Kwalula 7 - MUKANDA USANDU WA ZAMBI 1975

¹ Ha tangwa lize Mose te hamana kumika tabernakulu, hayiwayisa ni maji, hayisela ku usandu hamwe ni yikashi yeswe yayo, ni chilumbilo hamwe ni yikashi yeswe yacho hayiwayisa ni maji, hayisela ku usandu,

² miata a A-Izalele, akwa lutwe a majiko ja atato alambwile milambu yo. Wano miata a ku minyachi yo. Wano ayulile waze a kwalula.

³ O yahetesa milambu yo kumeso ja Yehova, te matemba asambano a kufuka, ni kumi lia ngombe ni ngombe aali. Hali miata aali temba, miata aali temba. Mwata ni mwata ngombe umuwika. Yaatumbikila kulutwe lia tabernakulu.

⁴ Yehova yamba kuli Mose ngwenyi,

⁵ Watambule kuli ayo hanga akalinge no uvumbiko wa mu mbalaka ya chikungulwila. Wahane kuli A-Levi, te kuli mutu mweswe nikulita ni uvumbiko wenyi.

⁶ Mba Mose yatambula e matemba ni e ngombe. Yaahana kuli A-Levi.

⁷ Yahana kuli A-Ngeshone matemba aali ni ngombe awana nikulita ni uvumbiko wo.

⁸ Yahana matemba awana ni ngombe nake kuli A-Merari, nikulita ni uvumbiko wo, wa kuyula kuli Itama, mwana wa sasendote Arone.

⁹ Alioze kuli A-Kohate kahanyine niamwe, mumu uvumbiko wa muma musandu wa mbala wa ayo. O apwile nikumbata yuma yamo ha yipaya yo.

¹⁰ E miata yalambula milambu ya kutumbikila nayo chilumbilo ha tangwa muze achiwayishile ni maji. Kwe kulutwe lia chilumbilo e miata yalambwila milambu yo.

¹¹ Yehova yamba kuli Mose ngwenyi, O akalambule milambu yo, mwata mweswe ha tangwa lienyi. Akatumbikile nayo chilumbilo.

¹² Yoze walambwile mulambu wenyi ha tangwa litangu yono: Nasone, mwana wa Aminandambe, wa ku munyachi wa Yunda.

¹³ Mulambu wenyi wapwile panda limuwika lia prata, pezu yalio ya kulakaji lia shekele ni makumi atatu a shekele; mbasia yimuwika ya prata ya makumi shimbiali a shekele nikulita ni shekele ya muma musandu. Yeswe ni yiali ya tò ya wunga wafufunuka, wa kuchinga ni maji, ukapwe mulambu wa wunga.

¹⁴ Musenge umuwika wa oru wa kumi lia shekele, wa tò wa insensu.

¹⁵ Chimbembe wa kuji umuwika, ni kuji ya panga umuwika, ni kuji ya panga umuwika wa mwaka umuwika, akapwe mulambu wa kulumba.

¹⁶ Kuji ya pembe umuwika akapwe mulambu ha shili.

¹⁷ Yitapo ya milambu ya sambukila yapwile ya ngombe aali, ni kuji a mapanga atano, ni kuji a pembe atano, ni kuji a mapanga atano a mwaka umuwika; uno wapwile mulambu wa Nasone, mwana wa Aminandambe.

¹⁸ Ha tangwa liamuchiali Netanele, mwana wa Zuare, mwata wa A-Isaka, yalambula mulambu.

¹⁹ Yalambula mulambu wenyi, panda limuwika lia prata, pezu yalio ya kulakaji lia shekele ni makumi atatu a shekele; mbasia yimuwika ya prata ya makumi shimbiali a shekele nikulita ni shekele ya muma musandu. Yeswe ni yiali ya tò ya wunga wafufunuka, wa kuchinga ni maji, ukapwe mulambu wa wunga.

²⁰ Musenge umuwika wa oru wa kumi lia shekele, wa tò wa insensu.

²¹ Chimbembe wa kuji umuwika, ni kuji ya panga umuwika, ni kuji ya panga umuwika wa mwaka umuwika, akapwe mulambu wa kulumba.

²² Kuji ya pembe umuwika akapwe mulambu ha shili.

²³ Yitapo ya milambu ya sambukila yapwile ya ngombe aali, ni kuji a mapanga atano, ni kuji a pembe atano, ni kuji a mapanga atano a mwaka umuwika; uno wapwile mulambu wa Netanele, mwana wa Zuare.

²⁴ Ha tangwa liamuchitatu Eliape, mwana wa Helone, mwata wa A-Zapulone.

