Longeshi 11 - MUKANDA USANDU WA ZAMBI 1975

¹ Mbila mbolo ye ha meya, mumu muyiwana nawa kulutwe lia matangwa anji.

² Kunjika chihanda kuli shimbiali hanji nake, mumu kwanyingikine chipi chize muchiza hashi.

³ Nyi malelwa hazala ni vula, mamupukumwina hashi. Nyi mutondo muunungukina ku Sule hanji ku Norte, chiwanunguka chocho muupomba.

⁴ Yoze matala ku fuji kechi kukuwa mbuto; yoze matala ku malelwa kechi kucha.

⁵ Kwanyingikine jila ya ye fuji, chipwe mwana chize akutatuka mu jimo lia kafumba, chocho kwanyingikine milimo ya Zambi mukwa kulinga yuma yeswe.

⁶ Kuwa mbuto ye ha chimene, ni ha chingoloshi kanda ulitwamina, mumu kwanyingikine yize muyiwaha, shina yize nyi shina yino, hanji jeswe ni jiali mujipema chimuwika.

⁷ Pangu linapeme, mba chawahila meso muze mamona tangwa.

⁸ Mumu nyi mutu matwama ni mwono miaka yinji awahilile mu yeswe; alioze ewuluke nawa, matangwa a milima anji. Yize yeswe yineza yamokomoko.

⁹ Wahilila mukweze mu ukweze we, mbunge ye yikuwahise ha matangwa a ukweze we; enda mu majila ja mbunge ye, ni mu kutala cha meso je. Alioze nyingika, ha yuma yino yeswe Zambi makusopesa.

¹⁰ Chize kulifwita ku manyonga je; huma yikola ku mujimba we; mu ukweze ni kuvumbuka cha mwono yeswe yapwa yamokomoko.