Kwalula 9 - MUKANDA USANDU WA ZAMBI 1975

¹ Ha kakweji mutangu wa mwaka wamuchiali muze te o hakatuka ku chifuchi cha Engitu, Yehova yamba kuli Mose mu puya ya Sinai ngwenyi,

² A-Izalele akafunge che Chizomboka ha mwaka wacho wa kutongola.

³ Ha tangwa kumi ni liamuchiwana lia kakweji yono, ha chingoloshi nukachifunge ha mwaka wacho wa kutongola; nikulita ni yiyulo yeswe yacho ni shimbi jeswe jacho, nukachifunge.

⁴ Mose yamba kuli A-Izalele akafunge che Chizomboka.

⁵ O yafunga che Chizomboka ha kakweji mutangu, ha tangwa kumi ni liamuchiwana lia mwe kakweji, ha chingoloshi, mu puya ya Sinai; nikulita ni yeswe Yehova ambile Mose, chocho alingile A-Izalele.

⁶ Kwapwile amwe malunga halichisa ni mujimba wa mufu, chocho ha lize tangwa kahashile kufunga Chizomboka. Yaheta lize tangwa kumeso ja Mose ni kumeso ja Arone.

⁷ Aze malunga yamba kuli iye ngwo, Yetu twalichisa ku mujimba wa mufu; yika te katutayijile kama kulambula mulambu wa Yehova ha mwaka wacho wa kutongola, mukachi ka A-Izalele?

⁸ Mose yamba kuli ayo ngwenyi, Hwimenu, ngwivwe chize mamba Yehova ha kutwala kuli yenu.

⁹ Yehova yamba kuli Mose ngwenyi,

¹⁰ Amba kuli A-Izalele ngwe, Nyi mutu umwe wa yenu, hanji wa ku yisemuko yenu, malichisa ni mujimba wa mufu, hanji mapwa kusuku mu wenyi, chipwe chocho iye akafunge Chizomboka cha Yehova.

¹¹ Ha kakweji wamuchiali, ha tangwa kumi ni liamuchiwana, ha chingoloshi, o akachifunge. Akachilie hamwe ni mbolo kuyishi futunwiso ni yilimalima yisasu.

¹² Kanda akahichika nichimwe chacho ndo mu kucha, chipwe kumakuna chimwe chifwaha chacho, ka. Akachifunge nikulita ni chiyulo cheswe cha Chizomboka.

¹³ Alioze yoze unapeme, nyi keshi mu wenyi hindu machina kufunga Chizomboka, akatete yoze mutu hakachi ka atu jenyi, mumu kalambwile mulambu wa Yehova ha mwaka wacho wa kutongola; akambate mulonga wenyi.

¹⁴ Nyi njize matwama hakachi kenu, mazanga kufunga Chizomboka cha Yehova, nikulita ni chiyulo cha Chizomboka, nikulita ni shimbi yacho, chocho alinge. Nukapwe ni chiyulo chimuwika lume, ni hali njize ni hali mukwa chifuchi.

¹⁵ Ha tangwa lize amikine tabernakulu, lelwa yilifuka ye tabernakulu, te mbalaka ya chikungulwila. Ha chingoloshi liapwile ha tabernakulu ndo kwachile. Kulitala ngwe kahia.

¹⁶ Chocho chapwile matangwa eswe. Lie lelwa liafukile tabernakulu ha mwalwa. Kulitala ha ufuku, ngwe kahia.

¹⁷ Muze lie lelwa liakatukile ha mbalaka mba A-Izalele endele. Kuze kwatulile lie lelwa kwenako asele chilombo cho.

¹⁸ Ku liji lia shimbi ya Yehova A-Izalele endele; ku liji lia shimbi ya Yehova asele chilombo cho. Shimbu lieswe lie lelwa liatwamine ha tabernakulu o atwamine mu chilombo.

¹⁹ Muze lelwa liashimbwile matangwa anji ha tabernakulu mba A-Izalele afungile ulayilo wa Yehova, kendele.

²⁰ Nyi hanji lie lelwa liapwile ha tabernakulu matangwa akehe, mba nikulita ni liji lia shimbi ya Yehova atwamine mu chilombo cho. Mba nikulita ni liji lia shimbi ya Yehova endele.

²¹ Nyi hanji lie lelwa liatwamineho chize ku chingoloshi ndo kwachile, mba muze lie lelwa liakatukile ha chimene o endele. Chipwe liatwamineho mwalwa ni ufuku, muze lie lelwa liakatukile mba endele.

²² Chipwe matangwa aali, chipwe kakweji, chipwe mwaka lelwa liashimbwile ha tabernakulu nikutwamaho, A-Izalele atwamine mu chilombo, kendele. Alioze muze lelwa liakatukile mba endele.

²³ Ku liji lia shimbi ya Yehova o asele chilombo cho; ku liji lia shimbi ya Yehova o endele. Afungile ulayilo wa Yehova, ku liji lia shimbi ya Yehova, kwe ku kanwa lia Mose.