Luka 1 - MUKANDA USANDU WA ZAMBI 1975

¹ Mumu te anji hanalisela kusoneka sango lia kutwala ku yikuma yize hiyinamanunuka pundu hakachi ketu,

² chizechene ngwe atukunjikileyo, waze apwile yela ni tulala twa lie liji, chize ku uputukilo,

³ changupemenene yami nawa, se hingunanyingika yuma yeswe pundu chize ku uputukilo, kusoneka nikululika kuli yena Teofwilu mulemu Wahiana;

⁴ hanga ukanyingike pundu umwenemwene wa yuma yize akufumbileyo.

⁵ Kwapwile ha matangwa a Heronde, mwanangana wa Yundeya, umwe sasendote, jina lienyi Zakaria, wa ku ngango ya Abija: neye wapwile ni mukwo-pwo wa kuli ana a Arone, jina lienyi Izabele.

⁶ O, eswe aali, apwile akwa ululi kumeso ja Zambi, kanende mu maliji eswe a shimbi ni upatwilo wa ululi wa Mwene, keshi kapalia.

⁷ Alioze kapwile ni mwana, mumu te Izabele wapwile mumba, no eswe aali miaka yo hiyoka.

⁸ Mba shimbu alingile usasendote wenyi kumeso ja Zambi, nikulita ni ngango yenyi,

⁹ nikulita ni ndako ya usasendote, chapwilile kuli iye, ha kuta chela kunjila mu tembele ya Mwene mukwocha linsensu.

¹⁰ Chizavu cheswe cha atu te kanalembe haze ha ola ya insensu.

¹¹ Mungelo wa Mwene wasolokele kuli iye, kanamana ku sali lia chindume lia chilumbilo cha insensu.

¹² Zakaria walipikalile muze amumwene, woma wamukwachile.

¹³ Alioze mungelo wambile kuli iye ngwenyi, Kanda wivwa woma, Zakaria; mumu hanapanjika ku kuliumba che; ni mukwenu-pwo Izabele kumakakusemena mwana-lunga, ukamuluke jina ngwe, Yoano.

¹⁴ Kumukapwa ni uwahililo ni kulikwiza; anji kumakawahilila ha kusemuka chenyi.

¹⁵ Mumu kumakapwa munene kumeso ja Mwene, kechi kanwa vinyu, chipwe kunwa chimwe chisasu, ka; iye makazala tò ni Spiritu Musandu, chize ku jimo lia naye.

¹⁶ Kumakatewulwila anji hakachi ka ana a Izalele kuli Mwene Zambi yo.

¹⁷ Kumakaya kulutwe lia meso jenyi ni spiritu ni tachi ja Eliya, mukutewulwila mbunge ja atato kuli ana, ni yihulia ku ukanyame wa akwa ululi; mukululikila Mwene amwe atu aalulikile.

¹⁸ Zakaria wambile kuli mungelo ngwenyi, Neka mungunyingika chino? Mumu nguli mukulwana, ni mukwetu-pwo miaka yenyi hiyoka.

¹⁹ Mungelo wamukumbulwile ngwenyi, Yami nguli Gabriele, nakumana kumeso ja Zambi; angutumine mukuhanjika ni yena, ngukwambulwile lusango yono mupema.

²⁰ Mba tala, kumuhola kulungunga, kuchi kuhasa kuhanjika ndo tangwa lize yino yuma muyipwa, mumu kwafulielele maliji jami, eno kumakamanunuka ha mwaka wo.

²¹ Atu atwaminyinyine Zakaria, o akomokene mumu ha kushimbula chenyi mu tembele.

²² Mba muze atuhukile, kahashile kuhanjika kuli ayo; o anyingikine ngwo, Hamona usolwelo mu tembele. Iye wanyongonwene nikulinga yilayi kuli ayo, alioze wasalile kamama.

²³ Muze matangwa a kulingila chenyi amanunukine, wahilukilile ku zuwo lienyi.

