Luka 14 - MUKANDA USANDU WA ZAMBI 1975

¹ Shimbu machinjila mu zuwo lia umwe mukwa kuyula a kuli A-Fwariseu, ha tangwa lia Sambata hanga alie mbolo, o te kanamulayila.

² Kumanyi, kwapwile kumeso jenyi umwe mutu ni musongo wa ndondo.

³ Yesu wambile kuli akwa shimbi ni A-Fwariseu ngwenyi, Muchilita ni shimbi kuwuka ha tangwa lia Sambata, nyi?

⁴ Alioze aholele kulungunga kwo. Iye yamukwata, yamuhindwisa, yamwecha aye kwenyi.

⁵ Iye wambile kuli ayo ngwenyi, Iya hakachi kenu mapwa ni chimbulu hanji ngombe, yoze maholokela mu wina, keshi kumuchizamo haze hene ha tangwa lia Sambata?

⁶ O kahashile kumukumbulula nawa ha yino yuma.

⁷ Iye watele chishima kuli waze aalakenyene, muze amwene ngwe chize atongwele yitwamo ya kulutwe, ngwenyi,

⁸ Muze umwe makulakenya ku ulungi, kanda ukatwama ha chitwamo cha kulutwe; kuchina hanji umwe mulemu wahiana yena mamulakenya.

⁹ Mba yoze wanulakenyene eswe aali, meza kuli yena ngwenyi, Lisekule hali yono; hohene muputuka ni sonyi kutambula chitwamo cha kusula.

¹⁰ Alioze muze nikulakenya, yako, ukatwame mu chitwamo cha kusula, hanga muze yoze wakulakenyene meza, akambe kuli yena ngwenyi, Kasendo, senya kulutwe; hohene kumukapwa ni ulemu kumeso ja waze eswe anatwama ku mesa hamwe ni yena.

¹¹ Mumu mweswawo malinangamisa kumakamijlelesa; ni yoze malilelesa kumakamunangamisa.

¹² Iye wambile kuli yoze nawa wamulakenyene ngwenyi, Muze yena mulinga kulia, hanji chiteleka, kanda ukalakenya tusendo twe, chipwe ana-akwenu, chipwe ayayenu, chipwe usoko we, chipwe enyembo a pichi, kuchina hanji makulakenya tangwa likwo, akakukundululecho.

¹³ Alioze muze yena mulinga chiteleka, lakenya yiswale, ni yitonji, ni yilema, ni tupuputa:

¹⁴ mba kumukawaha, mumu o keshi nayo yize ya kukukundulula; mumu mukachitambula ha uhindukiol wa akwa ululi.

¹⁵ Mba umwe wa kuli waze atwamine ku mesa hamwe nenyi ha kwivwa yino yuma, wambile kuli iye ngwenyi, Kawaha yoze makalia mbolo mu wanangana wa Zambi.

¹⁶ Alioze wambile kuli iye ngwenyi, Umwe mutu walulikile chiteleka chinene, walakenyene anji;

¹⁷ iye watumine ndungo yenyi ha ola ya chiteleka, ngwenyi, Tweyenu, mumu yuma yeswe yinalulika.

¹⁸ O eswe aputukile kuhanjika tuliongelo. Mutangu wambile kuli iye ngwenyi, Hinalanda munda, changutamba kuya ngukautale; ngunakulembe mwane, ngutayize kama, yami chichi kwiza.

¹⁹ Mukwo wambile ngwenyi, Hinalanda makanga atano a ngombe, mba munguya, ngukaeseke; ngunakulembe mwane, ngutayize kama, yami chichi kwiza.

²⁰ Mukwo ngwenyi, Hinambata pwo, kashika Chahashile kwiza.

²¹ Yoze ndungo wayile akambulule yino yuma kuli mwene wenyi. Hohene mwenya zuwo nikutenuka chikolo wambile kuli ndungo yenyi ngwenyi, Tuhuka nikawashi, uye ku matapalo ni mikombwelo ya mu limbo, ukanehe muno yiswale, ni yitonji, ni yilema, ni tupuputa.

²² Mba ndungo wambile ngwenyi, Mwene, chize wambanga hachilinga, ni hindu mihela kuyili.

²³ Mwene wambile kuli ndungo ngwenyi, Tuhuka, uye ku majila ni ku yipanga, ukaashinjile kunjila, hanga zuwo liami Ukazale tò.

²⁴ Mumu ngunambe kuli yena ngwami, Niumwe wa kuli malunga waze aalakenyene kechi kalia chiteleka chami.

²⁵ Mbunga jinene ayile hamwe nenyi, iye watewulukile, wambile kuli ayo ngwenyi,

²⁶ Kachi mutu meza kuli yami, keshi kuvwila kole tato, ni naye, ni mukwo-pwo, ni anenyi, ni ayayo, ni ana-akwo, ni mandumbu jenyi, ewa, ni mwono wenyi mwene nawa, kahashile kupwa kambaji kami.

²⁷ Mweswawo keshi kumbata kulusu yenyi nikungukaula, kahashile kupwa kambaji kami.

²⁸ Mumu iya wa kuli yenu, nikuzanga kutunga kaposhi, keshi kutwama hatangu akalule ndando, kachi mapwa nayo yize ya kumumanununa?

²⁹ Kuchina hanji muze te hasa fundamentu, kahashile kumanununa, waze eswe mamutala maputuka kumukekuna,

³⁰ ngwo, Yono mutu waputukile kutunga alioze kahashile kumanununa.

³¹ Hanji mwanangana muka, shimbu maya mukwasa jita ni mwanangana mukwo, keshi kutwama punga hatangu shina mahasa ni kumi lia tununu kutakana ni yoze meza kulimika nenyi ni makumi aali a tununu?

³² Nyi ka, shimbu achili kusuku, matuma tunganda amulembele uwanyino.

³³ Chocho kevwe mweswawo wa kuli yenu keshi kwehuka yize yeswe ali nayo, kahashile kupwa kambaji kami.

³⁴ Mungwa kashika unawaha; alioze kachi mungwa unasamuka, neka mauyemesa?

³⁵ Kuwatelele chipwe hashi, chipwe pinga: maumbila haze. Yoze uli ni matwi a kwivwa, evwe.