Luka 12 - MUKANDA USANDU WA ZAMBI 1975

¹ Muze tununu anji akungulukile chocho aliachile umwe hali mukwo, waputukile kwamba kuli tumbaji twenyi kuliangila ngwenyi, Keyelenu futunwiso ya A-Fwariseu, yenayo ulembese.

² Alioze chuma cha kufukiwa chize kuchichi kafukuka chakuhi nichimwe; chipwe cha kuhengama chize kechi kachinyingika chakuhi nichimwe.

³ Kashika cheswacho nwambile mu milima kumakachivwa mu mwalwa; ni chize nwahanjikile mu matwi mu yipatulo ya muchima kumakachiambujola ha mafulumba ja mazuwo.

⁴ Mba ngunambe kuli yenu, tusendo twami ngwami, Kanda nuvwila woma waze akushiha mujimba, ni kulutwe lia chize keshi nacho nichimwe nawa chize mahasa kulinga.

⁵ Alioze mungunutoweza yoze nukamuvwile woma, muvwilenu woma, yoze kulutwe lia kushiha, akwete chiyulo cha kumbila mu Ngehena; ewa, ngunambe kuli yenu ngwami, muvwilenu woma yoze!

⁶ Keshi kulanjisa tulujila tutano ha tulumbongo twaali, nyi? Mba keshi kuvulama niumwe wa kuli ayo kumeso ja Zambi.

⁷ Alioze chipwe je kambu ja mitwe yenu hanajalula jeswe. Kanda nwivwa woma; yenu kunwahiana tulujila tunji.

⁸ Alioze ngunambe kuli yenu ngwami, Mweswawo mangutayiza kumeso ja atu, mwe Mwana Mutu kumakamutayiza nawa kumeso ja angelo ja Zambi.

⁹ Alioze yoze malikata yami kumeso ja atu, kumakalikalaye liakulu kumeso ja angelo ja Zambi.

¹⁰ Mweswawo mahanjika liji lia kusaula mwe Mwana Mutu, kumamukonekenalio; alioze yoze mashililika Spiritu Musandu, kechi kamukonekenacho.

¹¹ Muze manuneha kumeso ja masunangonga ni mianangana ni akwa kuyula, kanda nulipikala ha chize numukumbulula, hanji chize munukamba:

¹² mumu Spiritu Musandu kumanulongesa ha ola yize yene chize Chanutamba kwamba.

¹³ Mba umwe wa ku mbunga, wambile kuli iye ngwenyi, Longeshi, amba mwanakwetu akalianyine chihinga ni yami.

¹⁴ Alioze wambile kuli iye ngwenyi, Lunga, iya wangupwishile ngaji hanji mukwa kwanyina hakachi kenu?

¹⁵ Iye wambile kuli ayo ngwenyi, Kanyamenu, lifungenu ku kuzo yeswe; mumu mwono wa mutu kuushi kupwa ni kulumbama cha yize ali nayo.

¹⁶ Iye wahanjikile chishima kuli ayo ngwenyi, Minda ya umwe pichi yemine ya kulumbama.

¹⁷ Iye wanyongene mu mbunge yenyi ngwenyi, Kuchi mungulinga? Mumu muhela chishi nawo muze mungutulikila mihuko yami.

¹⁸ Ngwenyi, Chino mungulinga, mungupuzula machila jami, mungutanga anene ahiana, muze mwene mungutulikila mbuto yami yeswe ni yuma yami yipema.

¹⁹ Mba mungwamba ku mbunge yami ngwami, Mbunge yami, yuma yinji uli nayo ya kutulikila ha miaka yinji; hwima, ulie, unwe, usehejele.

²⁰ Alioze Zambi ngwenyi, Chihepuke, ufuku uno kumatambula mwono we kuli yena; ni yuma yize hiunalulika, yaya muyipwa?

²¹ Chocho anapu yoze wakulitulikila upite, keshi upite kuli Zambi.

²² Iye wambile kuli tumbaji twenyi ngwenyi, Kashika ngwami, Kanda nulipikala ha mwono wenu, chize munulia; chipwe ha mujimba, chize munuzala.

²³ Mumu mwono kuwahiana kulia, ni mujimba kuwahiana mazalo.

²⁴ Zewulenu yikwakwalo, keshi kukuwa, chipwe keshi kucha; chila keshi nayo chipwe fwandinga, hindu Zambi kakwahoka; yenu kunwahianyine tujila, nyi?

²⁵ Mba iya wa kuli yenu ha kulipikala mahasa kuweza ku Chizundamo chenyi chipwe mbandu yimuwika?

²⁶ Kachi kashika kunwahashile kulinga chize chikepe, kuchi te nwakulipikala ha yize yikwo.

²⁷ Zewulenu lirio, ngwe chize muyitatuka; kuyishi kukilikita chipwe kuyishi kuhosa; alioze ngwami, Chipwe Solomone mu uhenya wenyi weswe kazalileko ngwe chimwe hakachi kayo.

²⁸ Kachi Zambi chocho majika mwambu uze muupwa musono, ni hamene maumbila mu jiko, Shinaho chikolo manujika yenu, yenu akwa Ufulielo ukepe?

²⁹ Kanda nufupa chize munulia, hanji chize mununwa, chipwe kanda nulipikala.