²⁴ Kulutwe lia matangwa aze, mukwo-pwo Izabele wasesekele ufumba; iye waswamine tukweji atano, ngwenyi,

²⁵ Chocho Mwene hanalingi kuli yami, ha matangwa aze muze atalile hali yami mukuchiza luchoko yoze akungwamba hakachi ka atu.

²⁶ Achi, ha kakweji wamuchisambano, Zambi watumine mungelo Gabriele ku limbo lia mu Ngalileya, jina liacho Nazare.

²⁷ Kuli umwe *virgem hanamulakenya kuli lunga, jina lienyi José, mukwa zuwo lia David; ni jina lia mwe virgem Maria.

²⁸ Mungelo wejile kuli iye, wambile ngwenyi, Vulie! Yena hanakuvumbisa kuli Zambi; Mwene kwali hamwe ni yena; kuwawaha hakachi ka mapwo.

²⁹ Alioze walipikalile chikolo ha liji lienyi, wanyongene chize kumeneka chino muchipwa.

³⁰ Mungelo wambile kuli iye ngwenyi, Kanda wivwa woma, Maria, mumu hiunawane vumbi kumeso ja Zambi;

³¹ mba museseka mu jimo, mukasema mwanalunga, munumuluka jina ngwe, Yesu.

³² Iye kumakapwa munene, makamuvuluka ngwo, Mwe Mwana wa Chitunda; Mwene Zambi kumakamwaha ngunja ya tato David;

³³ iye kumakayula akwa zuwo lia Yakomba ku miaka ya mutolo; ni wanangana wenyi kuuchi kuhwa.

³⁴ Maria wambile kuli mungelo ngwenyi, Ngwe kuchi chino muchikapwa se kanda nguchilimona ni lunga?

³⁵ Mungelo wamukumbulwile ngwenyi, Spiritu Musandu kumeza hali yena, ni tachi ja mwe Chitunda kumujikuzulamina Chizulie; kashika nawa chuma chisandu chize muchikasemuka, kumakamuvuluka ngwo, Mwe Mwana Zambi.

³⁶ Mba musonye Izabele, iye nawa hanaseseka mwana-lunga ha ushinakaji wenyi; ni yono mwe kakweji wamuchisambano kuli yoze amuvulukile ngwo, Mumba.

³⁷ Mumu ni Zambi nichimwe machisa kenu.

³⁸ Maria wambile ngwenyi, Nguli ndungo ya Mwene, chikapwe kuli yami nikulita ni liji lie. Mba mungelo wakatukile kuli iye.

³⁹ Maria wakatukile ha matangwa aze, wayile kapupushi ku chifuchi cha milundu, ku limbo lia mu Yunda.

⁴⁰ Wanjilile mu zuwo lia Zakaria, wamenekene Izabele.

⁴¹ Muze Izabele evwile kumeneka cha Maria, mwana-kemba watumbukile mu jimo lienyi; ni Izabele wazalile tò ni Spiritu Musandu;

⁴² wakololokele ni liji linene ngwenyi, Kuwawaha mukachi ka mapwo, ni muhuko wa jimo lie kuwawaha.

⁴³ Kuchi te hangwaha chino, te naye ya Mwene wami meza kuli yami?

⁴⁴ Mumu, muze liji lia kumeneka che hilianjila mu matwi jami, mwana-kemba katumbuka ni kulikwiza mu jimo liami.

⁴⁵ Kawaha yoze wafulielele, mumu kumanunuka kumuchikapwa cha yuma yize hanahanjika Mwene kuli iye.

⁴⁶ Maria wambile ngwenyi, Mbunge yami yinalemesa Mwene.

⁴⁷ Spiritu yami hiyinalikwiza muli Zambi Chilamwina chami.

⁴⁸ Mumu hanatale ulelu wa ndungo yenyi wa pwo; Mumu chize ku haliapwila ndo ku miaka, Yisemuko yeswe kumuyikanguvuluka ngwo, Kawaha.

⁴⁹ Mumu mukwa tachi jeswe hanangulingila yuma yinene; Jina lienyi lisandu.

⁵⁰ Keke yenyi kuyili ku yisemuko ni yisemuko kuli waze akumuvwila woma.

