Luka 13 - MUKANDA USANDU WA ZAMBI 1975

¹ Achi, kwapwileko amwe ha mwaka uze, waze amwambulwilile ha kutwala kuli A-Ngalileya, waze manyinga jo Pilatu wachingile ni yitapo yo.

² Yesu waakumbulwile ngwenyi, Nunashinginyeka ngwe wano A-Ngalileya apwile yivulumunyi ahiana A-Ngalileya eswe, mumu evwile lamba lino, nyi?

³ Ngwami, Ka, alioze yenu eswe kumunukatoka chizechene nyi kunwalikonyekene.

⁴ Hanji waze kumi ni nake, hali ayo kaposhi ka Selome wapuzukile nikwashiha, nunashinginyeka ngwe o apwile yitanguke ahiana atu eswe akutwama mu Yerusaleme, nyi?

⁵ Ngwami, Ka; alioze yenu eswe kumunukatoka chizechene nyi kunwalikonyekene.

⁶ Watele chishima chino ngwenyi, Umwe mutu wapwile ni mukuyu autumbile mu munda wenyi; wejile nikufupako mihuko, alioze kayiwanyine.

⁷ Iye wambile kuli njimi ngwenyi, Tala, miaka yitatu nguneza nikufupa mihuko ha mukuyu uno ni chishi kuyiwana niyimwe: upakule hashi, kuchi te unasekesa mavu?

⁸ Iye wamukumbulwile ngwenyi, Mwene, weche kama mwakono nawa ndo mungukauchipula, ngukase pinga:

⁹ nyi kachi muukema mihuko, chipema; nyi kachi ka, kulutwe lia chize ukaupakule hashi.

¹⁰ Iye te hanalongesa mu sunangonga yimwe ha tangwa lia Sambata.

¹¹ Kumanyi, pwo umwe wapwile ni Spiritu ya kukokoloka kumi lia miaka ni miaka nake, iye wafumbamine, kahashile kuhetuka nichimwe.

¹² Muze Yesu amumwene, wamutambikile ngwenyi, Pwo, unatusuka ku kukokoloka che.

¹³ Iye wasayikile moko jenyi hali iye: haze hene wolokele, wachichimiekene Zambi.

¹⁴ Alioze mukwa kuyula sunangonga te kanevu kupiha, mumu Yesu wawukile ha tangwa lia Sambata, wakumbulwile ku mbunga ngwenyi, Kwali matangwa asambano a milimo, kashika nwize ha matangwa aze anuwuke, hi ha Sambata ko.

¹⁵ Alioze Mwene wamukumbulwile ngwenyi, Yenu yilembese, mweswe hakachi kenu kakujitula ngombe yenyi, hanji chimbulu chenyi, ku chililo ha tangwa lia Sambata, akamutwale ku meya.

¹⁶ Mba yono pwo, se iye mwana wa Apalahama, yoze Satana hanamukase kumi lia miaka ni miaka nake! kuchatambile kumutusula ku kana lino ha tangwa lia Sambata, nyi?

¹⁷ Shimbu ahanjikile yino yuma, akwa kulimika nenyi eswe evwile sonyi; ni mbunga awahililile ha yuma ya uhenya yize yeswe alingile iye.

¹⁸ Iye wambile ngwenyi, Neka wanangana wa Zambi muulifwa? Ngwe chika munguupwisa?

¹⁹ Unapu ngwe lunona wa mosetate, yoze anjile mutu amutumbe mu munda wenyi, iye watatukile, wapwile mutondo; ni tujila a mwilu atwamine ha mitango yawo.

²⁰ Cheka nawa wambile ngwenyi, Ngwe chika mungupwisa wanangana wa Zambi?

²¹ Unapu ngwe futunwiso, yize anjile pwo, akayise mu njongo jitatu ja wunga ndo weswe wafutunukine.

²² Iye wapalikile ndusu limbo ni limbo ni chihunda ni chihunda, nikulongesa, nikuya mu wenyi ku Yerusaleme.

²³ Mba umwe wambile kuli iye ngwenyi, Mwene, waze maalamwina akehe, nyi? Wambile kuli ayo ngwenyi,

²⁴ Litachikenu kunjila ku chikolo chikehe; mumu anji, ngwami, Makafupa kunjilamo, alioze kechi kahasa.

²⁵ Muze te mwenya zuwo hakatuka, hajila pito, munuputuka kumana haze nikungongwela ha pito, nikwamba ngwenu, Mwene, Mwene, twazulwile kama; iye makakundulula akambe kuli yenu ngwenyi, Chanunyingikine kuze nunakatuka.

²⁶ Hohene munukaputuka kwamba ngwenu, Hitunali, hitunanu kumeso je, hiunalongesa mu matapalo jetu;

²⁷ iye kumakamba ngwenyi, Ngunanwambulwila ngwami, Chanunyingikine kuze nunakatuka; katukenu kuli yami, yenu eswe akwa kulinga uhenge.

²⁸ Kumukukapwa malilo ni kulikopola ku mazo, muze munumona Apalahama ni Izake ni Yakomba ni aprofeta eswe mu wanangana wa Zambi, ni yenwene manumbila haze.

²⁹ Kumakakatuka ku Chivumbuko ni ku Chitokelo ni ku Norte ni ku Sule, makatwama ku mesa mu wanangana wa Zambi.

³⁰ Alioze kwali akwa kusula waze makapwa atangu, ni kwali atangu waze makapwa akwa kusula.

³¹ Ha ola yenayo amwe A-Fwariseu ejile nikwamba kuli iye ngwo, Katuka kuno, yako, Heronde kanazange kukushiha.

³² Iye wambile kuli ayo ngwenyi, Yénu, nukambe kuli yoze mukuza ngwenu, Tala, nakutuhwisa andemoniu, nakuhindwisa musono ni hamene, ni ha tangwa liamuchitatu mungukamanununa wenyi wami.

³³ Alioze changutamba kuya mu jila yami musono ni hamene ni hamene-a-lize, mumu kuchatambile profeta kufwa shina mu Yerusaleme.

³⁴ Yerusaleme, Yerusaleme, yena wakushiha aprofeta, wakwasa mawe waze aatumine kuli yena! Yisuho yipwa haha nazangile kukungulula i ana je ngwe chali makungulula ana jenyi mushi lia mapulwa jenyi, alioze kunwatayile.

³⁵ Talenu, zuwo lienu kalihichika kuli yenu hahululu. Ngunambe kuli yenu ngwami, Kunuchi kangumona ndo munwamba ngwenu, Kawaha yoze uneza mu jina lia Mwene.