Luka 18 - MUKANDA USANDU WA ZAMBI 1975

¹ Iye wahanjikile nawa chishima kuli ayo, ngwe chaatamba kulemba matangwa eswe, kanda akalezumuka;

² ngwenyi, Kwapwile umwe sopi mu limwe limbo, yoze kevwile woma wa Zambi, kalemesene atu.

³ Kwapwile nawa twamishi wa pwo mu limbo lize; wejile kanji kuli iye, ngwenyi, Ngukale ha mukwa kole yami.

⁴ Alioze ha shimbu linene katayijileko; alioze kulutwe lia chize wambile mu mbunge yenyi ngwenyi, Chipwe chishi kwivwa woma wa Zambi, ni atu chishi kwalemesa;

⁵ hindu mumu yono twamishi kakunguketeka, mungumukala, kuchina makanguchikilika ni kwiza chenyi matangwa eswe.

⁶ Mwene wambile ngwenyi, Ivwenu chize anambe sopi wa uhenge.

⁷ Ni Zambi kechi kukala waze hanaatongola, waze akukololoka kuli iye mwalwa ni ufuku, chipwe kakupwa ni uhomboloji hali ayo shimbu linene, nyi?

⁸ Ngunambe kuli yenu ngwami, Kumakaakala nikawashi. Alioze muze mwe Mwana Mutu meza, makawana Ufulielo hano hashi, nyi?

⁹ Iye watele nawa chishima chino kuli amwe waze afulielele ayo ene ngwo, Tuli akwa ululi, apwishile amokomoko akwo eswe, ngwenyi,

¹⁰ Atu aali akandukile ku tembele mukulemba, umwe Ka-Fwariseu, ni mukwo mukwa kufwetesa lijimu.

¹¹ Ka-Fwariseu wamanyine nikulemba kuli iye mwene ngwenyi, Zambi, ngunakusakwila yami chapwile ngwe atu akwo, akwa mbenga, yihenge, yitanji, hanji chipwe ngwe yono mukwa kufwetesa lijimu.

¹² Nakulitwamina kulia kaali ha semana, nakuhana chihanda cha kumi cha yuma yeswe nguli nayo.

¹³ Alioze mukwa kufwetesa lijimu kanamana kusuku, katayile chipwe kuhetula meso jenyi kwilu, alioze walambile ha pambo lienyi, nikupihilila, ngwenyi, Zambi, nguvwile kama keke, yami mwe chivulumunyi.

¹⁴ Ngunambe kuli yenu ngwami, Yono wapalumukine ku zuwo lienyi mukwa kusamba, hi mukwo ko. Ni mweswe malinangamisa makanuhetesa; alioze yoze malilelesa kumakamunangamisa.

¹⁵ O anehene kuli iye nawa ana-akemba jo, hanga ase moko jenyi hali ayo; alioze muze tumbaji achimwene, aakanjishile.

¹⁶ Alioze Yesu waatambikile kuli iye, wambile ngwenyi, Tayizenu ana akepe eze kuli yami, kanda nwakanjisa: mumu wanangana wa Zambi wa wano ene.

¹⁷ Pundu ngunambe kuli yenu ngwami, Mweswawo kechi katambula wanangana wa Zambi ngwe mwana mukepe, kechi kanjilamo nichimwe.

¹⁸ Mba umwe mukwa kuyula wamuhulile ngwenyi, Longeshi mupema, kuchi mungulinga, hanga ngukahinge mwono wa mutolo?

¹⁹ Yesu wambile kuli iye ngwenyi, Kuchi te unanguvuluka ngwe, Mupema? Mupema wakuhi niumwe, shina umuwika iye Zambi.

²⁰ Unanyingika shimbi ngwo, Kanda ulinga utanji, kanda ushiha, kanda wiya, kanda ushindakenya mahuza, lemesa tatenu ni noko.

²¹ Iye ngwenyi, Yino yuma yeswe hingunayifungu chize ku wanuke wami.

²² Muze Yesu evwile chino, wambile kuli iye ngwenyi, Hindu chuma chimuwika unahono; lanjisa yize yeswe uli nayo, ukapangile kuli yiswale, ukapwe ni upite mwilu; wize, ungukaule.

²³ Alioze muze evwile yino yuma, wevwile chinyengo chinji; mumu wapwile pichi munene.

²⁴ Muze Yesu amwene ngwe wevwile chinyengo chinji, wambile ngwenyi, Chikalu chikolo hali waze akwete upite kunjila mu wanangana wa Zambi.

²⁵ Mumu chashi hali kamelu kunjila mu liso lia ndongo, chikalu hali pichi kunjila mu wanangana wa Zambi.

²⁶ Waze achivwile, ambile ngwo, Iya kevwe mahasa kulilamwina?

²⁷ Alioze iye ngwenyi, Yuma yize atu mayisa kenu Zambi mayihasa.

²⁸ Petulu wambile ngwenyi, Hitunahichika yeswe, hitunakukaula.

²⁹ Iye wambile kuli ayo ngwenyi, Pundu, ngunambe kuli yenu ngwami, Mutu wakuhi yoze hanahichika zuwo, hanji yisemi, hanji usoko, hanji mukwo-pwo, hanji ana, mumu ha wanangana wa Zambi,

³⁰ yoze kechi katambula yisuho yinji yikwo, ha mwaka uno, ni ha mwaka uze muwizaho, mwono wa mutolo, ngwami, Niumwe.

³¹ Iye watwalile kumi ni aali ku tenga kuli iye mwene; wambile kuli ayo ngwenyi, Talenu, mutukanduka ku Yerusaleme, ni yuma yize yeswe yinasonewa ku moko ja aprofeta kumuyikamanunuka kuli mwe Mwana Mutu.

³² Mumu kumakamukunjika kuli akwa mavungu, makamukekuna, makamulinga chipi, makamufwila mate;

³³ o makamulamba ni shikote, makamushiha; ni ha tangwa liamuchitatu kumakahinduka.

³⁴ Alioze maliji ano kaalumbunukine: ni liji lino liaswamine kuli ayo, kanyingikine chize ambile.

³⁵ Shimbu machikundama ku Yeriku, umwe kapuputa watwamine ku sesa lia jila nikuunjila:

³⁶ iye, nikwivwa mbunga anapalika, wahulile chize muchipwa.

³⁷ O amwambulwilile ngwo, Yesu Ka-Nazare kanapalika.

³⁸ Iye wakololokele ngwenyi, Yesu, yena mwana David, nguvwile kama keke.

³⁹ Waze atetekelele amukanjishile, hanga ahole kulungunga kwenyi; alioze watetele kuhiana chikolo ngwenyi, Mwana David, nguvwile kama keke.

⁴⁰ Yesu wamanyine, wambile amunehe kuli iye. Muze te hakundama, wamuhulile ngwenyi,

⁴¹ Kuchi unazange ngukulingile? Iye wambile ngwenyi, Mwene, ngulaule ku meso.

⁴² Yesu wambile kuli iye ngwenyi, Laula ku meso: Ufulielo we hiwakupwisa mungunu.

⁴³ Haze hene walawile ku meso, wamukawile, nikuchichimieka Zambi; ni atu eswe, muze achimwene, ahanyine uhaliso kuli Zambi.