⁵¹ Hanalweze ndundo ni kwoko lienyi; Hanamwange akwa kulengumuka mu kunyonga cha mbunge jo;

⁵² Hanapupu akwa kuyula ku ngunja jo, hananangamisa akwa kulilelesa.

⁵³ Hanakuchisa akwa zala ni yuma yipema; hanakatwisa pichi mokomoko.

⁵⁴ Hanakwasa Izalele kavumbi kenyi, hanga akewuluke keke;

⁵⁵ Kuli Apalahama, ni kuli munyachi wenyi ndo ku miaka ya mutolo (chizechene ngwe ahanjikile kuli tulamba twetu).

⁵⁶ Maria Watwamine hamwe nenyi ngwe tukweji atatu, mba wahilukilile ku zuwo lienyi.

⁵⁷ Achi, mwaka wa kusema cha Izabele wamanunukine; iye wasemene mwana-lunga.

⁵⁸ Enyembo jenyi ni usoko wenyi evwile ngwo, Mwene hokesa keke yenyi kuli iye, no awahililile hamwe nenyi.

⁵⁹ Mba ha tangwa liamuchinake ejile akapwise mwe mwana ngalami; o ambile kumuluka jina lia tato ngwo, Zakaria.

⁶⁰ Alioze naye wambile ngwenyi, Hi chocho ko; alioze amuluke Yoano.

⁶¹ O ambile kuli iye ngwo, Niumwe hakachi ka usoko we uli ni jina lino, wakuhi.

⁶² O alingile yilayi kuli tato, kuhula chize mazanga kumuluka.

⁶³ Iye wechile mukanda, wasonekene ngwenyi, Jina lienyi Yoano. No eswe akomokene.

⁶⁴ Ni kanwa lienyi liapakukile haze hene ni limi lienyi liatusukile, neye wahanjikile nikufumanyisa Zambi.

⁶⁵ Woma wapwile hali waze eswe atwamine ha kwajingilika; alihanjikishile yino yuma mu chifuchi cheswe cha milundu ya Yundeya.

⁶⁶ Mba waze eswe ayivwile, ayipachikile mu mbunge jo, ngwo, Yono mwana kuchi makapwa? Ni kwoko lia Mwene liapwile hamwe nenyi.

⁶⁷ Tato Zakaria wazalile tò ni Spiritu Musandu, yaprofeteza ngwenyi,

⁶⁸ Mwene Zambi ya Izalele afumane; mumu hanatale hali atu jenyi, hanaalingila ukule.

⁶⁹ Hanasolola mbinga ya ulamwino hali yetu mu zuwo lia David kavumbi kenyi.

⁷⁰ (Chizechene ngwe ahanjikile ku makanwa ja aprofeta jenyi asandu, waze apwile chize ku miakulwila),

⁷¹ Hanga akatulamwine ku moko ja akwa kole jetu, ni ku moko ja waze eswe akutuvwila kole;

⁷² Mukulweza keke kuli tulamba twetu, mukwiwuluka usendo wenyi usandu;

⁷³ Shingo lize walishingile kuli kulwetu Apalahama,

⁷⁴ Mukuhana kuli yetu, tukapuluke ku moko ja akwa kole jetu, tukamulingile ni woma wakuhi,

⁷⁵ Mu usandu ni ululi kumeso jenyi matangwa eswe a mwono wetu.

⁷⁶ Ewa, ni yena mwana, kumakakuvuluka ngwo, Profeta wa mwe Chitunda: mumu kumukaya kulutwe lia meso ja Mwene mukululika majila jenyi;

⁷⁷ Mukunyingikisa atu jenyi ulamwino ha ukonekeno wa milonga yo.

⁷⁸ Mumu ha mbunge ya keke ya Zambi yetu, ku yenayo kucha cha tangwa kwilu muchikacha hali yetu,

⁷⁹ Mukupanguka hali waze akutwama mu milima ni mu Chizulie cha kufwa; mukutemwina molu jetu mu jila ya sambukila.

⁸⁰ Mwe mwana watatukile, wafundwile mu Spiritu, wapwile mu puya ndo tangwa lia kumulweza kuli A-Izalele.