Kwalula 31 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Kalenu A-Izalele hali A-Mindiane; kulutwe makutwala yena kuli atu je.

³ Mose yamba kuli e atu ngwenyi, Hipakatenu malunga hakachi kenu aye ku jita, aye nikulimika ni A-Mindiane, mukulinga hali A-Mindiane kukala cha Yehova.

⁴ Ukatume ku jita kanunu wa ku munyachi, kanunu wa ku munyachi, ndusu ku minyachi yeswe ya A-Izalele.

⁵ Chocho yakunjika kumi lia tununu ni tununu aali, a kulipakata mukwasa jita, a ku tununu twa A-Izalele, ku munyachi weswe kanunu umuwika.

⁶ Mose yaatuma ku jita, ku munyachi weswe kanunu, no ni Finehase mwana wa sasendote Eleazare ku jita, hamwe ni yikashi ya muma musandu ni yitavwi ya kutoweza nayo mu kwoko lienyi.

⁷ O yasa jita ni A-Mindiane, chizechene ngwe Yehova ambile Mose. O yashiha malunga eswe.

⁸ Yashiha mianangana a A-Mindiane, hamuwika ni afu jo akwo: ni Evi, ni Rekeme, ni Zure, ni Hure, ni Reba, mianangana atano a A-Mindiane. Yashiha nawa ni katana Mbalau, mwana wa Mbeore.

⁹ A-Izalele yatwala funge mapwo ja A-Mindiane, ni ana jo akepe; ni yimuna jo eswe, ni mapanga jo eswe, ni yikumba yo yeswe, yayitwala.

¹⁰ Yocha ni kahia membo jo eswe muze atwamine, ni yilombo yo yeswe.

¹¹ Yatambula yikumba yeswe ni yuma yeswe ya kupupa, ni atu ni yimuna.

¹² Yahetesa funge ni yuma ya kupupa, ni yikumba kuli Mose ni kuli sasendote Eleazare, ni ku chikungulwila cha A-Izalele, ku chilombo mu yana ya Moape, yapwile ku sesa Ha Yordau, ku Yeriku.

¹³ Ni Mose ni sasendote Eleazare hamwe ni miata eswe a chikungulwila yatuhuka mukwapatwiza haze lia chilombo.

¹⁴ Mose yatenuka ni yilolo ya chizavu cha tujita, tupitau twa tununu, ni tupitau twa kulakaji te anahiluka ha kukatuka ku jita.

¹⁵ Mose yamba kuli ayo ngwenyi, Kuma! nunakalamwina mapwo eswe ni mwono wo nyi?

¹⁶ Ngwami, Wano, ku mana ja Mbalau yavulumwisa A-Izalele mulonga kuli Yehova ku chikuma cha Peore, chocho chilungo chapwile hakachi ka chikungulwila cha Yehova.

¹⁷ Kashika, haliapwila, shihenu malunga eswe hakachi ka ana akepe, shihenu mapwo eswe hapomba ni malunga.

¹⁸ Alioze ana eswe a mapwo, te kanda apomba ni malunga, lifungilenuo a mwono.

¹⁹ Nutwame haze lia chilombo matangwa shimbiali; mweswawo hashiha mutu, mweswawo hakwata ku mujimba wa mufu, lipemesenu ha tangwa liamuchitatu ni ha tangwa liamuchishimbiali, ni yenu ni funge jenu.

²⁰ Mba pemesenu mazalo eswe, ni yuma yeswe ya malambu, ni yuma yeswe ya kutunga ni wonawona wa pembe, ni yeswe ya kusonga ni mutondo.

²¹ Sasendote Eleazare yamba kuli tujita waze ayile ku jita ngwenyi, Chino chiyulo cha shimbi Yehova hamba Mose.

²² Hindu oru, ni prata, ni unengu, ni utale, ni chifoya, ni shumbu,

²³ yuma yeswe kuyichi kapiha mu kahia, nuyipalikise mu kahia, mba muyikapema. Chipwe chocho nuyipemese ni meya a kupemesa no luchisa. Yeswe muyipiha mu kahia, nuyinwise mu meya.

²⁴ Ha tangwa liamuchishimbiali nukose mazalo jenu, mba munukapema; kulutwe munukanjila mu chilombo.

²⁵ Yehova yamba kuli Mose ngwenyi,

²⁶ Yena ni sasendote Eleazare, ni akwa lutwe a atato a mu chikungulwila alulenu yuma yeswe ya kupupa, ni atu ni yimuna.

²⁷ Nwane ye yuma ya kupupa yihanda yiali. Nwanyine malunga ananyingika kwasa jita, atuhukile mukwasa, ni chikungulwila cheswe nawa.

