Longeshi 2 - MUKANDA USANDU WA ZAMBI 1975

¹ Nambile mu mbunge yami ngwami, Tuye tweseke chiseke. Wahilila ni chiseke. Alioze acho nawa chapwile chamokomoko.

² Ha kutwala ku kuseha nambile ngwami, Chinazaluka. Ha kutwala ku chiseke ngwami, Chaka?

³ Nafupile mu mbunge yami chize munguhasa kuliwahisa ku musunya ni vinyu; mbunge yami te yinangusongwela ni mana, chize mungukwata ku uhepuke, ndo mungusa chinyingi chize chinapemena ana ja atu, hanga akachilinge kushi lia malilu matangwa eswe a mwono wo.

⁴ Nalilingilile yitanga yinene; natangile mazuwo; natumbile minda ya uva;

⁵ nalilulikilile mande ja yitemo, ni mande ja kwendelamo. Natumbilemo mitondo ya mihuko yeka ni yeka.

⁶ Nalingile yitende ya meya ngukahinjile usaki kuze alimine mitondo ni meya jamo;

⁷ nalanjile tupinji twa malunga ni twa mapwo; napwile ni ngamba a kusema mu zuwo liami. Napwile ni upite wunji wa ngombe, ni mapanga ni pembe kuhiana waze eswe angutetekelele mu Yerusaleme.

⁸ Napichile nawa prata ni oru, ni upite uze wapwa wa mianangana ni wa ku yifuchi. Nanehene njimba ja malunga ni a mapwo, ni mapwo anji chikolo aze akuwahisa mbunge ya lunga.

⁹ Chocho napwile munene, nikuliwezela kuhiana waze eswe angutetekelele mu Yerusaleme. Chikwo nawa mana jami katepulukile.

¹⁰ Cheswacho meso jami azangile chahonene. Chaminyine mbunge yami chiseke nichimwe mumu mbunge yami yawahilila mumu ha yitanga yami yeswe. Acho chapwile fweto yami ya ku milimo yami yeswe.

¹¹ Mba natalile ha milimo yami yeswe yize moko jami halinga, ni ha kuhondangana chami cheswe, kumanyi cheswe chapwile chamokomoko ngwe kuhanga ye fuji. Nichimwe chuma cha kufumbuka kuchishiko kushi lia tangwa.

¹² Kashika nalumukine kutala mana, ni uzaluke ni uhepuke, mumu yoze makaula mwanangana chika malinga ndo kwimbulula chize hanalingi kulu?

¹³ Mba namwene pundu mana kanahiana uhepuke, ngwe pangu linahiana milima.

¹⁴ Mukwa mana kali ni meso mu mutwe wenyi, alioze chihepuke kakwenda mu milima. Hindu namwene ngwe chuma chimuwika chakwawana eswe.

¹⁵ Mba nambile mu mbunge yami ngwami, Chize chakuwana chihepuke muchinguwana yami, kashika mana jami kuchi apwa? Kashika nambile mu mbunge yami ngwami, Chino nawa chapwa chamokomoko.

¹⁶ Mumu mavulama mukwa mana chizechene ngwe kakuvulama chihepuke ndo ku miaka, se ku miaka ya kulutwe yuma yeswe makayivulama. Kuma, mukwa mana kakufwa chizechene ngwe chihepuke kakufwa.

¹⁷ Chocho mwono wangupihilile mumu milimo yeswe akulinga kushi lia tangwa kuli yami yapwa ya kulifwita nayo wika, se yeswe yapwa yamokomoko ngwe kuhanga ye fuji.

¹⁸ Mba milimo yeswe nahondanganyine kushi lia tangwa yangupihilile se munguyihichika kuli mutu yoze mangukaula.

¹⁹ Iya kananyingika nyi mapwa mukwa mana nyi chihepuke? Hindu makayula milimo yami yeswe yize nahondanganyine nikusolola mana jami kushi lia tangwa. Chino nawa chapwa chamokomoko.

²⁰ Kashika nalumukine ngukatalikise mbunge yami kuze kutalatala chakuhi ha kutwala ku milimo yami yeswe yize nahondanganyine kushi lia tangwa.

²¹ Mumu kwali umwe mahondangana ni mana, ni yinyingi, ni utotombo hindu mahichika yuma yenyi yikapwe chihinga cha umwe yoze kahondanganyineko. Chino nawa chamokomoko ni chipi chikolo.

²² Mutu chika mafumbuka ku kuhondangana chenyi cheswe, ni kulifwita cha mbunge yenyi chize ahondanganyine nacho kushi lia tangwa?

²³ Matangwa jenyi eswe kapwa chinyengo wika; ni kuhondangana chenyi chapwa kulifwita. Chipwe ha ufuku mbunge yenyi kuyahwimine. Chino nawa chapwa chamokomoko.

²⁴ Nyi mutu malia, manwa, mawahisa mbunge yenyi ni upeme wa milimo yenyi, nichimwe chikwo cha kuwaha chakuhi. Chino nawa nachimwene cha ku kwoko lia Zambi.

²⁵ Mumu iya mahasa kunguhiana yami ha kulia ni ha kuwaha?

²⁶ Mumu kuli yoze wamuwahila Zambi mahana mana, ni yinyingi, ni uwahililo; alioze kuli chivulumunyi mahana milimo, akahondangane akalumbike yuma ya kuhana kuli yoze wapemena Zambi. Chino nawa chapwa chamokomoko ngwe kuhanga ye fuji.