Longeshi 7 - MUKANDA USANDU WA ZAMBI 1975

¹ Jina lipema Unapeme kuhiana yitumbo ya maji ya ndando yilemu. Tangwa lia kufwa liahiana tangwa lia kusemuka.

² Hapwa kuya ku zuwo lia masoji, hi zuwo lia muzumbu ko. Mumu kufwa, songo lia atu eswe, ni akwa mwono machisa ku mbunge.

³ Chinyengo chapema kuhiana kuseha, mumu chinyengo cha meso kuchakuwahisa mbunge.

⁴ Mbunge ja mana jili mu zuwo lia masoji, alioze mbunge ja uhepuke jili mu zuwo lia kuheha.

⁵ Kwivwa kufumba cha akwa mana chapema kuhiana kwivwa miaso ya yihepuke.

⁶ Mumu kuseha cha yihepuke chapwa ngwe kulengenya cha mikalale kushi lia ndeho. Chino nawa chapwa chamokomoko.

⁷ Pundu kufwetesa naye chakwalumuna mukwa mana akapwe chihepuke, ni chindo kuyakulumbula yinyingi.

⁸ Songo lia chuma chapema kuhiana uputukilo wacho, ni mukwa kulihumikiza mu mbunge kapema kuhiana mukwa kulengumuka mu mbunge.

⁹ Kanda ulipupula mu mbunge kutenuka; mumu utenu kuwatwama mu mbunge ja yihepuke.

¹⁰ Kanda wamba ngwe, Kuchi te matangwa a kunyima apemene kuhiana matangwa ano? Kwahulile ni mana ha kutwala ku chuma chino.

¹¹ Mana kanapeme ngwe chihinga; pundu ahiana kupema kuli waze anamono mwalwa.

¹² Mumu mana kapwa chuma cha kutufunga chizechene ngwe mbongo kujakutufunga. Kuwaha cha yinyingi ngwami, Mana kakufunga mwono wa yoze uli no.

¹³ Zewula kanawa yitanga ya Zambi. Iya mahasa kululamisa chuma nyi iye hanachihengesa?

¹⁴ Wahilila ha tangwa lia kuyuka; Zewula kanawa ha tangwa lia luyinda. Zambi halinga limwe hamuwika ni likwo hanga mutu kechi kasa chinyingi chimwe chuma muchiza kupwa muze iye haya kulu.

¹⁵ Chino cheswe hinamona mu matangwa jami amokomoko; kwali mukwa ululi yoze manonga mu ululi wenyi, ni kwali chingulungulu yoze masuhisa matangwa jenyi mu yilinga yenyi yipi.

¹⁶ Kanda upwa mukwa ululi naye; kanda ulipwisa mukwa mana naye: kuchi te mulionwona?

¹⁷ Kanda upwa chingulungulu naye; kanda upwa chihepuke. Kuchi te muofwa shimbu mwaka we kanda wiza?

¹⁸ Chipema ukwate chino, alioze kanda wecha chize, mumu mukwa kuvwila woma Zambi matusuka ku yuma yino yeswe.

¹⁹ Mana kapwa tachi kuli mukwa mana kuhiana kumi lia akwa kuyula waze mapwa mu chihunda.

²⁰ Pundu kuheshi mutu niumwe hano hashi yoze kakulinga chipema ni kuvulumuna ka.

²¹ Chikwo nawa, kanda upanjika maliji eswe aze akwamba kuchina muwivwa ngamba ye kanakutuku,

²² mumu kanji chipwe mbunge ya yena mwene yinanyingika yena mwene nawa hiwatuka akwo.

²³ Chino cheswe hinasa chinyingi ni mana. Nambile ngwami, Mungulinga ni mana alioze chapwile kusuku ni yami.

²⁴ Chize chapwa kusuku ni chinajotoka chikolo kuhiana, iya mahasa kuchinyingika?

²⁵ Nalumukine ni kusela mbunge yami kunyingika ni kulungula ni kufupa mana ni ulumbunwiso wa yuma; ngukanyingike ngwami ungulungulu wapwa uhepuke ni uhepuke wapwa uzaluke;

²⁶ kumanyi hinawana chuma chasasa kuhiana ufwe. Ngwami, pwo yoze mbunge yenyi yapwa miheto ni manda, moko jenyi apwa ngwe kúli. Mutu yoze Zambi kanamumono kuwaha matusuka kuli iye alioze chivulumunyi makwachika.

²⁷ Chuma chino nawanyine, kanambe mwe Chilumbununyi, ha kweseka chuma ni chikwo hanga chingulumbunuke,

²⁸ hindu mbunge yami yinachifupu, kanda nguchiwana ngwami, Hinawana lunga umuwika hakachi ka kanunu; alioze pwo umuwika hakachi ka kanunu Chamuwanyine.

²⁹ Chino wika nawana, Zambi walingile mutu mukwa ululi alioze hataka yuma yinji.