Longeshi 4 - MUKANDA USANDU WA ZAMBI 1975

¹ Mba yinguhiluka yingumona yuma yeswe ya kupinjisa kakuyilinga kushi lia tangwa. Masoji ja waze anaapinjisa ni keshi ni akwa kwalembejeka. Akwa kupinjisa o kali ni tachi hamwe no, hindu kukushi akwa kulembejeka.

² Kashika nalemesene afu waze hanafu kulu, chalemesene waze achili ni mwono.

³ Ewa nalemesene yoze kanda apwa kuhiana wano eswe ni aali mumu kanda achimona yitanga yipi yize akulinga kushi lia tangwa.

⁴ Namwene kuhondangana cheswe ni utotombo weswe ni ha chino mutu kakumuvwila ukwa kuli akwo. Chino nawa chapwa chamokomoko ngwe kuhanga ye fuji.

⁵ Chihepuke masepekenya moko jenyi, malia musunya wenyi mwene.

⁶ Kwoko limuwika lia kuhwima hapwa, moko aali a kuhondangana ni kuhanga ye fuji, kunyima.

⁷ Henaho yinguhiluka yingumona mushi lia tangwa yeswe yamokomoko.

⁸ Kwali umwe wa ukawenyi keshi ni mukwo. Keshi mwana, keshi yayo hindu kuhondangana chenyi cheswe kuchishi kuhwa, ni meso jenyi keshi kuyuka ni upite. Ngwenyi, Iya ngunahondanganyina nikuhonesa mbunge yami yuma yipema? Chino nawa chamokomoko; kukilikita cha yikatalo.

⁹ Shinaho aali, hi umuwika ko mumu kakulambula kwononona chipema ha kuhondangana cho.

¹⁰ Mumu nyi umwe malimbuka, mukwo mazundula mukwo. Alioze welo hali yoze mapwa ukawenyi muze malimbuka, keshi ni mukwo yoze mamuzundula.

¹¹ Chikwo nawa nyi aali mapomba hamuwika, mawana chivukuminya; alioze mutu kulihi mawana chivukuminya ukawenyi?

¹² Nyi mutu makumba yoze uli ukawenyi, hindu aali mahasa kulimika nenyi. Muhipu wa mbanda mutatu kuuchi kupatuka nikawashi.

¹³ Mukweze chiswale ni mana Shinaho, mwanangana mukulwana kunyima nyi kapwa chihepuke keshi kutá kumulongesa nawa.

¹⁴ Mumu watuhukile mu zuwo lia ususu akapwe mwanangana; chipwe mu wanangana wasemukine chiswale.

¹⁵ Namwene akwa mwono eswe waze anende kushi lia tangwa hamuwika ni mukweze wamuchiali yoze te mamana kuma kwenyi.

¹⁶ Atu aze maayula anji, kechi kahwa ha kwaalula; hindu waze mamukaula kechi kuwahilila muli iye. Achi cheswe chamokomoko wate, ngwe kuhanga ye fuji.