Kwalula 5 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Amba A-Izalele akakatwise mu chilombo akwa mbumba eswe, ni eswe akwete musongo wa kuhita manyinga, ni mweswawo walichisa ni afu.

³ Ni malunga ni mapwo nukaakatwise, he haze lia chilombo nukaakatwise, hanga kechi kachisa chilombo cho muze natwama yami.

⁴ A-Izalele yalinga chocho. Yaakatwisa haze lia chilombo. Chizechene ngwe Yehova ambile kuli Mose, chocho chialingile A-Izalele.

⁵ Yehova yamba kuli Mose ngwenyi,

⁶ Amba kuli A-Izalele ngwe, Muze lunga hanji pwo mavulumuna mutonga wa ku mitonga akuyivulumuna kuli atu, nikutangula shimbi ya Yehova, mba nyi mwe mutu mahia,

⁷ hohene akashikise mutonga havulumuna; nikulita ni mutonga wenyi akafwete yeswe lukombo, mba hikuwezaho chihanda chimuwika cha ku yihanda yitano, akahane kuli mwe mwenya mutonga.

⁸ Alioze nyi mwe mutu keshi ni usoko yoze matambula fweto ya mutonga wenyi, ye fweto ya mutonga wenyi mayifweta kuli Yehova yikapwe ya mbala ya sasendote, helu lia kuji ya panga wa kufuka shili yoze amufukile nenyi.

⁹ Milambu yeswe ya kuzundula ya ku yuma yeswe yisandu A-Izalele matumbikila kuli sasendote, yikapwe ya mbala ya sasendote.

¹⁰ Yuma yeswe hayisela ku usandu ya atu eswe yikapwe ya mbala ya iye. Yuma yeswayo mutu mahana kuli sasendote yikapwe ya mbala ya iye.

¹¹ Yehova yamba kuli Mose ngwenyi,

¹² Amba kuli A-Izalele ngwe, Nyi pwo lia lunga mweswawo mapianguka ni kumuvulumuna,

¹³ nyi lunga mapomba nenyi ni usolo, mba machisweka kumeso ja mukwo-lunga, te ni kuchihengeka, mba pwo malichisa hindu chela wa kumusolola wakuhi, chipwe kumukwata, kamukwachile,

¹⁴ nyi mbunge ya ukwa muyiza hali iye ni kuvwila ukwa mukwo-pwo, iye te halichisa; chipwe nyi mbunge ya ukwa muyiza hali iye ni kuvwila ukwa mukwo-pwo, alioze kalichishile,

¹⁵ henaho mwe lunga akahetese mukwo-pwo kuli sasendote, akatwale hali iye mulambu wenyi wa chihanda chimuwika cha ku yihanda kumi ya efa ya wunga wa sevada. Kanda akazujilaho maji niamwe, chipwe kusaho libano, ka. Mumu kuwapwa mulambu wa wunga wa ukwa, mulambu wa wunga wa Chiwulwiso, kuwakwiwulwisa uhenge.

¹⁶ Sasendote akamukundamise, akamutumbikile kumeso ja Yehova.

¹⁷ Sasendote akatwale meya asandu mu chikwachilo cha uma akatapule nawa fufuta yimwe ya hashi mu tabernakulu. Akayise mu e meya.

¹⁸ Sasendote akatumbikile mwe pwo kumeso ja Yehova. Akavungulule kambu ja ha mutwe wa pwo. Akase we mulambu wa wunga wa Chiwulwiso mu moko ja pwo, wenawo we mulambu wa wunga wa ukwa. Sasendote akapwe ni meya asasu a kuneha shingo mu kwoko lienyi.

¹⁹ Sasendote akamushingise, akambe kuli pwo ngwenyi, Nyi lunga kapombele ni yena, nyi kwapiangukile ku luchisa ni lunga weka, iye hi mukwenu-lunga ko, ngwami, utusuke ku ano meya asasu a kuneha shingo.

²⁰ Alioze nyi hiwapianguka ni lunga weka, hi mukwenu-lunga ko, nyi hiwalichisa, lunga nikupomba ni yena, hi mukwenu-lunga ko,—

²¹ henaho sasendote akashingise mwe pwo liji lia shingo. Sasendote akambe kuli pwo ngwenyi, Yehova akushinge, akupwise nako hakachi ka atu je muze Yehova masosewesa chitongo che, ni kujimbisa mujimba we.

²² Ano meya a kuneha shingo manjila mu jimo lie, majimbisa mujimba we, masosewesa chitongo che. Mba mwe pwo mamba ngwenyi, Amene, Amene.

²³ Sasendote akasoneke mashingo ano mu mukanda, mba hikwajimwina mu e meya asasu.

²⁴ Iye akanwise pwo e meya asasu a kuneha shingo. Meya a kuneha shingo makanjila muli iye, makapwa asasu.

²⁵ Sasendote akatambule mulambu wa wunga wa ukwa ku kwoko lia pwo, hikuhungisa we mulambu wa wunga kumeso ja Yehova, mba akauhetese ku chilumbilo.

²⁶ Sasendote akazomone kwoko lia tò lia wunga wa mulambu ukapwe Chiwulwiso chawo, mba hikuwocha ha chilumbilo. Kulutwe akanwise pwo e meya.

²⁷ Muze iye hamunwisa e meya, mba nyi pwo halichisa, nyi havulumuna mukwo-lunga, meya a kuneha shingo makamunjila, makapwa asasu, mujimba wenyi muukajimba, chitongo chenyi muchikasosewa. Mwe pwo makashingiwa hakachi ka atu jenyi.

²⁸ Nyi pwo kalichishile alioze halinanga, mba akatusuke, makaseseka ufumba.

²⁹ Yino ye shimbi mumu ha ukwa muze pwo mapianguka ku luchisa ni lunga weka, iye hi mukwo-lunga ko.

³⁰ Chipwe muze mbunge ya ukwa muyiza hali lunga mba mavwila ukwa mukwo-pwo, henaho makatumbikila mwe pwo kumeso ja Yehova. Sasendote akalinge kuli pwo nikulita ni shimbi yino yeswe.

³¹ Mwe lunga akasambe ku uhenge. Mwe pwo akambate uhenge wenyi mwene.