Longeshi 6 - MUKANDA USANDU WA ZAMBI 1975

¹ Chuma chipi hinamona nawa kushi lia tangwa; chuma chilemu hali atu;

² umwe mutu Zambi hamwaha upite, ni yikumba, ni ulemu. Kahonene nichimwe cha yize yeswe mbunge yenyi yinazange. Hindu Zambi kamuhele chiyulo cha kuhako. Alioze umwe weka mayilia. Chino chapwa nawa chamokomoko—te musongo upi.

³ Chipwe mutu masema kulakaji lia ana, akatwame miaka yinji, matangwa a miaka yenyi oke hindu mbunge yenyi kuyayukile ni yipema ni kamufunjile kanawa, ami namona ngwe mwana wa kuselumuna Shinaho.

⁴ Mumu chino chakwiza chizechene, chakuya nawa ni milima, ni jina liacho liafukiwa ni milima.

⁵ Chikwo nawa, kuchamwene mwalwa chipwe kuunyingika. Chino chahwima; yoze mukwo ka,

⁶ chipwe matwama ndo tununu aali a miaka, nyi kayukile ni chuma chipema. Te kayile eswe kuma kumuwika?

⁷ Milimo yeswe ya mutu kuyapwa ya kusa mu kanwa lienyi; hindu kakuchile.

⁸ Mukwa mana kali ni chimwe chuma chihepuke keshi nacho? Chiswale chika ali nacho, chipwe kananyingika kwenda kumeso ja akwa mwono?

⁹ Kuzangazanga naye kuchayukishile; Shinaho kumona ni meso. Chino nawa chapwa chamokomoko ngwe kuhanga ye fuji.

¹⁰ Cheswacho chiliko, hanachiluku jina kulu. Mutu kanamunyingika chize apwa; kahashile kulimika ni yoze wamukumba ni tachi.

¹¹ Se yuma yinji yiliko ya kufujisa wika, mutu kuchi mafumbuka nayo?

¹² Iya manyingika chize chapemena mutu mu mwono wenyi, matangwa eswe a mwono wenyi wamokomoko uze kakupalikisa ngwe Chizulie? Iya mahasa kulweza mutu chize muchipwa kushi lia tangwa muze iye hanayi?