³⁰ Mumu yuma yino yeswe mavungu a hashi kakuyifupa; ni Tatenu kananyingika ngwe nwakufupafupa yino yuma.

³¹ Alioze fupenu wanangana wenyi, mba kumanuwezela yino yuma yeswe.

³² Kanda nwivwa woma, mbunga yikepe; mumu chinawahila Tatenu kunwaha wanangana.

³³ Lanjisenu chize nuli nacho, hanenu yawana kuli yiswale; litungilenu yipakumuna yize kuyishi kupapujoka, upite mu malilu uze kuushi kuhwa, muze mwiji keshi kukundama chipwe ndulu keshi kupihisa.

³⁴ Mumu kweswe upite wenu uli, kuze kwene mbunge jenu kumujipwa nawa.

³⁵ Zalilo jenu jilijichike miya, ni ndeya jenu jiyile.

³⁶ Pwenu ngwe atu akutatatata mwene wo, muze mahiluka ku ulungi; hanga, muze meza, mangongwela, akamwazulwile nikawashi.

³⁷ Kawaha ndungo aze, mwene muze meza maawana nikulá; pundu ngwami, Kumalijichika muya, maatwamisa ku mesa, makundama, maavumbika.

³⁸ Nyi kachi meza ha ola ya kalayi wamuchiali, hanji ha ola ya kalayi wamuchitatu, aawane chocho, kawaha waze.

³⁹ Alioze chino nyingikenu, kachi mwenya zuwo wanyingikine ha ola yize meza mwiji, kachi walayile, kachi kamutayijile kulokola zuwo lienyi.

⁴⁰ Yenu nawa lilulikenu: mumu ha ola yize kunushi kushinginyeka mwe Mwana Mutu meza.

⁴¹ Petulu wambile ngwenyi, Mwene, unahanjika chishima kuli yetu nyi, shina kuli eswe nawa?

⁴² Mwene ngwenyi, Iya kevwe kaselo wamwenemwene, wa kukanyama, yoze mwene wenyi masa helu lia akwa zuwo lienyi, mukuhana njongo yo ya kulia ha mwaka wayo?

⁴³ Kawaha ndungo yoze, mwene wenyi muze meza mamuwana kanalingi chocho.

⁴⁴ Chamwenemwene, ngwami, Kumamusa helu lia yize yeswe ali nayo.

⁴⁵ Alioze kachi ndungo yoze mamba mu mbunge yenyi ngwenyi, Mwene wami kanashimbula; maputuka kulamba akweze ni ana-mapwo akwa milimo, nikulialia, nikunwanwa, nikuzengewa.

⁴⁶ Mwenya ndungo yoze kumakeza ha tangwa lize keshi kutalatala, ni ha ola yize kachinyingikine, kumamupatula mukachi, mamusela chihanda ni waze kafulielele.

⁴⁷ Alioze ndungo yoze wanyingikine upale wa mwene wenyi, hindu kalulikileko, kalingile upale wenyi, kumamulamba ni mijiji yinji.

⁴⁸ Alioze yoze kanyingikineko, walingile yuma ya kutela lamba, kumamulamba ni mijiji yikepe. Ni mweswawo mamwaha yinji, kuli iye kumafwetesa yinji: ni kuli yoze makunjika yinji, kuli iye maketa yinji yahiana.

⁴⁹ Nejile mukumbila kahia hano hashi; ni chikwo chika munguzanga, kachi hakawika kulu?

⁵⁰ Alioze upapachiso nguli nawo akangupapachise nawo; ngunalishinyika Chichize ndo muumanunuka!

⁵¹ Nunashinginyeka ngwe nejile mukuhana sambukila hano hashi, nyi? Ngwami, Ka, alioze kuhandununa:

⁵² mumu chize ku haliapwila ndo ku miaka, atano a mu zuwo limuwika mahandunuka; atatu malihandununa kuli aali, ni aali malihandununa kuli atatu.

⁵³ Tato kumalihandununa kuli mwanenyi wa lunga, ni mwanenyi wa lunga kuli tato; naye malihandununa kuli mwanenyi wa pwo, ni mwanenyi wa pwo malihandununa kuli naye; tato-pwo malihandununa kuli tembwa-mwanenyi, ni tembwa-mwanenyi malihandununa kuli tato-pwo.

⁵⁴ Iye wambile nawa ku mbunga ngwenyi, Muze munumona lelwa linavumbuka ku Chitokelo, haze hene ngwenu, Vula kaneza; ni chocho muchipwa.

⁵⁵ Muze fuji ya ku Sule muyiza, ngwenu, Chivukuminya kumuchiza, ni chocho muchipwa.

⁵⁶ Yilembese, nunanyingika ngwe chize kulumbununa kusoloka cha hashi ni lilu; alioze ngwe kuchi kunwanyingikine kulumbununa we mwaka?

⁵⁷ Kuchi te chipwe kuli yenwene kunushi kupatula chize cha kululika.

⁵⁸ Mumu shimbu muoya hamwe ni mukwa kole ye kuli mukwa kuyula, eseka chikolo mu jila kuwana nenyi; kuchina hanji makukoka kuli sopi, ni sopi makukunjika kuli kapita, ni kapita makumbila mu zuwo lia ususu.

⁵⁹ Ngunambe kuli yenu ngwami, Kuchi katuhukamo nichimwe ndo hiwafweta chipwe kalumbongo ka kusula.