Longeshi 1 - MUKANDA USANDU WA ZAMBI 1975

¹ E maliji a Chilumbununyi mwana David mwanangana mu Yerusaleme.

² Chamokomoko pundu pundu! Chilumbununyi ngwenyi, Chamokomoko pundu pundu, yeswe yapwa yamokomoko!

³ Mutu yika akufumbula ku milimo yeswe yize akuhondangana nayo mushi lia tangwa?

⁴ Chisemuko chakuya, chisemuko chikwo chakwiza, alioze hashi hasala chizechene ha miaka.

⁵ Tangwa liakuvumbuka, tangwa liakutaka; liakutambukila kuze liakuvumbuka nawa.

⁶ Fuji yakutalikisa ku Sule, yakujinga ndo ku Norte; yakulijinga jingié, mba ha kujinga chayo yakuhiluka.

⁷ Yitwetwe yeswe kuyakunjila mu kalunga-lwiji hindu kalunga-lwiji kazalile; kuze yitwetwe yakuya kwenako yakuya nawa.

⁸ Yuma yeswe yazala tò ni yikatalo; mutu kechi kuhasa kuchilumbununa. Liso kulichi kuyuka ha kutala; twitwi kulichi kukuta ha kwivwa.

⁹ Chize chapwile, muchiza kupwa nawa; chize halinga, meza kuchilinga nawa; chuma chaha kuchishiko kushi lia tangwa.

¹⁰ Chimwe chuma chiliko atu mahasa kuchi-tongola ngwo, Tala chuma chaha? Chapwile kulu ku miakulwila ya kushi.

¹¹ Atu keshi kwiwuluka yuma yize hiyapalika ni yuma yize muyiza kechi kuyiwuluka kuli waze meza kwiza.

¹² Ami Chilumbununyi napwile mwanangana wa A-Izalele mu Yerusaleme,

¹³ mba nasele mbunge yami kufupa ni kupolongoza ni mana yuma yeswe akulinga mushi lia malilu. Chize Zambi hakunjika kuli ana ja atu kuhondangana nacho, kumanyi chuma cha chinyengo wika.

¹⁴ Hinamona milimo yeswe akuyilinga mushi lia tangwa; yeswe yamokomoko ya kuhanga ye fuji.

¹⁵ Chize chahenga kechi kuhasa kuchilulamisa; chize chahona kechi kuhasa kuchalula.

¹⁶ Nalishimwinyine ni mbunge ya yami mwene ngwami, Hinalilongesa mana anji kuhiana waze eswe angutetekelele mu Yerusaleme; mbunge yami hiyalijilila ni mana ni yinyingi.

¹⁷ Kashika nasele mbunge yami kunyingika mana ni kunyingika uzaluke ni uhepuke nawa. Alioze namwene pundu chino nawa chapwa ngwe kuhanga ye fuji.

¹⁸ Mumu mana anji kakufwichisa mutu; ni yoze mokesa yinyingi mokesa yinyengo.