Longeshi 9 - MUKANDA USANDU WA ZAMBI 1975

¹ Yuma yino yeswe nayisele mu mbunge nikuyihengula yeswe, chize mukwa ululi, ni mukwa mana, ni yitanga yo, yili mu kwoko lia Zambi. Chipwe cha zango, chipwe cha kole, mutu keshi kuchinyingika. Yeswe kumeso jo yapwa yamokomoko,

² se songo limuwika liakwawana eswe; mukwa ululi ni chingulungulu, ni mupema, ni mukwa kulinanga ni mukwa kulichisa, mukwa chitapo ni yoze keshi kushiha chitapo. Chize apwa mupema, ni chivulumunyi, neye chocho; ni mukwa kulishinga chimuwika apwa ni yoze machina mashingo.

³ Chino chapwa chuma chipi mu yitanga yeswe kushi iia tangwa—songo limuwika liakwawana eswe. Chikwo nawa mbunge ja atu jazala tò ni yipi; uzaluke watwama mu mbunge jo shimbu mapwa ni mwono, mba kulutwe lia chino kakuya ku ufwe.

⁴ Alioze mweswe unatwama hakachi ka amwono kutalatala kali nacho, mumu, kawa wa mwono Wahiana ndumba mufu.

⁵ Mumu amwono kananyingika ngwo, Mutukafwa, alioze afu kanyingikine nichimwe. Keshi nawa ni kwononona; keshi kwewuluka.

⁶ Ni zango lio, ni kole yo, ni chipululu cho, yeswe hiyajimuka, mba ndo ku miaka ya mutolo o keshi ni chihanda nichimwe cha yuma yize akulingalinga kushi lia tangwa.

⁷ Yako ukalie mbolo ye ni uwahililo; nwako vinyu ye ni mbunge ya chiseke, mumu Zambi hanatayiza kulu chize unalingi.

⁸ Mazalo je akatome matangwa eswe; kanda uhona maji ha mutwe we.

⁹ Wahilila ni mukwenu-pwo wa zango matangwa eswe a mwono we wamokomoko, hanakwehe kushi lia tangwa mumu chihanda che chenacho mu mwono, ni mu milimo ye yize unahondangana nayo kushi lia tangwa.

¹⁰ Cheswacho moko je mawana kulinga, hilinga ni ngolo je jeswe, mu Shiole kuze unayi kukushi milimo, hanji manyonga, hanji chinyingi, hanji mana.

¹¹ Chikwo nawa, namwene kushi lia tangwa, mukwa tambu keshi kukumba mu Chizomboka; mukwa tachi keshi kukumba mu jita; mukwa mana keshi kuzuka kulia; mukwa yinyingi keshi kuzuka upite; mukwa utotombo keshi kumulemesa, alioze chakwawana nikulita ni tangwa liacho; chakupwa chipwila.

¹² Mutu keshi kunyingika mwaka wenyi. Ngwe yishi aze akufwila mu wanda upi; ngwe tujila aze makwachika mu kambwila, chocho ana ja atu kakukwachika ha mwaka upi muze muawana susumuku.

¹³ Hinamona nawa chilweza chino cha mana kushi lia tangwa, mba kuli yami chapwile chinene.

¹⁴ Kwapwile chihunda chikepe ni malunga jamo hi anji ko. Umwe mwanangana munene wejile kulimika nacho; wachiselekele, nikutunga yuma yinene ya kuchihombwesa.

¹⁵ Alioze awanyinemo umwe mukwa mana chiswale; aye ni mana jenyi wapulwile chihunda, hindu niumwe Wewulukile mwe chiswale.

¹⁶ Alioze ami ngunamono ngwe mana kanahiana ngolo, chipwe alelesele mana ja chiswale ni kupangula maliji jenyi.

¹⁷ Maliji ja mukwa mana, nyi maapanjika ni kuhola, mahiana kukalumioka cha mukwa kuyula hakachi ka yihepuke.

¹⁸ Mana makumba yitwa ya jita alioze chivulumunyi umuwika matambula yuma yipema yinji.