Kwalula 8 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Amba kuli Arone ngwe, Muze muwika ndeya, ngwami, je ndeya shimbiali, jikatemukine kulutwe lia chikwachilo cha ndeya.

³ Chocho alingile Arone. Yawika je ndeya jacho hanga jikatemukine kulutwe lia chikwachilo cha ndeya, chizechene ngwe Yehova ambile Mose.

⁴ Che chikwachilo cha kufula ku ora ya kutatula; ndo ku nganda yacho ni ndo ku yitemo yacho, cha milimo ya kutatula. Nikulita ni cheseko chize Yehova alwezele Mose, chocho afulile chikwachilo cha ndeya.

⁵ Yehova yamba kuli Mose ngwenyi,

⁶ Ukachize A-Levi hakachi ka A-Izalele; ukaapemese.

⁷ Chocho ukalinge kuli ayo mukwapemesa. Ukaasapwile meya a kupemesa ku shili. Akatewule ni tewula mijimba yo yeswe. Akakose mazalo jo, akalipemese.

⁸ Mba akakwate chimbembe wa kuji hamwe ni mulambu wenyi wa wunga, te wunga wafufunuka, wa kuchinga ni maji. Ukakwate chimbembe wa kuji mukwo akapwe mulambu ha shili.

⁹ Ukatumbikile A-Levi kulutwe lia mbalaka ya chikungulwila. Ukakunge chikungulwila cheswe cha A-Izalele.

¹⁰ Ukatumbikile A-Levi kumeso ja Yehova. A-Izalele akasayike moko jo hali A-Levi.

¹¹ Arone akahane A-Levi kumeso ja Yehova akapwe mulambu wa kuhungisa wa A-Izalele, hanga akalinge uvumbiko wa Yehova.

¹² A-Levi akasayike moko jo ha mitwe ya yimbembe. Mukwo ukamulambule mulambu ha shili, ni mukwo ukamulambule mulambu wa kulumba kuli Yehova, mukufukila A-Levi shili yo.

¹³ Ukasele A-Levi kumeso ja Arone ni kumeso ja ana jenyi a malunga. Ukaahane kuli Yehova akapwe mulambu wa kuhungisa.

¹⁴ Chocho ukahandunune A-Levi hakachi ka A-Izalele. A-Levi kumakapwa a yami.

¹⁵ Mba kulutwe liacho A-Levi akanjile mu mbalaka ya chikungulwila mukulingilamo uvumbiko. Ukaapemese. Ukaahane kuli Yehova, akapwe mulambu wa kuhungisa.

¹⁶ O ninyami liakulu hakachi ka A-Izalele, mukusalakana tupula-majimo eswe, e atangu kusemuka a kuli A-Izalele eswe, mumu hingunaatambula a yami mwene.

¹⁷ Mumu tupula-majimo eswe hakachi ka A-Izalele a yami, ni a atu ni a yimuna. Yingwasela ku usandu kuli yami mwene ha tangwa lize nalambile tupula-majimo eswe a mu chifuchi cha Engitu.

¹⁸ Hingunatambula A-Levi mukusalakana tupula-majimo eswe hakachi ka A-Izalele.

¹⁹ Mumu hingunahana A-Levi chawana kuli Arone ni kuli ana jenyi a malunga hakachi ka A-Izalele, mukulingila mu mbalaka ya chikungulwila uvumbiko wa A-Izalele, mukufukila A-Izalele shili yo, hanga kukuchi kapwa chilungo mukachi ka A-Izalele, muze A-Izalele makundama kuma kusandu.

²⁰ Chocho alingile Mose ni Arone ni chikungulwila cheswe cha A-Izalele kuli A-Levi; nikulita ni yeswe Yehova ambile Mose ha kutwala kuli A-Levi, chocho alingile A-Izalele kuli ayo.

²¹ A-Levi yalipemesa ku shili. Yakosa mazalo jo. Arone yaahana kumeso ja Yehova, akapwe mulambu wa kuhungisa. Arone yaafukila shili yo mukwapemesa.

²² Kulutwe liacho A-Levi yanjila mu mbalaka ya chikungulwila mu-kulingilamo uvumbiko wo kumeso ja Arone ni kumeso ja ana jenyi a malunga. Chizechene ngwe Yehova ambile Mose ha kutwala kuli A-Levi, chocho alingile kuli ayo.

²³ Yehova yamba kuli Mose ngwenyi,

²⁴ Chikuma cha A-Levi chino: chize kuli akwa makumi aali a miaka ni miaka yitano ndo kuli makulwana, o akanjile mukukwatangana ku milimo ya uvumbiko ya mu mbalaka ya chikungulwila.

²⁵ Muze mapwa ni makumi atano a miaka akalitwamine kukwatangana ku ye milimo ya uvumbiko. Kanda akavumbika nawa.

²⁶ Alioze hamwe ni A-Levi-ni-akwo akalingile mu mbalaka ya chikungulwila mukulayilamo. Kanda akavumbika nichimwe. Chocho ukalinge kuli A-Levi ha kutwala ku ulayilo wo.