tumushihenu, hanga chihinga chikapwe nichetu.

¹⁵ O amumbilile haze lia munda, nikumushiha. Kuchi kashika mwenya munda makaalinga?

¹⁶ Kumakeza akonwone waze njimi, makahana munda kuli akwo. O muze achivwile ambile ngwo, Kanda chikapwa kama nilimwe tangwa.

¹⁷ Alioze watalile meso kuli ayo, ngwenyi, Chino chinasonewa chika? Ngwo, Liwe lize alitunyine tungi, lienalio kuliapwa liwe lia helu lia mbango.

¹⁸ Mweswawo malimbuka ha liwe lino, kumakamakuka; alioze hali mweswawo mulikaholokela, mulikamufwenya tuyifwenyufwenyu.

¹⁹ Asasendote akwa lutwe ni akwa kusonyeka afupile ha ola yize yene kumukwata; o evwile woma wa atu, mumu anyingikine ngwo, Watele chishima chino cha kutuhisa.

²⁰ O amulayilile, atumine ngendeshi, waze aliongele kupwa akwa ululi, hanga akamulimbe ni kuhanjika chenyi, hanga akahase kumukunjika ku chiyulo ni poko ya nguvulu.

²¹ O amuhulile, ngwo, Longeshi, tunanyingika yena wakwamba, wakulongesa ni ululi, kushi katonde kuli atu, alioze wakulongesa jila ya Zambi nikulita ni umwenemwene.

²² Ngwetu, Muchilita ni shimbi hali yetu shina kuhana lijimu kuli Sesare, nyi? Shina ka?

²³ Alioze wamwene kalimbalimba ko, wambile kuli ayo ngwenyi, Kuchi te nunangweseka?

²⁴ Ngulwezenu lumbongo. Chizulie ni chisoneko chaya chiliko? O ambile ngwo, Cha Sesare.

²⁵ Iye wambile kuli ayo ngwenyi, Mba hanenu kuli Sesare yuma ya Sesare, ni kuli Zambi yuma ya Zambi.

²⁶ O kahashile kumuhangulula ha liji kumeso ja atu; o akomokene ha kumbululo lienyi, aholele kulungunga kwo.

²⁷ Mba amwe a kuli A-Satuseu ejile kuli iye, waze akwamba ngwo, Uhindukilo wakuhi niumwe.

²⁸ O amuhulile ngwo, Longeshi, Mose wasonekene ngwenyi, Kachi yayo ya umwe mafwa, kali ni pwo, iye keshi mwana, mwanakwo akambate mwe pwo, akasangule ana kuli yayo.

²⁹ Kwapwile asongo-ni-atu shimbiali: ni mutangu wambachile pwo, wafwile keshi mwana;

³⁰ ni wamuchiali;

³¹ ni wamuchitatu wamumbachilile; chizechene e shimbiali nawa kahichikile ana, afwile.

³² Kulutwe lia chize pwo nawa wafwile.

³³ Ha uhindukilo pwo liaya makapwa? Mumu e shimbiali apwile nenyi ngwe mukwo-pwo.

³⁴ Yesu wambile kuli ayo ngwenyi, Akwa mwaka uno, kakumbata, kakuhangisa malo:

³⁵ alioze waze maamona kutela azuke chihanda ha mwaka uze muwizaho ni uhindukilo hakachi ka afu, chipwe keshi kumbata chipwe keshi kuhangisa malo:

³⁶ mumu chipwe kahashile kufwa nawa: mumu kanalite ni angelo; kanapu ana ja Zambi, se ana ja uhindukilo.

³⁷ Alioze se afu mahinduka, chipwe Mose wasolwele mu chihanda cha kutwala ku chiputa, muze kanavuluka Mwene ngwenyi, Zambi ya Apalahama, ni Zambi ya Izake, ni Zambi ya Yakomba.

³⁸ Achi, iye hi Zambi ya afu ko, alioze ya a mwono; mumu eswe katwama ni mwono kuli iye.

³⁹ Amwe a kuli akwa kusonyeka akumbulwile ngwo, Longeshi, hiwamba kanawa.

⁴⁰ O kahamukine nawa kumuhula nichimwe.

⁴¹ Iye wambile kuli ayo ngwenyi, Ngwe kuchi akwamba ngwo, Kristu iye mwana David?

⁴² Mumu David iye mwene kanambe mu mukanda wa Masamu ngwenyi, Mwene wambile kuli Mwene wami ngwenyi, Twama ku kwoko liami lia chindume,

⁴³ ndo mungusa akwa kole je chitwamo cha yiliato ye.

⁴⁴ David kashika kanamuvuluka ngwenyi, Mwene; ngwe kuchi mapwa mwanenyi?

⁴⁵ Shimbu atu eswe machipanjika, wambile kuli tumbaji twenyi ngwenyi,

⁴⁶ Keyelenu akwa kusonyeka, waze akufwila kwendangana ni mahina asuku a mukambo, akuzanga kwameneka mu yitanda, ni yitwamo ya kulutwe mu masunangonga, ni mihela ya kulutwe ku yiteleka;

⁴⁷ waze akuwumbula mazuwo ja twamishi ja mapwo, ni ha ulembekese kakulemba yipinji yisuku: wano kumakatambula uhiso wahiana.