²⁵ Mulambu wenyi wapwile panda limuwika lia prata, pezu yalio ya kulakaji lia shekele ni makumi atatu a shekele; mbasia yimuwika ya prata ya makumi shimbiali a shekele nikulita ni shekele ya muma musandu. Yeswe ni yiali ya tò ya wunga wafufunuka, wa kuchinga ni maji, ukapwe mulambu wa wunga.

²⁶ Musenge umuwika wa oru wa kumi lia shekele, wa tò wa insensu.

²⁷ Chimbembe wa kuji umuwika, ni kuji ya panga umuwika, ni kuji ya panga umuwika wa mwaka umuwika, akapwe mulambu wa kulumba.

²⁸ Kuji ya pembe umuwika akapwe mulambu ha shili.

²⁹ Yitapo ya milambu ya sambukila yapwile ya ngombe aali, ni kuji a mapanga atano, ni kuji a pembe atano, ni kuji a mapanga atano a mwaka umuwika; uno wapwile mulambu wa Eliape, mwana wa Helone.

³⁰ Ha tangwa liamuchiwana Elizure, mwana wa Sedure, mwata wa A-Rupene.

³¹ Mulambu wenyi wapwile panda limuwika lia prata, pezu yalio ya kulakaji lia shekele ni makumi atatu a shekele; mbasia yimuwika ya prata ya makumi shimbiali a shekele nikulita ni shekele ya muma musandu. Yeswe ni yiali ya tò ya wunga wafufunuka, wa kuchinga ni maji, ukapwe mulambu wa wunga.

³² Musenge umuwika wa oru wa kumi lia shekele, wa tò wa insensu.

³³ Chimbembe wa kuji umuwika, ni kuji ya panga umuwika, ni kuji ya panga umuwika wa mwaka umuwika, akapwe mulambu wa kulumba.

³⁴ Kuji ya pembe umuwika akapwe mulambu ha shili.

³⁵ Yitapo ya milambu ya sambukila yapwile ya ngombe aali, ni kuji a mapanga atano, ni kuji a pembe atano, ni kuji a mapanga atano a mwaka umuwika; uno wapwile mulambu wa Elizure, mwana wa Sedure.

³⁶ Ha tangwa liamuchitano Selumiele, mwana wa Zurisadai, mwata wa A-Simeone.

³⁷ Mulambu wenyi wapwile panda limuwika lia prata, pezu yalio ya kulakaji lia shekele ni makumi atatu a shekele; mbasia yimuwika ya prata ya makumi shimbiali a shekele nikulita ni shekele ya muma musandu. Yeswe ni yiali ya tò ya wunga wafufunuka, wa kuchinga ni maji, ukapwe mulambu wa wunga.

³⁸ Musenge umuwika wa oru wa kumi lia shekele, wa tò wa insensu.

³⁹ Chimbembe wa kuji umuwika, ni kuji ya panga umuwika, ni kuji ya panga umuwika wa mwaka umuwika, akapwe mulambu wa kulumba.

⁴⁰ Kuji ya pembe umuwika akapwe mulambu ha shili.

⁴¹ Yitapo ya milambu ya sambukila yapwile ya ngombe aali, ni kuji a mapanga atano, ni kuji a pembe atano, ni kuji a mapanga atano a mwaka umuwika; uno wapwile mulambu wa Selumiele, mwana wa Zurisadai.

⁴² Ha tangwa liamuchisambano Eliasafe, mwana wa Duele, mwata wa A-Ngate.

⁴³ Mulambu wenyi wapwile panda limuwika lia prata, pezu yalio ya kulakaji lia shekele ni makumi atatu a shekele; mbasia yimuwika ya prata ya makumi shimbiali a shekele nikulita ni shekele ya muma musandu. Yeswe ni yiali ya tò ya wunga wafufunuka, wa kuchinga ni maji, ukapwe mulambu wa wunga.

⁴⁴ Musenge umuwika wa oru wa kumi lia shekele, wa tò wa insensu.

⁴⁵ Chimbembe wa kuji umuwika, ni kuji ya panga umuwika, ni kuji ya panga umuwika wa mwaka umuwika, akapwe mulambu wa kulumba.

⁴⁶ Kuji ya pembe umuwika akapwe mulambu ha shili.

⁴⁷ Yitapo ya milambu ya sambukila yapwile ya ngombe aali, ni kuji a mapanga atano, ni kuji a pembe atano, ni kuji a mapanga atano a mwaka umuwika; uno wapwile mulambu wa Eliasafe, mwana wa Duele.

