Luka 10 - MUKANDA USANDU WA ZAMBI 1975

¹ Achi, kulutwe ha yino yuma, Mwene watongwele makumi shimbiali akwo, waatumine aali ni aali kulutwe ha meso jenyi ku membo eswe ni kweswe himaya mwene.

² Iye wambile kuli ayo ngwenyi, Kucha chamwenemwene chinene, alioze akwa milimo akehe; liumbenu kashika kuli mwenya kucha, atume akwa milimo aye mu kucha chenyi.

³ Yénu kwenu; ngunanutumu ngwe ana-mapanga hakachi ka tungunga.

⁴ Kanda nukambata chipwe chikwama, chipwe chipakumuna, chipwe haku, ni kanda nukameneka niumwe mu jila.

⁵ Mu zuwo heswaho mununjila, nuliange kwamba ngwenu, Sambukila yipwe ku zuwo lino.

⁶ Kachi chamwenemwene mukwa sambukila mapwamo, sambukila yenu muyikatwama hali iye, alioze kachi ka, muyihiluka kuli yenu.

⁷ Mu zuwo lize hene nukatwame, nikulia nikunwa yuma yize mapwa nayo, mumu mukwa milimo kanatela fweto yenyi. Kanda nukatutujoka ku zuwo ni zuwo.

⁸ Ni mu limbo heswaho mununjila, nyi manutambula, nukalie chize masa kumeso jenu;

⁹ nukawuke mieji waze alimo, nukambe kuli ayo ngwenu, Wanangana wa Zambi hiunakundama kuli yenu.

¹⁰ Alioze mu limbo heswaho mununjila, o keshi kunutambula, nukatuhuke mu mikwakwa yaho, ngwenu,

¹¹ Chipwe fufuta ya ku limbo lienu, yize yakulalaminya ku yihato yetu, tunakukumwina hali yenu; hindu nyingikenu chino, wanangana wa Zambi hiunakundama.

¹² Ngwami, Kumuchikapwa chashi ha Sondome ha tangwa lize, chikalu ha limbo lize.

¹³ Lamba lienu, A-Karazene! Lamba lienu, A-Mbeteseta! mumu kachi yipupu yize alingile muli yenu ayilingile mu Teru ni Sendone, kachi halikonyeka kulu ni chikeleyi ni uto.

¹⁴ Alioze kumuchikapwa chashi ha Teru ni Sendone ha upatwilo, chikalu hali yenu.

¹⁵ Ni yena Kafwanaume, makakunangamisa ndo mwilu, nyi? Kumakakuhulumuna ndo ku Heteze.

¹⁶ Yoze manwivwa, mangwivwa yami; ni yoze malituna yenu, malituna yami; ni yoze malituna yami, malituna yoze wangutumine.

¹⁷ Mba makumi shimbiali ahilukile ni uwahililo, ngwo, Mwene, chipwe andemoniu kakutuzeyela mu jina lie.

¹⁸ Iye wambile kuli ayo ngwenyi, Namwene Satana kanaholoka mwilu ngwe muhenyo.

¹⁹ Hingunanwehe chiyulo cha kuliata ha tupela ni tuvwanda, ni helu lia tachi jeswe ja mukwa kole, mba nichimwe kuchichi kanulemeka nichimwe.

²⁰ Hindu kanda nukawahilila ha chino ngwe maspiritu kakunuzeyela; alioze Shinaho wahililenu mumu majina jenu kanasonewa mwilu.

²¹ Ha ola yize yene Yesu walikwijile mu Spiritu, ngwenyi, Ngunakuchichimieka Tata, Mwenya lilu ni hashi, wahengekele yino yuma kuli akwa mana ni akwa malinjekela, wayisolwele kuli ana-akemba; ewa, Tata; mumu chocho chakupemenene.

