Longeshi 3 - MUKANDA USANDU WA ZAMBI 1975

¹ Chuma cheswe kangonde kacho Chikwete, ni chikuma cheswe kushi lia malilu chili ni tangwa liacho:

² tangwa lia kusemuka, ni tangwa lia kufwa; tangwa lia kutumba, ni tangwa lia kufukula chize atumbile;

³ tangwa lia kushiha, ni tangwa lia kuwuka; tangwa lia kupuzula, ni tangwa lia kutunga;

⁴ tangwa lia kulila, ni tangwa lia kuseha; tangwa lia kulinyenga, ni tangwa lia kuhangana;

⁵ tangwa lia kumbila mawe, ni tangwa lia kukungulula mawe; tangwa lia kulikangayika, ni tangwa lia kulitwamina;

⁶ tangwa lia kufupa, ni tangwa lia kutokesa; tangwa lia kufunga chuma, ni tangwa lia kuchimbila;

⁷ tangwa lia kutanuna, ni tangwa lia kutonga; tangwa lia kuhola, ni tangwa lia kuhanjika;

⁸ tangwa lia kuzanga, ni tangwa lia kuvwila kole; tangwa lia jita, ni tangwa lia sambukila.

⁹ Mukwa kuhondangana kufumbuka chika ali nacho ku kuhondangana chenyi?

¹⁰ Hinamona milimo yize Zambi hanayikunjika kuli ana ja atu akalindangane nayo.

¹¹ Aye hanalingi chuma cheswe chipema ha tangwa liacho; chikwo nawa hanase ye miaka yeswe mu mbunge jo chocho mutu kahashile kusa chinyingi milimo yize Zambi hanalingi chize ku uputukilo ndo ku songo.

¹² Hali ayo chuma chikwo chahiana kupema chakuhi shina kuwahilila ni kulinga yipema miaka yeswe ya mwono wo.

¹³ Chikwo nawa nyi mutu malia, manwa nikuyuka ni yipema ya kuhondangana chenyi cheswe, acho chawana cha kuli Zambi.

¹⁴ Ngunanyingika cheswacho Zambi malinga muchipwa cha mutolo. Kechi kuhasa kuwezako chuma, chipwe kechi kuhasa kutepululako chuma. Zambi hanachilingi hanga atu akevwe woma kumeso jenyi.

¹⁵ Chize kuchili te chapwile kulu; ni chize muchiza kupwa hichapwa kulu. Zambi kakufupa cheka nawa chize hichapalika.

¹⁶ Namwene nawa kushi lia tangwa ha chisopelo ungulungulu uliko; kuma kwa ululi uhenge uliko.

¹⁷ Yingwamba mu mbunge yami ngwami, Zambi mapatwila akwa ululi ni yingulungulu, mumu kulili tangwa ha kupala cheswe ni ha milimo yeswe.

¹⁸ Yingwamba mu mbunge yami ngwami, Chapwa mumu ha mukunda wa ana ja atu hanga Zambi akaeseke, o akanyingike ngwo, Ni yetu nawa tuli ngwe tushitu.

¹⁹ Mumu chize chakuwana ana ja atu chakuwana tushitu nawa; chuma chimuwika chakwawana. Chize umwe kakufwa ni mukwo chocho kakufwa. Eswe kali ni mwiku umuwika ni mutu kakumbile kashitu se yeswe yapwa yamokomoko.

²⁰ Eswe kakuya kuma kumuwika. Eswe ku fufuta akatukile ni eswe mahilukila ku fufuta cheka nawa.

²¹ Iya manyingika nyi Chizulie cha mutu chakuya kwilu, ni Chizulie cha kashitu chakuya kushi ku mavu?

²² Kashika kamwene ngwami, Nichimwe chuma chahiana kupema hali mutu shina akawahe ni yitanga yenyi mumu che chihanda chenyi chenacho. Iya mamuhilwisa nawa akamone chize muchipwa muze te haya?