Kwalula 4 - MUKANDA USANDU WA ZAMBI 1975

¹ Yehova yamba kuli Mose ni Arone ngwenyi,

² Alulenu A-Kohate a kuli A-Levi, mu minyachi yo, ku majiko ja atato,

³ chize kuli akwa makumi atatu a miaka ndo kuli makulwana, ewa ndo kuli akwa makumi atano a miaka, eswe akunjila ku uvumbiko, mukulinga ye milimo ya mu mbalaka ya chikungulwila.

⁴ Uvumbiko wa A-Kohate mu mbalaka ya chikungulwila uno, wa yuma yisandu yahiana.

⁵ Muze akwa chilombo maya mu wenyi Arone hamwe ni ana jenyi a malunga akanjile akalemune chikalakala cha hina, akafuke nacho mushete wa Shindakenyo.

⁶ Akaseho chifuko cha malambu a yipanyundu. Akazazulwileho hina lieswe lilauluka. Akanjisemo mikambo yawo.

⁷ Akazazulwile ha mesa ya mbolo ja kutumbieka hina lilauluka. Akatumbikileho yenga, ni misenge, ni ndeho, ni mitondo ya milambu ya kunwa. Ni je mbolo ja matangwa eswe jikapweho.

⁸ Akazazulwileho hina lia ngengu. Mba hikufuka lie hina ni chifuko cha malambu a yipanyundu. Akanjisemo mikambo yayo.

⁹ Akande hina lilauluka, akafuke nalio chikwachilo cha ndeya ya kutemwina, ni ndeya jacho, ni mana jacho, ni yenga yacho ya kukwachilaho mwelela, ni yikwachilo yeswe ya maji, yenayo ya kuchivumbikila.

¹⁰ Akachise hamwe ni yikashi yeswe yacho mu chifuko cha malambu a yipanyundu. Akachise ha muhango.

¹¹ Akazazulwile ha chilumbilo cha oru hina lilauluka. Hikuchifuka ni chifuko cha malambu a yipanyundu. Akanjisemo mikambo yacho.

¹² Akase mu hina lilauluka yikashi yeswe ya uvumbiko ya kuvumbikila muma musandu. Hikuyifuka ni chifuko cha malambu a yipanyundu. Akayise ha muhango.

¹³ Akakulule uto wa ku chilumbilo. Akazazulwileho hina lia ufungo.

¹⁴ Akatumbikileho yikashi yeswe yacho ya kuvumbikilako, ni yikombelo, ni nguto ja misako, ni mapá, ni mbasia, te yikashi yeswe ya ku chilumbilo. Akazazulwileho chifuko cha malambu a yipanyundu. Akanjisemo mikambo yacho.

¹⁵ Muze te Arone ni ana jenyi a malunga hamana kufuka muma musandu ni yikashi yeswe ya muma musandu, muze akwa chilombo himaya mu wenyi, mba kulutwe A-Kohate akakundame akayimbate. O kanda akasunga yuma yisandu kuchina mafwa. Yuma yino kuyapwa chiteli cha A-Kohate mu mbalaka ya chikungulwila.

¹⁶ Ulayilo wa Eleazare, mwana wa sasendote Arone, uno: maji a ndeya, ni insensu ya lupembo mupema, ni mulambu wa wunga wa tangwa ha tangwa, ni maji a kuwayisa no, ni ulayilo wa tabernakulu yeswe, ni wa yeswe yilimo, ni muma musandu ni yikashi yilimo.

¹⁷ Yehova yamba kuli Mose ni Arone ngwenyi,

¹⁸ Kanda nukateta munyachi wa majimo a A-Kohate hakachi ka A-Levi.

¹⁹ Alioze hanga akatwame ni mwono, kanda akafwa, nukalinge chino ha kukundama ayo ku yuma yisandu yahiana: Arone ni ana jenyi a malunga akanjile, akasele mutu mweswe uvumbiko wenyi ni chiteli chenyi.

²⁰ Kanda akanjila akatale yuma yisandu, chipwe ha kashimbu kakapekepe, ka, kuchina mafwa.

²¹ Yehova yamba kuli Mose ngwenyi,

²² Alula A-Ngeshone nawa, ku majiko ja atato, mu minyachi yo.

²³ Chize kuli akwa makumi atatu a miaka ndo kuli makulwana, ewa ndo kuli akwa makumi atano a miaka ukaalule, eswe akunjila ku uvumbiko, mukulinga milimo ya mu mbalaka ya chikungulwila.

²⁴ Uvumbiko wa minyachi ya A-Ngeshone ha kuvumbika ni ha kumbata yiteli uno:

²⁵ o akambate mahina a ku tabernakulu ni a ku mbalaka ya chikungulwila, ni chifuko chayo, ni chifuko cha malambu a yipanyundu chize chatwamaho helu, ni hina lia kufuka ku chikolo cha mbalaka ya chikungulwila;

²⁶ ni mahina a kuzezeleka a ku yize, ni hina lia kufuka ku unjililo wa chikolo cha yize ya kujingilika tabernakulu ni chilumbilo, ni mihipu yo, ni yikashi yeswe ya uvumbiko wayo. Cheswacho malinga nayo, o akachilinge.

