Luka 2 - MUKANDA USANDU WA ZAMBI 1975

¹ Achi, ha matangwa aze, kwakatukile shimbi kuli Sesare Angusetu, akasoneke yifuchi yeswe ya hashi.

² (Mba asonekene kusoneka chino chitangu muze Kwirinu apwile nguvulu ya Seria).

³ Atu eswe ayile akaasoneke, mutu ni mutu ku limbo lienyi.

⁴ José nawa wakatukile ku Ngalileya, ku limbo lia Nazare, wakandukile ku Yundeya, ku limbo lia David, jina lialio, Mbeteleme, mumu iye mukwa zuwo ni mukwa jimo lia David:

⁵ hanga akamusoneke hamwe ni Maria, pwo lienyi, te kali ni ufumba.

⁶ Mba shimbu apwileko, matangwa a kusema chenyi amanunukine.

⁷ Iye wasemene mwanenyi wa lunga mutangu, wamuvungile mu mahina, wamupombesele mu chililo; mumu kumwapwile muhela hali ayo mu zuwo lia kuzeka ngeji.

⁸ Kwapwile tufunga mu chifuchi chize kanafungu mapanga jo haze ha ufuku.

⁹ Mba, mungelo wa Mwene wamanyine hehi no, ni uhenya wa Mwene watemukine ha kwajingilika; no evwile woma wunji.

¹⁰ Mungelo wambile kuli ayo ngwenyi, Kanda nwivwa woma; mumu ngunanwambulwila sango lipema lia uwahililo unene, lize kumulikapwa kuli atu eswe.

¹¹ Mumu musono, mu limbo lia David, Chilamwina kanasemuka kuli yenu, iye Kristu mwe Mwene.

¹² Chino che chilayi kuli yenu; kumunukawana mwe mwana-kemba wa kuvunga mu mahina, kanapombo mu chililo.

¹³ Mba susumuku kwapwile hamwe ni mungelo, yizavu ya tujita twa mwilu kanahalisa Zambi, ngwo,

¹⁴ Uhenya kuli Zambi mwilu mwahiana, Hano hashi sambukila hakachi ka atu akumuwahila.

¹⁵ Muze angelo akatukile kuli ayo, akaye mwilu, tufunga aliambile umwe kuli mukwo ngwo, Tuyenu haliapwila ndo ku Mbeteleme, tukatale chino chuma hichapwa, chenacho Mwene hatunyingikisa.

¹⁶ O ejile kapupushi, awanyine Maria ni José, ni mwe mwana-kemba kanapombo mu chililo.

¹⁷ Muze amumwene, alumbunwine liji lize evwile lia kutwala kuli yono mwana.

¹⁸ Ni waze eswe achivwile, akomokene ha yuma yize tufunga aambulwilile.

¹⁹ Alioze Maria wafungile maliji ano eswe nikwazewula mu mbunge yenyi.

²⁰ Mba tufunga ahilukile, nikuchichimieka nikuhalisa Zambi ha yuma yize yeswe hanevu, ni yize hanamono, chizechene ngwe chize achihanjikile kuli ayo.

²¹ Ku songo lia matangwa muze hamupwisa ngalami, amulukile jina ngwo, Yesu, lienalio amulukilelio kuli mungelo, muze te jimo kanda lichiseseka.

²² Muze matangwa a kupemesa cho nikulita ni shimbi ya Mose amanunukine amunehene ku Yerusaleme, mukumutumbikila kuli Mwene;

²³ (nikulita ngwe chinasonewa mu shimbi ya Mwene ngwo, Mwana mweswe wa lunga maliangila kusemuka, kumakamuvuluka ngwo, Musandu kuli Mwene);

²⁴ akahane chitapo nikulita ni chize anambe mu shimbi ya Mwene ngwo, Tutele aali, hanji ana aali a membe.

²⁵ Kumanyi, mwapwile umwe lunga mu Yerusaleme, jina lienyi Semone; yono lunga wapwile mukwa ululi, mukwa kuwayila Zambi, kanatatatata kulembejeka cha Izalele: ni Spiritu Musandu wapwile hali iye.

