Kwalula 34 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Amba A-Izalele ngwe, Muze mununjila mu chifuchi cha Kanana (chino chifuchi muchikapwa chihinga chenu, te chifuchi cha Kanana nikulita ni njiza jacho),

³ henaho chifuchi chenu cha ku Sule chikapwe chize ku puya ya Zini nikupalika ku sali lia Endome, njiza yenu ya ku Sule yikapwe chize ku songo lia Chitende cha Mungwa nikutwala ku Chivumbuko.

⁴ Njiza yenu yikalikoneke, yikatwale ku Sule ha kukandukila ku Akarabimi, yikapalike ndo ku Zini. Kutuhuka chayo chikatwale ku Sule lia Kandeshe-Mbania, yikahete ku Haza-Andare, yikapalike ndo ku Azamone.

⁵ Njiza yikalikoneke chize ku Azamone, ndo ku lwiji wa Engitu, kutuhuka chayo chikasulile ku kalunga-lwiji.

⁶ Njiza ya ku Chitokelo yikapwe ku Kalunga-lwiji Munene ni mbaka yako; iye akapwe njiza yenu ya ku Chitokelo.

⁷ Njiza yenu ya ku Norte yikapwe yino: chize ku Kalunga-lwiji Munene nukalifunjikile mulundu wa Hore.

⁸ Chize ku mulundu wa Hore nukafunjike ndo ha kunjilila mu Hamate; songo lia njiza likapwe ku Zedade.

⁹ Njiza yikaye ku Zifrome; songo liayo likapwe ndo ku Haza-Ena; yino yikapwe njiza yenu ya ku Norte.

¹⁰ Nukafunjike njiza yenu ya ku Chivumbuko chize ku Haza-Ena ndo ku Sefa.

¹¹ Njiza yikapalumuke chize ku Sefa ndo ku Ribila, ku sali lia Chivumbuko lia Ayine. Njiza yikapalumuke, yikahete ku ngenge ya Chitende cha Chinerote ku Chivumbuko.

¹² Njiza yikapalumuke ku Yordau; songo liayo likapwe ku Chitende cha Mungwa. Chikapwe chifuchi chenu nikulita ni njiza jacho ha kuchijingilika.

¹³ Mose yamba A-Izalele ngwenyi, Chino chifuchi munukachihinga ha kuta chela, chize Yehova wambile ahane ku minyachi livwa ni ku chihanda cha ha muchima cha munyachi.

¹⁴ Mumu munyachi wa A Rupene nikulita ni akwa majiko ja atato, ni munyachi wa A-Ngate nikulita ni akwa majiko ja atato, hanatambula, ni chihanda cha ha muchima cha munyachi wa Manase hanatambula chihinga cho.

¹⁵ Minyachi yiali ni chihanda cha ha muchima cha munyachi hanatambula chihinga cho mu sali lia Yordau ku Yeriku, ku Chivumbuko, kutalikisa ku utuhukilo wa tangwa.

¹⁶ Yehova yamba kuli Mose ngwenyi,

¹⁷ Majina ja malunga manutetela chifuchi chikapwe chihinga chenu wano: sasendote Eleazare ni Yoshua mwana Nune.

¹⁸ Nukasakule mwata umuwika wa ku munyachi weswe mukuteta chifuchi chikapwe chihinga cho.

¹⁹ Majina ja malunga wano: wa ku munyachi wa Yunda, Kalemba, mwana Yefune;

²⁰ ni wa ku munyachi wa A-Simeone, Shemuele, mwana Amihude;

²¹ ni wa ku munyachi wa Mbenjamine, Elidade, mwana Chiselone;

²² ni wa ku munyachi wa A-Ndane, mwata Mbuke, mwana Yokele;

²³ ni wa kuli A-José, wa ku munyachi wa A-Manase, mwata Haniele, mwana Efode;

²⁴ ni wa ku munyachi wa A-Eframe, mwata Kemuele, mwana Shifetane;

²⁵ ni wa ku munyachi wa A-Zapulone, mwata Elizafane, mwana Panake;

²⁶ ni wa ku munyachi wa A-Isaka, mwata Palitele, mwana Aza;

²⁷ ni wa ku munyachi wa A-Ashe, mwata Ahihude, mwana Selomi;

²⁸ ni wa ku munyachi wa A-Napatali, mwata Pendaele, mwana Amihude.

²⁹ Wano Yehova yaamba ngwenyi, Akatete chihinga hali A-Izalele mu chifuchi cha Kanana.