Kwalula 35 - MUKANDA USANDU WA ZAMBI 1975

¹ Yehova yamba kuli Mose mu yana ya Moape, ku sesa lia Yordau, ku Yeriku, ngwenyi,

² Amba A-Izalele akahane kuli A-Levi membo a kutwamamo a ku chihinga cho; ni ulilo wa yimuna wa membo a kwajingilika nukahane kuli A-Levi.

³ Akapwe ni membo a kutwamamo, ulilo wo ukapwe wa yimuna jo, ni wa yikumba yo, ni wa tushitu two eswe.

⁴ Ulilo wa membo aze munukahana kuli A-Levi, ukapwe chize ku chipanga cha limbo nikutwala haze kanunu ka mbandu ha kujingilika kweswe.

⁵ Nukeseke haze lia limbo ku sali lia ku Chivumbuko tununu aali a mbandu, ni ku sali lia ku Sule tununu aali a mbandu, ni ku sali lia ku Chitokelo tununu aali a mbandu, ni ku sali lia ku Norte tununu aali a mbandu, limbo likapwe mukachi. Uno ukapwe kuli ayo ulilo wa ku membo jo.

⁶ E membo munukahana kuli A-Levi, o akapwe membo asambano a uchinyino, munukaahana hali mukwa kushiha mutu kuchinyinamo. Nuwezeho makumi awana a membo ni membo aali nukaahane.

⁷ E membo eswe munukahana kuli A-Levi akapwe makumi awana a membo ni mambo nake, nukaahane hamuwika ni ulilo wo.

⁸ Ha kutwala ku membo munukahana a mu chihinga cha A-Izalele, kuli atu anji nukachize anji, kuli atu akehe nukachize akehe. Munyachi weswe Ukahane membo kuli A-Levi nikulita ni chifuchi o makahinga.

⁹ Yehova yamba kuli Mose ngwenyi,

¹⁰ Amba kuli A-Izalele ngwe, Ha kuzauka Yordau hikunjila mu chifuchi cha Kanana,

¹¹ henaho nukalitongwele membo akapwe kuli yenu membo a uchinyino, hanga mukwa kushiha mutu, kachihalile, akachinyinemo.

¹² E membo akapwe kuli yenu a uchinyino kumeso ja mukwa kukala, kuchina mukwa kushiha mafwa, ndo makamana kumeso ja chikungulwila akamupatwile.

¹³ E membo munukahana akapwe kuli yenu membo asambano a uchinyino.

¹⁴ Mu sali lia Yordau nukahane membo atatu; mu chifuchi cha Kanana nukahane membo atatu, o akapwe membo a uchinyino.

¹⁵ Hali A-Izalele, ni hali chilambala, ni hali njize uli hakachi ko, membo aze asambano akapwe a uchinyino, hanga eswe makashiha mutu, kachihalile, akachinyinemo.

¹⁶ Alioze kachi iye malamba mutu ni chikungo cha utale, chocho mafwa, iye chingalwe. Chamwenemwene nukashihe chingalwe.

¹⁷ Kachi mamulamba ni liwe analikwata mu kwoko lienyi, mulipwa liwe lia kushiha nalio mutu, mba mafwa, iye chingalwe. Chamwenemwene nukashihe chingalwe.

¹⁸ Kachi mamulamba ni mutondo anaukwata mu kwoko, muupwa mutondo wa kushiha nawo mutu, mba mafwa, iye chingalwe. Chamwenemwene nukashihe chingalwe.

¹⁹ Mukwa kukala manyinga iye mwene akashihe chingalwe. Ha kutakana nenyi, akamushihe.

²⁰ Kachi mamutuwa mumu ha kole, hanji mamukonga, ha ku mujikinyina, chocho mafwa,

²¹ hanji mumu ha kole mamulamba ni kwoko lienyi, mba mafwa, mukwa kumulamba chamwenemwene nukamushihe, iye chingalwe. Mukwa kukala manyinga akashihe chingalwe ha kutakana nenyi.

²² Alioze kachi mamutuwa susumuku, te keshi kole, hanji mamukonga chuma kamujikinyinyine,

²³ hanji ni liwe limwe, mulipwa liwe lia kushiha nalio mutu, te kamumwene, mamukongalio mba mafwa, chipwe kamuvwilile kole, chipwe kafupile kumulemeka,

²⁴ henaho chikungulwila chikapatule hakachi ka mukwa kushiha mutu ni mukwa kukala manyinga, nikulita ni upatwilo uno.

²⁵ Chikungulwila chikapulule mukwa kushiha mutu ku kwoko lia mukwa kukala manyinga. Chikungulwila chikamuhilwise ku limbo lienyi lia uchinyino, kuze achi nyinyine, iye akatwamemo ndo ku kufwa cha sasendote wa lutwe, wa kuwayisa ni maji asandu.

²⁶ Alioze kachi mukwa kushiha mutu mazomboka njiza ja limbo lienyi lia uchinyino kuze achinyinyine,

²⁷ kachi mukwa kukala manyinga mamuwana mu sali lia njiza ja limbo lienyi lia uchinyino, mba mukwa kukala manyinga mamushiha, kechi kupwa ni mulonga wa manyinga.

²⁸ Mumu kachi iye hasala mu limbo lienyi lia uchinyino ndo kufwa cha sasendote wa lutwe; kulutwe lia kufwa cha sasendote wa lutwe mukwa kushiha mutu akahiluke ku chifuchi chenyi.

²⁹ Yuma yino yikapwe chiyulo cha upatwilo kuli yenu ndusu yisemuko yenu kweswako munukatwama.

³⁰ Mweswawo mashiha mutu, akashihe chingalwe ku Shindakenyo ya yela, alioze chela umuwika kanda akumisa mutu hanga afwe.

³¹ Chikwo nawa, kanda nutambula ndando ya kutemwina mwono wa chingalwe unahi mulonga wa kufwa. Chamwenemwene nukamushihe.

³² Kanda nutambula ndando ya kutemwina mutu hanachinyina ku limbo lienyi lia uchinyino, hanga akahiluke kutwama mu chifuchi, ndo kufwa cha sasendote wa lutwe.

³³ Chocho, kanda nukapihisa chifuchi nuna-twamamo, mumu manyinga akupihisa chifuchi. Keshi kuhasa kufukila chifuchi mumu ha manyinga anamwanganamo, shina ku manyinga a mukwa kumwanga manyinga.

³⁴ Kanda nukachisa chifuchi nunatwamamo, mwenamo ni yami natwama. Mumu yami Yehova natwama mukachi ka A-Izalele.