Longeshi 8 - MUKANDA USANDU WA ZAMBI 1975

¹ Iya malifwa ngwe mutu mukwa mana? Iyamanyingika ulumbunwiso wa chikuma? Mana ja mutu kakutemwisa meso jenyi, ni kukala cha meso jenyi kuchakwalu muka.

² Ngunakulongesa; funga shimbi ya mwanangana, mumu ha mukunda wa shingo lia Zambi.

³ Kanda utuhuka kumeso jenyi fuji fuji; kanda unyongonona mu chuma chipi mumu kakulinga cheswacho chamuwahila.

⁴ Mumu liji lia mwanangana tachi likwete. Iya mamuhula ngwo, Yika unalingi?

⁵ Mweswe mafunga shimbi kechi kumona chipi, mba mbunge ya mukwa mana kuyakunyingika ngwe chatamba kulinga ni ola ya kulinga.

⁶ Mumu chuma cheswe mapala chili ni ola ni chili ni chize chatamba kuchilinga chipwe lamba lia mutu liakumushata chikolo,

⁷ mumu kanyingikine chize muchiza kupwa mba iya mahasa kumulweza ndako yacho?

⁸ Niumwe mutu uli ni tachi ja kuyula Chizulie akakwike Chizulie. Niumwe uli ni tachi ja kuyula tangwa lia kufwa, mba mu jita yize niumwe matukotola; chipwe mukwa kulinga ungulungulu kechi kuhasa kulipulula ni ungulungulu wenyi.

⁹ Yuma yino yeswe hinamona; hinasa mbunge yami kunyingika yitanga yeswe akuyilinga kushi lia tangwa. Mwaka kuuli muze umwe mutu mapwa ni chiyulo helu lia mukwo kumupinjisa.

¹⁰ Chikwo nawa namwene chize mafunda yingulungulu; o yaheta ku fuka; alioze akwa kulinga yipema yakatuka kwe kuma kusandu ni mu chihunda yaavulama. Chino nawa chuma chamokomoko.

¹¹ Mbunge ja ana ja atu hanajise liakulu muchima lio kulinga chipi mumu kafwetesele nikawashi upatwilo wa chitanga chipi.

¹² Chipwe chivulumunyi malinga chipi kulakaji lia yisuho ni kusuhisa matangwa jenyi, hindu ngunanyingika pundu waze mavwila woma Zambi kumakawaha, ngwami waze akuvwila woma kumeso jenyi.

¹³ Alioze yingulungulu kechi kawaha; aye kechi kasuhisa matangwa jenyi; kumapwa ngwe Chizulie mumu kevwile woma kumeso ja Zambi.

¹⁴ Chimwe chuma chamokomoko chakulingiwa hano hashi; kwali akwa ululi amwe mba yize yatamba kachi kuwana yingulungulu muyiawana ayo; ni kwali amwe yingulungulu mba yize yatamba kachi kuwana akwa ululi muyiawana ayo. Yingwamba ngwami chino nawa chapwa chamokomoko.

¹⁵ Henaho nalemesene uwahililo, mumu mutu keshi ni chuma chikwo chipema kushi lia tangwa shina kulia, ni kunwa, ni kuwahilila, mumu chino mahasa kutwama nacho mu kukilikita chenyi matangwa eswe a mwono wenyi aze Zambi mamwaha kushi lia tangwa.

¹⁶ Muze nasele mbunge yami kunyingika mana, ni kumona yitanga yize analingi hashi (chize atu keshi kumona tulo chipwe ha mwalwa chipwe ha ufuku;)

¹⁷ henaho namwene kulinga cheswe cha Zambi chize mutu kechi kuhasa kusa chinyingi milimo yize akulinga kushi lia tangwa. Chipwe mutu mahondangana nikufupa, hindu kechi kuchisa chinyingi. Chipwe mukwa mana mamba ngwenyi, Ami ngunanyingika, hindu kechi kuchisa chinyingi.