⁴⁸ Ha tangwa liamuchishimbiali Elisama, mwana wa Amihude, mwata wa A-Eframe.

⁴⁹ Mulambu wenyi wapwile panda limuwika lia prata, pezu yalio ya kulakaji lia shekele ni makumi atatu a shekele; mbasia yimuwika ya prata ya makumi shimbiali a shekele nikulita ni shekele ya muma musandu. Yeswe ni yiali ya tò ya wunga wafufunuka, wa kuchinga ni maji, ukapwe mulambu wa wunga.

⁵⁰ Musenge umuwika wa oru wa kumi lia shekele, wa tò wa insensu.

⁵¹ Chimbembe wa kuji umuwika, ni kuji ya panga umuwika, ni kuji ya panga umuwika wa mwaka umuwika, akapwe mulambu wa kulumba.

⁵² Kuji ya pembe umuwika akapwe mulambu ha shili.

⁵³ Yitapo ya milambu ya sambukila yapwile ya ngombe aali, ni kuji a mapanga atano, ni kuji a pembe atano, ni kuji a mapanga atano a mwaka umuwika; uno wapwile mulambu wa Elisama, mwana wa Amihude.

⁵⁴ Ha tangwa liamuchinake Ngamaliele, mwana wa Pedazure, mwata wa A-Manase.

⁵⁵ Mulambu wenyi wapwile panda limuwika lia prata, pezu yalio ya kulakaji lia shekele ni makumi atatu a shekele; mbasia yimuwika ya prata ya makumi shimbiali a shekele nikulita ni shekele ya muma musandu. Yeswe ni yiali ya tò ya wunga wafufunuka, wa kuchinga ni maji, ukapwe mulambu wa wunga.

⁵⁶ Musenge umuwika wa oru wa kumi lia shekele, wa tò wa insensu.

⁵⁷ Chimbembe wa kuji umuwika, ni kuji ya panga umuwika, ni kuji ya panga umuwika wa mwaka umuwika, akapwe mulambu wa kulumba.

⁵⁸ Kuji ya pembe umuwika akapwe mulambu ha shili.

⁵⁹ Yitapo ya milambu ya sambukila yapwile ya ngombe aali, ni kuji a mapanga atano, ni kuji a pembe atano, ni kuji a mapanga atano a mwaka umuwika; uno wapwile mulambu wa Ngamaliele, mwana wa Pedazure.

⁶⁰ Ha tangwa liamuchilivwa Abidane, mwana wa Ngideonyi, mwata wa A-Mbenjamine.

⁶¹ Mulambu wenyi wapwile panda limuwika lia prata, pezu yalio ya kulakaji lia shekele ni makumi atatu a shekele; mbasia yimuwika ya prata ya makumi shimbiali a shekele nikulita ni shekele ya muma musandu. Yeswe ni yiali ya tò ya wunga wafufunuka, wa kuchinga ni maji, ukapwe mulambu wa wunga.

⁶² Musenge umuwika wa oru wa kumi lia shekele, wa tò wa insensu.

⁶³ Chimbembe wa kuji umuwika, ni kuji ya panga umuwika, ni kuji ya panga umuwika wa mwaka umuwika, akapwe mulambu wa kulumba.

⁶⁴ Kuji ya pembe umuwika akapwe mulambu ha shili.

⁶⁵ Yitapo ya milambu ya sambukila yapwile ya ngombe aali, ni kuji a mapanga atano, ni kuji a pembe atano, ni kuji a mapanga atano a mwaka umuwika; uno wapwile mulambu wa Abidane, mwana wa Ngideonyi.

⁶⁶ Ha tangwa liamuchikumi Aizere, mwana wa Amisadai, mwata wa A-Ndane.

⁶⁷ Mulambu wenyi wapwile panda limuwika lia prata, pezu yalio ya kulakaji lia shekele ni makumi atatu a shekele; mbasia yimuwika ya prata ya makumi shimbiali a shekele nikulita ni shekele ya muma musandu. Yeswe ni yiali ya tò ya wunga wafufunuka, wa kuchinga ni maji, ukapwe mulambu wa wunga.

⁶⁸ Musenge umuwika wa oru wa kumi lia shekele, wa tò wa insensu.

⁶⁹ Chimbembe wa kuji umuwika, ni kuji ya panga umuwika, ni kuji ya panga umuwika wa mwaka umuwika, akapwe mulambu wa kulumba.

⁷⁰ Kuji ya pembe umuwika akapwe mulambu ha shili.