²⁸ Utambule mulambu wa Yehova kuli malunga atuhukile ku jita: umuwika wa kuli kulakaji atano, ni wa kuli atu, ni wa ku ngombe, ni wa ku yimbulu, ni wa ku mapanga.

²⁹ Watambule a ku chihanda cho cha hakachi, uchihane kuli sasendote Eleazare, akapwe mulambu wa kuzundula kuli Yehova.

³⁰ Ku chihanda cha hakachi cha upite wa A-Izalele utambule umuwika wa ku makumi atano, ni wa kuli atu ni wa ku ngombe, ni wa ku yimbulu, ni wa ku mapanga, te wa ku yimuna eswe wahane kuli A-Levi, tulayi a tabernakulu ya Yehova.

³¹ Ni Mose ni sasendote Eleazare yalinga ngwe Yehova ambile Mose.

³² Achi, ye yuma ya kupupa, yize yasalile, tujita ayipunjile, yapwile kulakaji asambano a tununu, ni makumi shimbiali a tununu, ni tununu atano a mapanga,

³³ ni makumi shimbiali a tununu ni tununu aali a ngombe,

³⁴ ni makumi asambano a tununu ni kanunu umuwika wa yimbulu,

³⁵ ni makumi atatu a tununu ni tununu aali a atu, te eswe, a mapwo kanda achipomba ni lunga.

³⁶ Chihanda cha hakachi cha upite wa waze ayile ku jita chapwile kulakaji atatu a tununu ni makumi atatu a tununu ni tununu shimbiali ni kulakaji atano a mapanga.

³⁷ Mulambu wa Yehova wa ku mapanga wapwile kulakaji asambano ni makumi shimbiali ni atano.

³⁸ Ngombe apwile makumi atatu a tununu ni tununu asambano. Wa kuli ayo mulambu wa Yehova wapwile makumi shimbiali ni aali.

³⁹ Yimbulu apwile makumi atatu a tununu ni kulakaji atano. Wa kuli ayo mulambu wa Yehova wapwile makumi asambano ni umuwika.

⁴⁰ Atu apwile kumi lia tununu ni tununu asambano. Wa kuli ayo mulambu wa Yehova wapwile makumi atatu a atu ni atu aali.

⁴¹ Mose yahana we mulambu wa kuzundula wa Yehova kuli sasendote Eleazare, ngwe Yehova ambile Mose.

⁴² Ku chihanda cha hakachi cha upite wa A-Izalele, chize Mose wanyine nikuchiza kuli malunga ashile jita,

⁴³ achi chihanda cha hakachi cha upite wa chikungulwila chapwile kulakaji atatu a tununu ni makumi atatu a tununu ni tununu shimbiali ni kulakaji atano a mapanga,

⁴⁴ ni makumi atatu a tununu ni tununu asambano a ngombe,

⁴⁵ ni makumi atatu a tununu ni kulakaji atano a yimbulu,

⁴⁶ ni kumi lia tununu twa atu ni tununu asambano.

⁴⁷ Te a ku chihanda cha hakachi chapwile cha A-Izalele, Mose yachiza umuwika wa ku makumi atano, ni wa kuli atu ni wa ku yimuna, yaahana kuli A-Levi, tulayi a tabernakulu ya Yehova ngwe Yehova ambile Mose.

⁴⁸ Yilolo apwile helu lia tununu twa chizavu cha tujita, tupitau twa tununu ni tupitau twa kulakaji, yakundama kuli Mose.

⁴⁹ Yamba kuli Mose ngwo, Yetu ndungo jenu hitwalula tujita ali kuli yetu, kukwahonene lunga niumwe kuli yetu.

⁵⁰ Twaneha mulambu wa Yehova, mutu mweswe hawana, yuma ya uhenya ya oru, ni malenge, ni mikosa, ni tuzeya, ni yingelengele, ni yijingo, mukulifukila kumeso ja Yehova.

⁵¹ Mose ni sasendote Eleazare yatambula kuli ayo ye oru, te yuma ya uhenya ya kufula.

⁵² Ni oru yeswe ya mulambu wa kuzundula o alambwile kuli Yehova, ya kuli tupitau twa tununu, ni ya kuli tupitau twa kulakaji yapwile kumi lia tununu ni tununu asambano ni kulakaji shimbiali ni makumi atano a shekele.

⁵³ Mumu te tujita alichijilile yuma ku jita, mutu mweswe hali iye mwene.

⁵⁴ Mose ni sasendote Eleazare yatambula ye oru kuli tupitau twa tununu ni kuli tupitau twa kulakaji, yayihetesa ku mbalaka ya chikungulwila, yikapwe Chiwulwiso hali A Izalele kumeso ja Yehova.