Longeshi 5 - MUKANDA USANDU WA ZAMBI 1975

¹ Funga kulu lie muze muoya ku zuwo lia Zambi; mumu kukundama ukevwe acho Shinaho; kuhana yitapo ya yihepuke achi kunyima, mumu o kanyingikine chipi chize analingi.

² Kanda ulipupula ni kanwa. Mbunge ye kanda yilipupula kwamba nichimwe kumeso ja Zambi. Mumu Zambi aye mwilu ali, ni yena uli hashi, kashika maliji je kanda apwa anji.

³ Mumu chilota chakwiza ni kukilikita chinji, ni chikuma cha chihepuke chakwiza ni maliji anji.

⁴ Nyi mulilakenya chilakenyo kuli Zambi, kanda ukokoloka ha kuchifweta mumu keshi kuwahilila ni yihepuke. Fweta chize hiwalakenya.

⁵ Kulakenya ni kufweta ka achi chipi; Shinaho kanda ulakenya nichimwe.

⁶ Kanda utayiza kanwa lie kuvulumwisa mujimba we. Kanda wamba kumeso ja mungelo ngwe, Napiasukile. Ha chikuma chika Zambi matenuka ni maliji je nikwonwona milimo ya moko je.

⁷ Chino cheswe chineza mumu ha kwokesa yilota, ni yuma yamokomoko, ni maliji anji. Ena vwila woma Zambi.

⁸ Nyi mumona kupinjisa yiswale, ni mu chifuchi chimwe kanalingi upupilo wa kuhonesa upatwilo ni ululi, kanda chikushima. Mumu umwe kwali helu akwa kunangama; kwali umwe helu lio.

⁹ Chikwo nawa kufumbuka cha mavu cha mbala cha eswe; chipwe mwanangana kakufuliela minda.

¹⁰ Yoze unase mbunge ku prata kechi kuyuka ni prata; yoze unase mbunge yenyi ku kwoka cha upite kechi kuyuka ni kulumbama. Chino nawa chapwa chamokomoko.

¹¹ Muze upite hiwoka, ni akwa kuulia moka nawa. Kuwaha chika muchipwa kuli mwenyawo shina kuumona wika ni meso jenyi?

¹² Tulo twa mukwa kuhondangana kuwaho chipwe malia yikepe hanji yinji, alioze pichi kahashile kuya tulo mumu ha kukuta.

¹³ Chuma chipi chikolo namona kushi lia tangwa ngwami, Umwe kupita upite wa kumulemeka.

¹⁴ Upite uno muujimuka hamwe homa ha kufulwa. Nyi hasema mwana upite wakuhi wa kusa mu kwoko lienyi.

¹⁵ Chiwatuhukile mu jimo lia naye uselesele chocho nawa maya; kechi kumbata chimwe cha ku milimo yenyi, chize mambata mu kwoko lienyi.

¹⁶ Chino nawa chipi chikolo; mu yuma yeswe maya chizechene ngwe wejile mba kufumbuka chika ali nacho ha kuhondanganyina ye fuji yamokomoko?

¹⁷ Matangwa jenyi eswe kanali mu milima nawa ni kulifwita ni kuyiza ni ufwatulo.

¹⁸ Chize namona kupema ni kuwaha ngwami, Mutu akalie, akanwe, akawahe ni yipema ya kuhondangana chenyi cheswe chize anahondangana nacho kushi lia tangwa matangwa eswe a mwono uze Zambi hamwaha. Chihanda chenyi chenacho.

¹⁹ Mutu mweswe yoze Zambi hamwaha upite ni yikumba, nyi hamwaha chiyulo cha kuhako, ni kutambula chihanda chenyi, ni kuwaha mu kuhondangana chenyi, acho chapwa chawana cha kuli Zambi.

²⁰ Kechi kwiwuluka chikolo matangwa a mwono wenyi mumu Zambi kakumulingisa ni chiseke mu mbunge yenyi.