Longeshi 12 - MUKANDA USANDU WA ZAMBI 1975

¹ Iwuluka Tangi ye ha matangwa ja ukweze we, shimbu matangwa api kandeza, hanji miaka yize muyiza muze muwamba ngwe, Chawahililile nayo.

² Shimbu tangwa ni pangu, ni kakweji ni matongonoshi kanda yilá ni malelwa kanda ahiluka kulutwe lia vula.

³ Ha tangwa lize muze akwa kufunga zuwo kanachikima, ni akwa tachi kanahetama, ni akwa kutwa hanalitwamina mumu hatepuluka, ni akwa kutala ku njanela kanamono chitalawili,

⁴ ni mapito ku tapalo hanájila, muze zungo lia kutwa kulishi tachi, ni mutu makatuka ha liji lia kajila, ni ana-mapwo eswe a miaso hanakehuluka,

⁵ mevwa woma nawa wa haze hasuku, yuma ya mwongo yili mu jila; mutondo wa amendoa unatemuna yitemo, ni pasu kapwa mulemu, chipwe kuzanga chahona, mumu mutu kanayi kuma kwenyi kwa mutolo ni akwa kulila kanende mu matapalo.

⁶ Shimbu kanda apatula mujipa wa prata, shimbu musenge wa oru kanda ufwa, shimbu mulondo kanda ufwa ku fuji lia meya, hanji roda kanda yifwa ku Chitende,

⁷ mba fufuta muyihiluka ku mavu chizechene yapwile, ni Chizulie muchihiluka kuli Zambi yoze wachihanyine.

⁸ Chamokomoko pundu pundu! Chilumbununyi kanambe ngwenyi, Yeswe yapwa yamokomoko!

⁹ Chilumbununyi wapwile mukwa mana, alioze chikwo nawa walongesele mana kuli e atu, nikupezalisa, ni kulilongesa, ni kululika yishima ni malinjekela anji.

¹⁰ Chilumbununyi wafupile maliji apema; wasonekene ni ululi maliji amwenemwene.

¹¹ Yambo ya akwa mana kuyapwa ngwe misongolwela mba yishima ya kukungulula yapwa ngwe mbambo ja kukolesa. Yeswe yinakatuka kuli Kafunga umuwika.

¹² Mwanami kanyama ni yuma yeswe yahiana yino. Kulinga mikanda kuchishi kuhwa; kulilongesa chinji kuchakukatalisa mujimba.

¹³ Songo lia chikuma; cheswe twachivwa. Vwila woma Zambi, ni kufunga shimbi jenyi, mumu henaho hasulila milimo ya mutu.

¹⁴ Mumu Zambi makokela chitanga cheswe ku usopelo, ni chuma cheswe cha kuhengama, chipwe chipema, chipwe chipi.