Kwalula 6 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Amba kuli A-Izalele ngwe, Muze lunga, hanji pwo, malakenya chilakenyo chilemu, che chilakenyo cha Kanazireu, ha kulihandunwina kuli Yehova,

³ akalihandunune ku vinyu ni ku kunwa chisasu. Kanda akanwa vinagre ya ku vinyu, chipwe vinagre ya ku kunwa chisasu, chipwe meya a uva kanda akaanwa; chipwe uva ya wisu, chipwe yumu kanda akayilia.

⁴ Ha matangwa eswe a kulihandununa chenyi kanda akalia nichimwe cha ku mutondo wa uva, chipwe mbuto, chipwe yizuwi, ka.

⁵ Ha matangwa eswe a chilakenyo chenyi cha kulihandununa, tewula niyimwe kanda ayipalikisa ku mutwe wenyi; ndo matangwa mamanunuka ha kulihandunwina kuli Yehova, iye akapwe musandu. Iye akeche milamba ya kambu ja ha mutwe wenyi yikasuhe.

⁶ Ha matangwa eswe malihandunwina kuli Yehova kanda akakundama ku mujimba wa mufu.

⁷ Kanda akalichisa mumu hali tato, hanji naye, hanji mwanakwo, hanji yayo, hanji ndumbwenyi, muze o mafwa, mumu kulihandunwina chenyi kuli Zambi ha mutwe wenyi chili.

⁸ Ha matangwa eswe a kulihandununa chenyi, iye musandu kuli Yehova.

⁹ Nyi tungumuku mutu mafwila hakamwihi nenyi, mba iye machisa mutwe wenyi wa kulihandununa chenyi, mba akatewule mutwe wenyi ha tangwa lia kulipemesa chenyi. Akautewule ha tangwa liamuchishimbiali.

¹⁰ Ha tangwa liamuchinake akatwale kuli sasendote tutele aali, chipwe ana-a-membe aali, ndo ku chikolo cha mbalaka ya chikungulwila.

¹¹ Sasendote akalambule mukwo mulambu ha shili, mukwo mulambu wa kulumba, mukumufukila, mumu te iye havulumuna ha mukunda wa mujimba wa mufu. Tangwa lioliene iye akasele ku usandu mutwe wenyi.

¹² Iye akalihandunwine kuli Yehova ha matangwa a kulihandununa chenyi. Akatwale kuji ya panga wa mwaka umuwika akapwe mulambu wa uhie. Alioze matangwa a kunyima matoka mumu te kulihandununa chenyi hichapiha.

¹³ Shimbi ya Kanazireu yino, muze matangwa a kulihandununa chenyi mamanunuka: akamutwale ku chikolo cha mbalaka ya chikungulwila.

¹⁴ Iye akalambule kuli Yehova mulambu wenyi, te kuji ya panga wa mwaka umuwika keshi chipa, akapwe mulambu wa kulumba, ni chihwo cha panga wa mwaka umuwika keshi chipa, akapwe mulambu ha shili, ni kuji ya panga keshi chipa akapwe mulambu wa sambukila,

¹⁵ ni mutonga wa mbolo kujishi futunwiso, ni yandanda ya wunga wafufunuka, wa kuchinga ni maji, ni malikemba keshi futunwiso, a kulembula ni maji, hamwe ni mulambu wayo wa wunga ni milambu yayo ya kunwa.

¹⁶ Sasendote akayitumbikile kumeso ja Yehova. Iye akalambule mulambu wenyi ha shili ni mulambu wenyi wa kulumba.

¹⁷ Iye akalambule kuli Yehova mwe kuji ya panga akapwe chitapo cha mulambu wa sambukila hamwe ni we mutonga wa mbolo kujishi futunwiso. Sasendote akalambule nawa mulambu wenyi wa wunga ni mulambu wenyi wa kunwa.

¹⁸ Mwe Kanazireu akalitewile ku chikolo cha mbalaka ya chikungulwila mutwe wa kulihandununa chenyi. Akande kambu ja ku mutwe wa kulihandununa chenyi, akajinjise mu kahia kushi lia chitapo cha mulambu wa sambukila.

¹⁹ Sasendote akande chilama cha kuteleka cha mwe kuji ya panga, ni chandanda chimuwika kuchishi futunwiso cha ku mutonga, ni likemba limuwika kulishi futunwiso, hikuyisela mu moko ja mwe Kanazireu, muze te iye hatewula mutwe wa kulihandununa chenyi.

²⁰ Sasendote akayihungise, mulambu wa kuhungisa kumeso ja Yehova. Kuyapwa yisandu ya sasendote, hamwe ni pambo lia kuhungisa, ni chilama cha kuzundula. Mba kulutwe mwe Kanazireu mahasa kunwa vinyu.

²¹ Yino ye shimbi ya Kanazireu ya kulakenya chilakenyo, ni ya mulambu wenyi kuli Yehova ha kulihandununa chenyi, wa kuweza ku yuma yikwo iye mahasa kulambula. Nikulita ni chilakenyo malakenya iye, chocho chamutamba kulinga, nikulita ni ye shimbi ya kulihandununa chenyi.

²² Yehova yamba kuli Mose ngwenyi,

²³ Amba kuli Arone ni kuli ana jenyi a malunga ngwe, Chichino nukawahise A-Izalele, ambenu kuli ayo ngwenu,

²⁴ Yehova akanuwahise, akanufunge.

²⁵ Yehova akanutemwine meso jenyi, aka-nuvwile vumbi.

²⁶ Yehova akanuhetwile meso jenyi, aka-nuhwimise.

²⁷ Chocho akasele jina liami hali A-Izalele. Yami kumungukaawahisa.