²⁶ Iye hamulwezacho kuli Spiritu Musandu ngwe kechi kufwa ndo mamona mwe Kristu wa Mwene.

²⁷ Iye ku tachi ja Spiritu wanjilile mu tembele: muze yisemi anehenemo mwe mwana-kemba Yesu, akamulingile nikulita ni ndako ya shimbi,

²⁸ hohene wamutambwile mu moko jenyi, wachichimiekene Zambi ngwenyi,

²⁹ Mwene, haliapwila ndungo ye akatuke kama ni sambukila, nikulita ni liji lie;

³⁰ mumu meso jami hamona ulamwino we.

³¹ Uze hiunalulika kumeso ja atu eswe;

³² pangu lia kutemwina akwa mavungu, ni uhenya wa atu je, A-Izalele.

³³ José ni naye akomokene ha yuma yize ahanjikile ha kutwala kuli iye.

³⁴ Semone waawahishile, wambile kuli naye Maria ngwenyi, Yono hanamusela ha kulimbuka ni ha kukatuka cha anji mu Izalele; akapwe chilayi chize anachihamikina.

³⁵ Ewa, ni katana kumakatuwa mu mbunge ya yena mwene; hanga akasolole manyonga a mbunge jinji.

³⁶ Kwapwile umwe, Ana, profeta wa pwo, mwana Fwanwele, wa ku vungu lia Ashe, (matangwa jenyi hoka, se watwamine hamwe ni mukwo-lunga miaka shimbiali chize ku umbachiso wenyi;

³⁷ iye wapwile twamishi ndo ku makumi nake a miaka ni miaka yiwana), kakatukile ku tembele, alioze wavumbikile Zambi, nikulitwamina kulia, nikuliumba ufuku ni mwalwa.

³⁸ Iye, nikukanduka ha ola yize yene, wasakwililile Zambi, wahanjikile ha kutwala kuli iye kuli waze eswe ataliletalile ukule wa Yerusaleme.

³⁹ Muze te hamanununa yuma yeswe nikulita ni shimbi ya Mwene, ahilukilile ku Ngalileya ku limbo lio ene, te ku Nazare.

⁴⁰ Mwe Mwana watatukile, watakamine mu Spiritu, wazalile tò ni mana: ni vumbi lia Zambi liapwile hali iye.

⁴¹ Yisemi jenyi apwile nikuyaya mwaka ha mwaka ku Yerusaleme ha chiwanyino cha Chizomboka.

⁴² Muze apwile ni kumi lia miaka ni miaka yiali, akandukile ku Yerusaleme nikulita ni ndako ya chiwanyino;

⁴³ muze te hamanununa matangwa, shimbu anahiluka, mwe mwana-lunga Yesu, wasalile kunyima mu Yerusaleme; ni yisemi jenyi kachinyingikine.

⁴⁴ Alioze, se anyongene ngwo, Mu chendo ali, ayile wenyi wa tangwa, mba amufupilefupile hakachi ka usoko wo ni akwo.

⁴⁵ Muze kamuwanyineko, ahilukilile ku Yerusaleme, nikumufupa.

⁴⁶ Kulutwe lia matangwa atatu, amuwanyine mu tembele, kanatwama mukachi ka alongeshi, kanaapanjika, kanaahula yihula.

⁴⁷ Ni waze eswe amuvwile, alishikishilile ha malinjekela jenyi ni makumbululo jenyi.

⁴⁸ Muze amumwene, alishimwokene; ni naye wambile kuli iye ngwenyi, Mwanami, kuchi te hiwalinga chize ni yetu? Tatenu ni yami hitunakufupu nikupinda.

⁴⁹ Iye wambile kuli ayo ngwenyi, Kuchi te nunakangufupa? Kunwanyingikine ngwe changutamba kulinga yuma ya Tata, nyi?

⁵⁰ Kuliaalumbunukine liji lize ahanjikile kuli ayo.

⁵¹ Iye wapalumukine hamwe no ku Nazare, wazeyele kuli ayo; ni naye wafungile maliji ano eswe mu mbunge yenyi.

⁵² Mba Yesu wasenyene kulutwe ni mana ni Chizundamo, nikuwana vumbi kumeso ja Zambi ni atu.