Kwalula 32 - MUKANDA USANDU WA ZAMBI 1975

¹ Achi A-Rupene ni A-Ngate apwile ni mbunga yinene ya yimuna; muze amwene chifuchi cha Yazere ni chifuchi cha Ngiliate, kumanyi chapwile chifuchi cha yimuna.

² A-Ngate ni A-Rupene yaheta, yamba kuli Mose, ni kuli sasendote Eleazare, ni kuli miata ja chikungulwila ngwo,

³ Atarote, ni Ndibone, ni Yazere, ni Nimera, ni Heshebone, ni Eleale, ni Shebame, ni Nebo, ni Mbeone,

⁴ chifuchi chize Yehova walambile kumeso ja chikungulwila cha A-Izalele, kuchapwa chifuchi cha yimuna; ndungo jenu kali ni yimuna.

⁵ Yamba ngwo, Kachi twawana vumbi kumeso jenu, nuhane chifuchi chino kuli yetu ndungo jenu, tuchizuke, kanda nutuzawisa Yordau.

⁶ Mose yamba kuli A-Ngate ni kuli A Rupene ngwenyi, Kuma, usoko wenu maya ku jita nyi, mba yenu munutwama kuno?

⁷ Kuchi te munuhongesa mbunge ja A-Izalele, nikwachinda kunjila mu chifuchi Yehova anaahecho?

⁸ Chocho alingile atatenu muze naakatwishile ku Kandeshe-Mbania akatale chifuchi.

⁹ Mumu muze akandukile ku chikulo cha Esekole, atalile chifuchi, yahongesa mbunge ja A-Izalele nikwachinda kunjila mu chifuchi Yehova aahelecho.

¹⁰ Utenu wa Yehova yiukasumuka tangwa lize, yalishinga ngwenyi,

¹¹ Chamwenemwene niumwe wa kuli atu akatukile ku Engitu, chize kuli akwa makumi aali a miaka ndo kuli makulwana makamona chifuchi nalakenyene ni shingo kuhana kuli Apalahama ni kuli Izake ni kuli Yakomba, mumu te o kangukawile liakulu,

¹² shina Kalemba mwana Yefune, Ka Kenaze, ni Yoshua mwana Nune, mumu te o yakaula liakulu Yehova.

¹³ Utenu wa Yehova yiukasumukina A-Izalele, yaendanganyisa mu puya makumi awana a miaka, ndo chisemuko chize chalingile chipi kumeso ja Yehova chakuwile.

¹⁴ Kumanyi! Enu nunakatuka ni kusalakana atatenu, munyachi wa yivulumunyi, mukwokesa utenu usasu wa Yehova hali A-Izalele!

¹⁵ Mumu kachi munukondoloka kuli iye, kachi makaehuka cheka nawa mu puya. Kumunukonwona vungu lino lieswe.

¹⁶ Yakundama kuli iye ngwo, Mutukatunga kuno malimba a yimuna jetu ni membo hali ana jetu akepe,

¹⁷ alioze yetwene mutukapwa a kulipakata mukuya kumeso ja A-Izalele, ndo mutukaahetesa kuma kwo: ana jetu akepe makatwama mu membo akwete yipanga mumu hali akwa chifuchi.

¹⁸ Kutuchi kahiluka ku mazuwo jetu, ndo A-Izalele mutu mweswe makahinga chihinga chenyi.

¹⁹ Mumu kutuchi kahinga hamwe no mu sali lia Yordau, ni kuze-kanda; mumu chihinga chetu twachiwana muno mu sali lia Yordau ku Chivumbuko.

²⁰ Mose yamba kuli ayo ngwenyi, Kachi munukalinga chuma chino, kachi munukalipakata mukuya kumeso ja Yehova ku jita,

²¹ kachi tujita eswe a yenu makazauka Yordau kumeso ja Yehova, ndo makahuma akwa kole jenyi kumeso jenyi,

²² kachi makazeyesa chifuchi kumeso ja Yehova; henaho kulutwe munukahiluka, munukasamba kuli Yehova ni kuli A-Izalele: chifuchi chino muchikapwa nichenu kumeso ja Yehova.

²³ Alioze nyi kunuchi kalinga chocho, kumanyi, nwavulumuna Yehova, nunyingike chamwenemwene, ngwami, shili yenu muyikanukumika.

²⁴ Tungilenu ana akepe membo, ni malimba a yimuna jenu, nulinge chize hinwamba.

²⁵ A-Ngate ni A-Rupene yamba kuli Mose ngwo, Etu ndungo jenu mutukalinga yeswe yena mwata wetu watwamba.

²⁶ Ana jetu akepe, ni mapwo jetu, ni mapanga jetu, ni yimuna jetu eswe kumakapwa mu membo ja Ngiliate.

²⁷ Alioze yetu ndungo jenu mutukazauka, malunga eswe, mutu ni mutu wa kulipakata ku jita, kumeso ja Yehova ku jita, ngwe mwata wetu anambe.

²⁸ Chocho Mose yahana shimbi ha kutwala kuli ayo, kuli sasendote Eleazare, ni kuli Yoshua, mwana Nune, ni kuli akwa lutwe a atato a mu minyachi ya A-Izalele.

²⁹ Mose yamba kuli ayo ngwenyi, Kachi A-Ngate ni A-Rupene makazauka Yordau hamwe ni yenu, malunga eswe, mutu ni mutu wa kulipakata ku jita, kumeso ja Yehova, kachi makazeyesa chifuchi kumeso jenu, henaho nukaahe chifuchi cha Ngiliate chikapwe nicho.

³⁰ Alioze kachi kechi kazauka hamwe ni yenu a kulipakata, akapwe ni chihinga hakachi kenu mu chifuchi cha Kanana.

³¹ A-Ngate ni A-Rupene yakumbulula ngwo, Chizechene ngwe Yehova hamba kuli yetu ndungo jenu, kumutukalinga.

³² Mutukazauka a kulipakata kumeso ja Yehova ni kunjila mu chifuchi cha Kanana, alioze chifuchi cha chihinga chetu muno mu sali lia Yordau hindu nichetu.

³³ Mose yahana kuli ayo, te kuli A-Ngate, ni kuli A-Rupene, ni ku chihanda cha ha muchima cha munyachi wa Manase, mwana José, wanangana wa Sahone, mwanangana wa A-Amore; ni wanangana wa Oge, mwanangana wa Mbashane, chifuchi ni membo jacho, hamwe ni njiza jacho, te membo a mu chifuchi cha kujingilika.

³⁴ A-Ngate yatunga Ndibone, ni Atarote, ni Aroere,

³⁵ ni Atarote-Sofa, ni Yazere, ni Jogabeha,

³⁶ ni Mbete-Nimera, ni Mbete-Harane, membo akwete yipanga, ni malimba a yimuna.

³⁷ A-Rupene yatunga Heshebone, ni Eleale, ni Kiriataime,

³⁸ ni Nebo, ni Mbale-meone (te yalumuna majina jo) ni Sibima: membo aze atungile yaaluka majina eka.

³⁹ Ana a Makire, mwana Manase, yaya ku Ngiliate yalilwa, yahuma A-Amore apwilemo.

⁴⁰ Mose yahana Ngiliate kuli Makire, mwana Manase, iye yatwamamo.

⁴¹ Njaire, mwana Manase, yaya yalwa yihunda yamo, yayiluka jina ngwenyi, Havote-Njaire.

⁴² Noba yaya, yalwa Kenate ni yihunda yalio, yaliluka jina ngwenyi, Noba nikulita ni jina lienyi mwene.