²⁷ Arone ni ana jenyi a malunga akatumine uvumbiko weswe wa A-Ngeshone, ku yiteli yo yeswe ni ku uvumbiko wo weswe. Ukaaselecho akalayile yiteli yo yeswe.

²⁸ Awo we uvumbiko wa minyachi ya A-Ngeshone mu mbalaka ya chikungulwila. Akayule milimo yo kuli Itama, mwana wa sasendote Arone.

²⁹ Ha kutwala kuli A-Merari, ukaalule mu minyachi yo, ku majiko ja atato.

³⁰ Chize kuli akwa makumi atatu a miaka ndo kuli makulwana, ewa ndo kuli akwa makumi atano a miaka ukaalule, eswe akunjila ku uvumbiko, mukulinga milimo ya mu mbalaka ya chikungulwila.

³¹ Ulayilo wa yiteli yo, nikulita ni uvumbiko wo weswe mu mbalaka ya chikungulwila, uno: ni matabua a ku tabernakulu, ni njalo jo, ni manguji jo, ni yimanyino yo,

³² ni manguji a ku yize ya kujingilika, ni yimanyino yo, ni mbambo jo, ni mihipu yo, ni yikashi yo yeswe hamwe ni uvumbiko wo weswe. Ye yikashi ya ulayilo wa yiteli yo, uyialule, chimwe ha chimwe, nikulita ni majina.

³³ Awo we uvumbiko wa minyachi ya A-Merari, nikulita ni uvumbiko wo weswe mu mbalaka ya chikungulwila; akayule milimo yo kuli Itama, mwana wa sasendote Arone.

³⁴ Ni Mose ni Arone ni miata a chikungulwila yalula A-Kohate mu minyachi yo, ku majiko ja atato,

³⁵ chize kuli akwa makumi atatu a miaka ndo kuli makulwana, ewa ndo kuli akwa makumi atano a miaka, eswe akunjila ku uvumbiko, mukulinga milimo ya mu mbalaka ya chikungulwila.

³⁶ A kwalula a mu minyachi yo yapwa tununu aali ni kulakaji shimbiali ni makumi atano.

³⁷ Wano yaalula a mu minyachi ya A-Kohate, eswe akuvumbika mu mbalaka ya chikungulwila. Mose ni Arone yaalula nikulita ni liji lia shimbi ya Yehova kuli Mose.

³⁸ A kwalula a A-Ngeshone, mu minyachi yo, ku majiko ja atato,

³⁹ chize kuli akwa makumi atatu a miaka ndo kuli makulwana, ewa ndo kuli akwa makumi atano a miaka, eswe akunjila ku uvumbiko, mukulinga milimo ya mu mbalaka ya chikungulwila,

⁴⁰ a kwalula, mu minyachi yo, ku majiko ja atato, yapwa tununu aali ni kulakaji asambano ni makumi atatu.

⁴¹ Wano yaalula a mu minyachi ya A-Ngeshone, eswe akuvumbika mu mbalaka ya chikungulwila. Mose ni Arone yaalula nikulita ni liji lia shimbi ya Yehova.

⁴² A kwalula a minyachi ya A-Merari, mu minyachi yo, ku majiko ja atato,

⁴³ chize kuli akwa makumi atatu a miaka ndo kuli makulwana, ewa ndo kuli akwa makumi atano a miaka, eswe akunjila ku uvumbiko, mukulinga milimo ya mu mbalaka ya chikungulwila,

⁴⁴ a kwalula, mu minyachi yo, yapwa tununu atatu ni kulakaji aali.

⁴⁵ Wano a kwalula a mu minyachi ya A-Merari. Mose ni Arone yaalula nikulita ni liji lia shimbi ya Yehova kuli Mose.

⁴⁶ Eswe a kwalula a kuli A-Levi, a kwalula kuli Mose ni Arone ni miata a A-Izalele, mu minyachi yo, ku majiko ja atato,

⁴⁷ chize kuli akwa makumi atatu a miaka ndo kuli makulwana, ewa ndo kuli akwa makumi atano a miaka, eswe akunjila mu mbalaka ya chikungulwila mukuvumbika, mukulinga milimo ya kumbata yiteli,

⁴⁸ a kwalula yapwa tununu nake ni kulakaji atano ni makumi nake.

⁴⁹ Nikulita ni liji lia shimbi ya Yehova, yaalula kuli Mose, mutu mweswe nikulita ni uvumbiko wenyi, nikulita ni chiteli chenyi. Chocho yaalula kuli iye, chizechene ngwe Yehova ambile Mose.