²² Kanangukunjika yuma yeswe kuli Tata; mba niumwe manyingika chize mwe Mwana apwa shina Tata; ni chize apwa Tata shina mwe Mwana, ni yoze mweswawo mwe Mwana mapala kumusolola.

²³ Iye nikutewulukila kuli tumbaji twenyi, wambile kuli ayo ukawo ngwenyi, Kawaha meso aze akumona yuma yize yenu nwakumona:

²⁴ mumu ngunambe kuli yenu ngwami, Aprofeta anji ni mianangana azangile kumona yuma yize yenu nwakumona, kayimweneko; azangile kwivwa yuma yize yenu nwakwivwa, alioze kayivwile ko.

²⁵ Mba umwe mukwa shimbi wakatukile nikumweseka, ngwenyi, Longeshi, kuchi mungulinga hanga ngukahinge mwono wa mutolo?

²⁶ Yesu wambile kuli iye ngwenyi, Chika chinasonewa mu shimbi? Ngwe kuchi unatange?

²⁷ Iye wakumbulwile ngwenyi, Ngwo, Ukazange Mwene Zambi ye ni mbunge ye yeswe, ni mwono we weswe, ni ngolo je jeswe, ni kunyonga che cheswe, ukazange mwenyembo we ngwe wakulizanga yena mwene.

²⁸ Wambile kuli iye ngwenyi, Kwakumbulula kanawa; chino linga ukatwame ni mwono.

²⁹ Alioze iye, nikuzanga kulisambisa, wambile kuli Yesu ngwenyi, Mba mwenyembo wami iya?

³⁰ Yesu wamukumbulwile ngwenyi, Umwe mutu wakatukile ku Yerusaleme, wapalumukine ku Yeriku; waliwanyine mukachi ka mihuza, eno, amutokwele mazalo, amupupwile, akatukile nikumuhichika ni chonono.

³¹ Mba umwe sasendote wapalumukine chipalikila jila yize; muze amumwene wapalikile ha sali likwo.

³² Chizechene Ka-Levi, muze aheteleko amumwene, wapalikile ha sali likwo.

³³ Alioze umwe Ka-Samaria, shimbu maya mu wenyi, wahetele kuli iye: muze amumwene, wevwile keke,

³⁴ wakundamine kuli iye, wakashile mbandu jenyi, watehwinyineho maji ni vinyu; iye wamusele ha chimbulu chenyi mwene, wamutwalile ku zuwo lia kuzeka ngeji, wamufungile.

³⁵ Muze hikwacha wachijile mbongo jiali, wajihanyine kuli mwenya zuwo, wambile kuli iye ngwenyi, Mufunge; cheswacho mukahwisa nawa, mungukakukundulula ha kuhiluka chami.

³⁶ Iya kashika wa kuli wano atatu, unamushinginyeka kupwa mwenyembo kuli yoze waliwanyine ni mihuza?

³⁷ Iye wambile ngwenyi, Yoze wamulwezele keke. Yesu wambile kuli iye ngwenyi, Yako, ukalinge chizechene.

³⁸ Shimbu te anayi mu jila yo, wanjilile mu chimwe chihunda, mba umwe pwo, jina lienyi Marta, wamuzekele mu zuwo lienyi.

³⁹ Iye wapwile ni mwanakwo, jina lienyi Maria, yoze Watwamine nawa ku yiliato ya Yesu, nikwivwa liji lienyi.

⁴⁰ Achi, Marta wasakalalile ni uvumbiko wunji, wakundamine kuli iye, ngwenyi, Mwene, hi chuma ko kuli yena, nyi? Mwanakwetu kanguhichikanga kuvumbika ukawami? Mwambe kashika angukwase.

⁴¹ Alioze Yesu wamukumbulwile ngwenyi, Marta, Marta, kuwakulipikala nikulipinjisa ha yuma yinji.

⁴² Alioze chuma chimuwika chinahono, Maria hanatongola chihanda chipema, chize kechi kachichiza kuli iye.