⁷¹ Yitapo ya milambu ya sambukila yapwile ya ngombe aali, ni kuji a mapanga atano, ni kuji a pembe atano, ni kuji a mapanga atano a mwaka umuwika; uno wapwile mulambu wa Aizere, mwana wa Amisadai.

⁷² Ha tangwa kumi ni kashi Pagiele, mwana wa Okra, mwata wa A-Ashe.

⁷³ Mulambu wenyi wapwile panda limuwika lia prata, pezu yalio ya kulakaji lia shekele ni makumi atatu a shekele; mbasia yimuwika ya prata ya makumi shimbiali a shekele nikulita ni shekele ya muma musandu. Yeswe ni yiali ya tò ya wunga wafufunuka, wa kuchinga ni maji, ukapwe mulambu wa wunga.

⁷⁴ Musenge umuwika wa oru wa kumi lia shekele, wa tò wa insensu.

⁷⁵ Chimbembe wa kuji umuwika, ni kuji ya panga umuwika, ni kuji ya panga umuwika wa mwaka umuwika, akapwe mulambu wa kulumba.

⁷⁶ Kuji ya pembe umuwika akapwe mulambu ha shili.

⁷⁷ Yitapo ya milambu ya sambukila yapwile ya ngombe aali, ni kuji a mapanga atano, ni kuji a pembe atano, ni kuji a mapanga atano a mwaka umuwika; uno wapwile mulambu wa Pagiele, mwana wa Okra.

⁷⁸ Ha tangwa kumi ni liamuchiali Aira, mwana wa Ena, mwata wa A-Napatali.

⁷⁹ Mulambu wenyi wapwile panda limuwika lia prata, pezu yalio ya kulakaji lia shekele ni makumi atatu a shekele; mbasia yimuwika ya prata ya makumi shimbiali a shekele nikulita ni shekele ya muma musandu. Yeswe ni yiali ya tò ya wunga wafufunuka, wa kuchinga ni maji, ukapwe mulambu wa wunga.

⁸⁰ Musenge umuwika wa oru wa kumi lia shekele, wa tò wa insensu.

⁸¹ Chimbembe wa kuji umuwika, ni kuji ya panga umuwika, ni kuji ya panga umuwika wa mwaka umuwika, akapwe mulambu wa kulumba.

⁸² Kuji ya pembe umuwika akapwe mulambu ha shili.

⁸³ Yitapo ya milambu ya sambukila yapwile ya ngombe aali, ni kuji a mapanga atano, ni kuji a pembe atano, ni kuji a mapanga atano a mwaka umuwika; uno wapwile mulambu wa Aira, mwana wa Ena.

⁸⁴ Yenayo yapwile milambu ya miata a A-Izalele ya kutumbikila nayo chilumbilo ha tangwa achiwayishile ni maji: kumi lia panda ni panda jiali ja prata, ni kumi lia mbasia ni mbasia jiali ja prata, ni kumi lia misenge ni misenge yiali ya oru.

⁸⁵ Panda lieswe lia prata lia pezu ya kulakaji lia shekele ni makumi atatu a shekele. Mbasia yeswe ya makumi shimbiali. Prata yeswe ya yikashi, te ya tununu aali a shekele ni kulakaji awana a shekele nikulita ni shekele ya muma musandu.

⁸⁶ Ni ye misenge ya oru kumi ni yiali, ya tò ya insensu. Musenge weswe wa kumi lia shekele nikulita ni shekele ya muma musandu. Oru yeswe ya ye misenge, te ya kulakaji lia shekele ni makumi aali a shekele.

⁸⁷ Yimuna eswe a mulambu wa kulumba, te kuji a ngombe kumi ni aali. E kuji a mapanga kumi ni aali, ni e kuji a mapanga a mwaka umuwika kumi ni aali, hamwe ni mulambu wo wa wunga. Ni e kuji a pembe a mulambu ha shili kumi ni aali.

⁸⁸ Yimuna eswe a yitapo ya milambu ya sambukila, te kuji a ngombe makumi aali ni awana. E kuji a mapanga makumi asambano. E kuji a pembe makumi asambano, ni e kuji a mapanga a mwaka umuwika makumi asambano. Yoyo yapwile milambu ya kutumbikila nayo chilumbilo muze te hachiwayisa ni maji.

⁸⁹ Muze Mose anjilile mu mbalaka ya chikungulwila mukuhanjika nenyi, henaho iye wevwile liji nikuhanjika nenyi lia kukatuka helu lia chitwamo cha keke cha ha mushete wa Shindakenyo, lia kukatuka mukachi ka akerupimi aali. Yahanjika nenyi.