Luka 11 - MUKANDA USANDU WA ZAMBI 1975

¹ Shimbu apwile kumwe nikulemba, muze halitwamina, umwe wa kuli tumbaji twenyi wambile kuli iye ngwenyi. Mwene, tulongese kama kulemba, chizechene ngwe Yoano walongesele tumbaji twenyi.

² Iye wambile kuli ayo ngwenyi, Muze munulemba, ambenu ngwenu, Tata yetu, uli mwilu, akalemese jina lie, wanangana we wize, upale we ulingiwe hano hashi chizechene ngwe mwilu.

³ Twehe kama tangwa ha tangwa mbolo yetu yize twakufupa.

⁴ Utukonekene kama milonga yetu; mumu yetu nawa twakukonekena mweswe uli ni kongo kuli yetu. Kanda ututwala kama ku cheseko, alioze tupulule kama kuli mwe mupi.

⁵ Iye wambile kuli ayo ngwenyi, Iya hakachi kenu mapwa ni kasendo, nyi maya kuli iye ha muchima ufuku, akambe kuli iye ngwenyi, Kasendo kami, ngwehe kama mbolo jitatu;

⁶ mumu kasendo kami mu wenyi heza kuli yami, chishi nacho chize mungumwaha;

⁷ iye muchima lia zuwo makumbulula ngwenyi, Kanda unguketeka; hinájila pito kulu, ni anami hapomba hamuwika ni yami; Chahashile kuhinduka ngukwehe.

⁸ Ngwami, Chipwe keshi kuhinduka akanwehe mumu iye kasendo kenyi, hindu mumu ha kuketeka chenyi kumakahinduka akanwehe jeswe mafupa.

⁹ Ngunambe kuli yenu ngwami, Etenu, mba kumakanwaha; fupenu, mba kumunukawana; ngongwelenu, mba kumakanwazulwila.

¹⁰ Mumu mweswe meta, matambula; ni yoze mafupa, mawana; ni yoze mangongwela, kumakanwazulwila.

¹¹ Chisemi muka hakachi kenu, kachi mwanenyi meta mbolo, mamwaha liwe? Hanji meta yishi, mamwaha kapela?

¹² Hanji meta lionda, mamwaha kavwanda, nyi?

¹³ Mba kachi yenu nuli api, nunanyingika kuhana yawana yipema kuli ana jenu, Shinaho chikolo Tatenu wa mwilu mahana Spiritu Musandu kuli waze mamwita, nyi?

¹⁴ Iye te kanatuhwisa ndemoniu kamama. Muze te ndemoniu hatuhuka, kamama wahanjikile; mbunga akomokene.

¹⁵ Alioze amwe a kuli ayo ambile ngwo, Ni tachi ja Mbelezepu, mwata wa andemoniu, kakutuhwisa andemoniu.

¹⁶ Akwo, nikumweseka, afupile kuli iye chilayi cha mwilu.

¹⁷ Alioze iye, nikunyingika yitaka yo, wambile kuli ayo ngwenyi, Mawanangana waze eswe malihandununa ene kumakaapwisa ahululu; ni zuwo lia kuhandunuka mulipuzuka.

¹⁸ Nyi kachi nawa Satana malihandununa mwene, ngwe kuchi wanangana wenyi muukola? Mumu nunambe ngwenu, kakutuhwisa andemoniu ni tachi ja Mbelezepu.

¹⁹ Kachi yami ni tachi ja Mbelezepu nakutatwisa andemoniu, anenu a malunga ni tachi jaya akwatuhwisa? Kashika kumakapwa akwa kunupatwila.

²⁰ Alioze kachi ni munwe wa Zambi yami nakutuhwisa andemoniu, kachi wanangana wa Zambi hiuneza hali yenu.

²¹ Muze chitakame wa kulipakata mafunga zuwo lienyi, yikumba yenyi muyiwaha.

²² Alioze muze yoze makangana kuhiana iye meza, mamukumba, machiza kulipakata chenyi chize wachikolelele, iye makapangila yikumba yenyi.

²³ Yoze keshi hamwe ni yami kanalimika ni yami; ni yoze keshi kukunga hamwe ni yami kanasandula.

²⁴ Spiritu ya luchisa muze te hatuhuka muli mutu, mapalika ndusu muma mumu, nikufupa uhwimino. Se keshi kuuwana, mamba ngwenyi, Munguhilukila ku zuwo liami muze natuhukile.

²⁵ Iye se heza, maliwana lia kukomba, lia kululika.

²⁶ Hohene maya, matwala hamwe nenyi maspiritu eka shimbiali a ungulungulu ahiana; no manjila, matwamamo. Songo lia yoze mutu mulihiana kupiha.

²⁷ Shimbu machihanjika yino yuma, umwe pwo wa ku mbunga wakalumiokene, ngwenyi, Kuliawaha jimo lize liakusemene ni mele aze waamwine.

²⁸ Iye wambile ngwenyi, Ewa Shinaho, kawaha waze akwivwa liji lia Zambi nikulifunga.

