Kwalula 36 - MUKANDA USANDU WA ZAMBI 1975

¹ Akwa lutwe a atato a minyachi ya A-Ngiliate, mwana Makire, mwana Manase, a kuli akwa minyachi ya A-José, yakundama, yahanjika kumeso ja Mose, ni kumeso ja miata, akwa lutwe a atato a A-Izalele ngwo,

² Yehova wambile mwata wetu akahane chifuchi chikapwe chihinga cha A-Izalele ha kuta chela; ambile mwata wetu kuli Yehova akahane chihinga cha mwanakwetu Zelofehade kuli ana jenyi a mapwo.

³ Kachi maya malo kuli ana a malunga amwe a ku minyachi yeka ya A-Izalele, akachize chihinga cho ku chihinga cha atata, mba akachiweze ku chihinga cha munyachi o mapwako ku malo; chocho makachichiza ku chihanda cha chihinga chetu.

⁴ Ha mwaka wa uwahililo wa A-Izalele akaweze chihinga cho ku chihinga cha munyachi wa malo jo. Chocho akachize chihinga cho ku chihinga cha munyachi wa atata.

⁵ Mose yamba A-Izalele nikulita ni liji lia Yehova ngwenyi, Munyachi wa A-José kanahanjika kanawa.

⁶ Chuma chino Yehova hamba ha kutwala kuli ana a mapwo a Zelofehade ngwenyi, Aye malo kuli eswo o anazange; chino wika, kuli akwa jimo a ku munyachi wa tato aye malo.

⁷ Chocho chihinga nichimwe cha A-Izalele kuchichi katutuluka ku munyachi nikuya ku munyachi. A-Izalele akalalaminye, mutu mweswe, ku chihinga cha munyachi wa atato.

⁸ Pwo mweswe uli ni chihinga mu munyachi weswawo wa A-Izalele, akapwe pwo lia umwe mukwa jimo lia ku munyachi wa tato, hanga A-Izalele, mutu mweswe, akazuke chihinga cha atato.

⁹ Chocho chihinga nichimwe kuchichi katutuluka ku munyachi umwe nikuya ku munyachi ukwo; mumu munyachi weswe wa A-Izalele akalalaminye ku chihinga chenyi mwene.

¹⁰ Chizechene ngwe Yehova wambile Mose, chocho chialingile ana a Zelofehade a mapwo.

¹¹ Mumu Mate, ni Tiriza, ni Hogala, ni Milika, ni Noe, ana a Zelofehade a mapwo yaya malo kuli ana a ana-akwo, a tato.

¹² Yaya malo kuli akwa minyachi ya ana a Manase, mwana José. Chihinga cho yichisala mu munyachi wa akwa majimo a tato.

¹³ Yino ye shimbi ni we upatwilo Yehova yamba ku kwoko lia Mose kuli A-Izalele mu yana ya Moape, ku sesa lia Yordau, ku Yeriku.