Kwalula 30 - MUKANDA USANDU WA ZAMBI 1975

¹ Mose yamba kuli akwa lutwe a minyachi ya A-Izalele ngwenyi, Achi Yehova hanambe chino,

² Nyi lunga malakenya kuli Yehova chilakenyo chimwe, hanji malishinga ni shingo mukujilila mbunge yenyi ni yijilika, kanda akajilula liji lienyi, iye akalinge nikulita ni yeswe muyituhuka mu kanwa lienyi.

³ Nyi pwo nawa malakenya kuli Yehova chilakenyo chimwe mukulijilila ni chijilika, iye te ku jiko lia tato ali, achili mwana-pwo,

⁴ nyi tato mevwa chilakenyo chenyi ni chijilika chenyi hajilila nacho mbunge yenyi, tato mahola nenyi, mba yilakenyo yenyi yeswe kumuyikakola, ni yijilika yenyi yeswe hajilila nayo mbunge yenyi kumuyikakola.

⁵ Alioze nyi tato mamukanjisa ha lie tangwa iye mamwivwa, yilakenyo yenyi niyimwe, chipwe yijilika yenyi niyimwe iye hajilila nayo mbunge yenyi muyikola yakuhi. Yehova makamukonekena mumu te tato hamukanjisa.

⁶ Alioze nyi iye ku ulo ali kuli lunga shimbu malakenya chilakenyo, chipwe malipupula ni kanwa lienyi, ku chize hajilila nacho mbunge yenyi,

⁷ nyi mukwo lunga ha kuchivwa, mahola nenyi ha lie tangwa iye machivwa, mba yilakenyo yenyi kumuyikakola, ni yijilika yenyi hajilila nayo mbunge yenyi kumuyikakola.

⁸ Alioze nyi mukwo-lunga mamukanjisa ha lie tangwa iye mamwivwa, mba iye akajilule chilakenyo chapwile hali iye ni kulipupula cha kanwa lienyi iye hajilila nacho mbunge yenyi. Yehova kumakamukonekena.

⁹ A lioze chilakenyo cha twamishi, hanji cha pwo wa kulakula, yeswayo hajilila nayo mbunge yenyi kumuyikakola hali iye.

¹⁰ Kachi mwe pwo malakenya chilakenyo chimwe mu zuwo lia mukwo-lunga, chipwe iye hajilila mbunge yenyi ni chijilika hamwe ni shingo,

¹¹ nyi mukwo-lunga ha kuchivwa, mahola nenyi, kamukanjishileko, mba yilakenyo yenyi yeswe kumuyikakola, ni yijilika yeswe hajilila nayo mbunge yenyi kumuyikakola.

¹² Alioze nyi mukwo-lunga hayijilula liakulu ha lie tangwa iye wayivwile, mba yeswayo yatuhukile ku kanwa lienyi ha kutwala ku yilakenyo yenyi, chipwe ha kutwala ku chijilika cha mbunge yenyi kuyichi kakola, ka; mukwo-lunga te ha nayijilula. Yehova kumakamukonekena.

¹³ Yilakenyo yeswe ni mashingo eswe a kufwichisa mbunge, mukwo-lunga akayikolese, hanji mukwo-lunga akayijikile.

¹⁴ Alioze nyi mukwo-lunga pundu mahola nenyi tangwa ha tangwa, mba hanakolesa yilakenyo yenyi yeswe, chipwe yijilika yenyi yeswe yili hali iye. Hanayikolesa mumu ha kuhola nenyi lie tangwa wayivwile.

¹⁵ Alioze kachi iye mayijilula liakulu muze te iye hayivwa, kachi mwe lunga akambate uhenge wa pwo.

¹⁶ Yino ye yiyulo Yehova wambile Mose, hakachi ka lunga ni mukwopwo, ni hakachi ka chisemi ni mwanenyi wa pwo, iye te achili mwana-pwo nikutwama ku jiko lia tato.