²⁹ Muze mbunga ahonekene nikukungama waputukile kwamba ngwenyi, Chisemuko chino che chisemuko cha ungulungulu: chakufupa chilayi; ni chilayi kechi kaahacho shina chilayi cha profeta Yona.

³⁰ Mumu chizechene ngwe Yona wapwile chilayi kuli A-Ninive, chocho nawa mwe Mwana Mutu makapwa ku chisemuko chino.

³¹ Mwanangana wa pwo wa ku Sule kumakahinduka ha upatwilo hamwe ni malunga ja chisemuko chino, makaahisa: mumu iye wakatukile ku masongo ja hashi mukwivwa mana ja Solomone; kumanyi, umwe Wahiana Solomone kuno kwali.

³² Malunga a ku Ninive kumakahinduka ha upatwilo hamwe ni chisemuko chino, makachihisa: mumu alikonyekene ha kwambujola cha Yona; kumanyi, umwe Wahiana Yona kuno kwali.

³³ Niumwe, muze hawika ndeya, mayisa ku tenga, chipwe mushi lia chisoka, alioze ha chikwachilo cha ndeya, hanga waze manjila akamone pangu.

³⁴ Ndeya ya mujimba we, liso lie; muze liso lie mulipwa lingunu, mujimba we weswe muuzala tò ni pangu; alioze muze mulipwa lipi, mujimba we nawa muuzala tò ni milima.

³⁵ Chitalenu, kashika pangu lize lili muli yena kanda Ukapwa milima.

³⁶ Kachi kashika mujimba we weswe muuzala tò ni pangu, ni chihanda nichimwe cha milima, kachi muuzala weswe ni pangu, chizechene ngwe muze ndeya muyikupangulwisa ni pangu liayo.

³⁷ Achi, shimbu ahanjikile, umwe Ka-Fwariseu wamulakenyene alie hamwe nenyi, iye wanjilile, Watwamine ku mesa.

³⁸ Muze Ka-Fwariseu achimwene, wakomokene kumona ngwe kaliangile kusana shimbu kanda alia.

³⁹ Alioze Mwene wambile kuli iye ngwenyi, Achi, yenu A-Fwariseu nwakupemesa haze lia musenge ni lia panda; alioze muchima lienu munazala ni mbenga ni ungulungulu.

⁴⁰ Yihepuke, yoze watangile haze katangile muchima nawa, nyi?

⁴¹ Alioze Shinaho hanenu yawana ya ku yize yili muchima; nyi chocho, yuma yeswe muyipwa yipema kuli yenu.

⁴² Alioze lamba lienu A-Fwariseu! nwakutambula chihanda cha kumi cha chimbumba ni aluta, ni yilimalima yeswe, alioze nwakulelesa ululi ni zango lia Zambi: Chanutamba Shinaho kulinga yino ni kulitwamina yikwo, ka.

⁴³ Lamba lienu A-Fwariseu! mumu nwakuzanga yitwamo ya kulutwe mu masunangonga, nwakuzanga anumeneke mu yitanda.

⁴⁴ Lamba lienu akwa kusonyeka ni A-Fwariseu! yilembese! mumu nunapu ngwe mafuka aze keshi kusoloka, ni waze mapalikaho keshi kuchinyingika.

⁴⁵ Mba umwe wa kuli akwa shimbi wamukumbulwile, ngwenyi, Longeshi, ha kwamba yino yuma unatusaula nawa.

⁴⁶ Iye wambile ngwenyi, Lamba lienu akwa shimbi nawa! mumu nwakutwika akwo yiteli yikalu kumbata, ni yenwene kunushi kusa chipwe munwe umuwika ku chiteli.

⁴⁷ Lamba lienu! mumu nwakutunga mafuka ja aprofeta, ni akakenu aashihile.

⁴⁸ Chocho nunapu yela, nwakutayiza ku yitanga ya akakenu! mumu o aashihile ni yenu nwakutunga mafuka jo.

⁴⁹ Kashika nawa mana ja Zambi ambile ngwo, Mungukatuma kuli ayo aprofeta ni apostolo; mba amwe a kuli ayo makaashiha, nikwahungumiona;

⁵⁰ hanga manyinga ja aprofeta eswe aze amwanganyine chize ku kusela cha fundamentu ya hashi, akaafwetese ha chisemuko chino;

⁵¹ chize ku manyinga ja Abele ndo ku manyinga ja Zakaria, yoze wafwile hakachi ka chilumbilo ni tembele: ewa, ngwami, Kumakaafwetesa ha chisemuko chino.

⁵² Lamba lienu akwa shimbi! mumu nwachijile sapi ya chinyingi; kunwanjilile yenwene, ni waze apwile nikunjila nwaakwikile.

⁵³ Muze te hatuhukamo, akwa kusonyeka ni A-Fwariseu aputukile kumushinjila chikolo nikumusungasunga ahanjike yuma yinji;

⁵⁴ nikumujikinyina, nikufupa kukwata chuma chimwe mu kanwa lienyi hanga amusume.