Longeshi 10 - MUKANDA USANDU WA ZAMBI 1975

¹ Jiji afu kakunukisa vumba lipi yitumbo ya lupembo mupema; chocho uhepuke likepe kuwakukumba mana ni ulemu.

² Mbunge ya mukwa mana yakumukokela ku chindume, alioze mbunge ya chihepuke yakumukokela ku chimeso.

³ Chipwe ha kwenda mu jila, chihepuke kanahono mana; kakulwcza eswe ngwenyi, Nguli chihepuke.

⁴ Chipwe utenu wa mukwa kuyula muukukasumukina, kanda ukatuka ha chitwamo che; mumu ulemeso kuwakukukila milonga yinene.

⁵ Kuchili chuma chipi hinamona kushi lia tangwa. Chapwa ngwe chinakatuka kuli mukwa kuyula:

⁶ kanji uhepuke wakutwama mu yitwamo ya ulemu shimbu pichi matwama kushi.

⁷ Hinamona tupinji mendela hali tuvwalu shimbu mianangana menda hashi ngwe tupinji.

⁸ Mukwa kufula wumbu malimbukilamo; kapela masuma mukwa kulokola yishimi.

⁹ Mukwa kupula mawe malemewa no; mukwa kupula mungowa mawanako Utoji.

¹⁰ Nyi njimbu kuyambukile ni kazangile kuyihela chatamba kuweza tachi alioze mana makwasa mutu kukumba.

¹¹ Chamokomoko kuhombwesa kapela nyi hahanga kusuma shimbu kanda.

¹² Maliji a mu kanwa lia mukwa mana kakumukokela vumbi, alioze mivumbo va chihepuke kuyakumwonwona.

¹³ Uputukilo wa maliji a mu kanwa lienyi uhepuke; songo lia pande jenyi uzaluke wa ungulungulu.

¹⁴ Chihepuke kakwokesa maliji alioze niumwe kananyingika yize yineza. Mba iya manyingika yize muyimukaula?

¹⁵ Kuhondangana cha chihepuke chakumuhongesa, chocho kanyingikine jila ya kuya ku chihunda.

¹⁶ Lamba mulipwa kuli yena chifuchi muze mwanangana we kanuke, ni muze alemu je kakulinga chiteleka ha chimenemene.

¹⁷ Alioze yena chifuchi muwaha nyi mwanangana we kapwa mwana wa enya chifuchi, ni alemu je malinga chiteleka ha ola yacho hanga atakame, hi ha kuzengewa ko.

¹⁸ Fulumba liakuzembamina mumu ha uleya; zuwo liakuhita mumu ha kuhonga.

¹⁹ Mbolo kakuyitenga ha kuseha, ni vinyu kuyakuwahisa mwono, alioze mbongo kujakukumbulula yeswe.

²⁰ Chipwe mu manyonga je kanda utuka mwanangana; chipwe mu chipatulo cha kupomba kanda utuka pichi; mumu kajila wa mu tetela mambata liji lie, hanji umwe mukwa mapulwa mambulula je pande.