Luka 16 - MUKANDA USANDU WA ZAMBI 1975

¹ Iye wambile nawa kuli tumbaji twenyi ngwenyi, Kwapwile umwe pichi, wapwile ni kaselo; iye amusumine ngwo, Kanamwange yikumba ye.

² Iye wamutambikile, wambile kuli iye ngwenyi, Acho, chika ngunevu hali yena? Lumbununa uselo we, mumu kushi kuhasa kupwa kaselo nawa.

³ Mba kaselo wambile mu mbunge yenyi ngwenyi, Kuchi mungulinga, mumu mwene wami kanachiza uselo kuli yami? Ngolo ja kulima chishi najo, ngunevu sonyi kuunjila.

⁴ Ngunanyingika chize mungulinga, hanga muze mangukatwisa ku uselo, akangulambule mu mazuwo jo.

⁵ Iye watambikile akwa mikuli ja mwene wenyi, wambile kuli mutangu ngwenyi, Kongo lika uli nalio kuli mwene wami?

⁶ Iye wambile ngwenyi, Kulakaji lia njongo ja maji. Wambile kuli iye ngwenyi, Anda mukanda we, Utwame nikawashi, Usoneke ngwe, Makumi atano.

⁷ Kulutwe wambile kuli mukwo ngwenyi, Ni yena, kongo lika uli nalio? Iye wambile ngwenyi, Kulakaji lia njongo ja tiliku. Yamba kuli iye ngwenyi, Anda mukanda we, Usoneke ngwe, Makumi nake.

⁸ Mwene wenyi wahalishile kaselo ka uhenge, mumu walingile ni ukanyame, mumu akwa mwaka uno ha chisemuko cho ene kanakanyama kuhiana akwa pangu.

⁹ Mba ngunambe kuli yenu ngwami, Litengelenu tusendo a ku upite wa uhenge, hanga muze januhwa, o akanutambule muma mwa kutwama mwa mutolo.

¹⁰ Yoze mapwa wamwenemwene ni chikepekepe, mapwa wamwenemwene nawa ni chinji: ni yoze mahengesa ni chikepekepe, mahengesa ni chinji.

¹¹ Kashika kachi kunwapwile amwenemwene ni upite wa uhenge, iya makunjika kuli yenu upite wamwenemwene?

¹² Nyi kachi kunwapwile amwenemwene ni yuma yize ya mbala, iya manwaha yize ya yenwene?

¹³ Ngamba niumwe mahasa kulingila miata aali, mumu chipwe mavwila kole umwe, akazange mukwo; hanji makakaminya kuli umwe, akalelese mukwo. Kunwahashile kulingila Zambi nikulingila upite nawa.

¹⁴ A-Fwariseu nawa, waze apwile akwa kufwila mbongo, evwile yino yuma yeswe; amukekwine.

¹⁵ Iye wambile kuli ayo ngwenyi, Yenu nuli waze akulisambisa kumeso ja atu; alioze Zambi kananyingika mbunge jenu; mumu chize machilemesa chikolo hakachi ka atu, chapwa chizelwokeso kumeso ja Zambi.

¹⁶ Shimbi ni aprofeta apwile ndo kuli Yoano; chize ku mwaka uze, kanambulula sango lipema lia wanangana wa Zambi, ni mweswe kananjilamo ni tachi.

¹⁷ Alioze kuhwa cha lilu ni hashi chashi, alioze kuhwa cha toshi limuwika lia shimbi, chikalu.

¹⁸ Mweswawo malakula mukwo-pwo, mambata weka, malinga utanji; ni mweswawo mambata yoze hanamulakula kuli mukwo-lunga, malinga utanji.

¹⁹ Achi, kwapwile umwe pichi, iye wazalile mahina ja ufungo ni linyu lipema, nikutwama ni usehejelo ni uhenya tangwa ha tangwa.

²⁰ Kwapwile nawa umwe chiswale, jina lienyi Lazaru, amutumbikile kushi lia senge lia ku chikolo chenyi wa tò ni yilonda.

²¹ Iye wevwile usona wa kulikuchisa ni yifwenyufwenyu yize yaholokele ku mesa ya pichi; chipwe tuwa ejile nikulesa yilonda yenyi.

²² Mba chiswale wafwile ni angelo amusele mu kondo ya Apalahama; ni pichi nawa yafwa, yamufunda.

²³ Iye mu Heteze yahetula meso jenyi mu upinjilo, yamona Apalahama kusuku ni Lazaru mu kondo yenyi.

²⁴ Iye watambikile ngwenyi, Kaka Apalahama, nguvwile kama keke, utume Lazaru, hanga achupike songo lia munwe wenyi mu meya, akekemese limi liami; mumu ngunapinji mu mulengi uno.

²⁵ Alioze Apalahama ngwenyi, Mwanami, iwuluka ngwe yena ha miaka ya mwono we, watambwile yuma ye yipema, chizechene Lazaru watambwile yuma yipi; haliapwila kanamulembejeka, ni yena uli mu upinjilo.

²⁶ Mba kuweza ku yino yuma yeswe, mukachi ka yetu ni yena mbongo yinene kuyakola; hanga waze mazanga kukatuka kuno akaye kuli yena kechi kuhasa, chipwe waze mazanga kukatuka koko akeze kuli yetu, kechi kuhasa.

²⁷ Iye wambile ngwenyi, Ngunakulembe, kaka, umutume kama ku zuwo lia tata.

²⁸ Mumu ana-akwetu atano nguli no; hanga akashindakenye chikolo kuli ayo, kuchina meza kuma kuno kwa kupinda.

²⁹ Alioze Apalahama yamba kuli iye ngwenyi, Mikanda ya Mose ni ya aprofeta kali nayo, akayivwe.

³⁰ Iye wambile ngwenyi, Ka, kaka Apalahama, alioze kachi umwe hakachi ka afu maya kuli ayo makalikonyeka.

³¹ Yamba kuli iye ngwenyi, Nyi keshi kwivwa Mose ni aprofeta, chipwe kechi kakunuka, kachi umwe mahinduka hakachi ka afu.