Kwalula 3 - MUKANDA USANDU WA ZAMBI 1975

¹ Yisemuko ya Arone ni Mose ha tangwa lize Yehova yahanjika ni Mose ha mulundu wa Sinai, yino.

² Majina a ana a malunga a Arone wano: Nandambe, iye kapula-jimo, ni Ambihu, ni Eleazare, ni Itama.

³ Wano e majina a ana a malunga a Arone, asasendote a kuwayisa ni maji, iye yaatumbikila akalinge usasendote.

⁴ Ni Nandambe ni Ambihu yafwa kumeso ja Yehova muze alambwile kahia keka kumeso ja Yehova, mu puya ya Sinai. Kapwile ni ana. Eleazare ni Itama yalinga usasendote kumeso ja tato Arone.

⁵ Yehova yamba kuli Mose ngwenyi,

⁶ Ukundamise munyachi wa Levi. Uasele kumeso ja sasendote Arone hanga akamuvumbikile.

⁷ Akafunge ulayilo wenyi ni ulayilo wa chikungulwila cheswe kulutwe lia mbalaka ya chikungulwila, mukulinga uvumbiko wa mu tabernakulu.

⁸ O akalayile yikashi yeswe ya mu mbalaka ya chikungulwila ni ulayilo wa A-Izalele, mukulinga uvumbiko wa mu tabernakulu.

⁹ Ukahane A-Levi kuli Arone ni kuli ana jenyi a malunga. O ninyenyi liakulu hakachi ka A-Izalele.

¹⁰ Ukasele Arone ni ana jenyi a malunga akafunge usasendote wo. Nyi mukukundama umwe mukwo, akamushihe.

¹¹ Yehova yamba kuli Mose ngwenyi,

¹² Yami mwene hingunatambula A-Levi hakachi ka A-Izalele mukusalakana tupula-majimo eswe hakachi ka A-Izalele. A-Levi kumakapwa a yami,

¹³ mumu tupula-majimo eswe ninyami. Ha lie tangwa nalambile tupula-majimo eswe a mu chifuchi cha Engitu, tupula-majimo eswe a A-Izalele ni a atu ni a tushitu yingwasela ku usandu hali yami mwene. Kumakapwa a yami. Yami Yehova.

¹⁴ Mu puya ya Sinai Yehova yamba kuli Mose ngwenyi,

¹⁵ Alula A-Levi ku majiko ja atato, mu minyachi yo. Alula malunga eswe chize kuli akwa kakweji umuwika ndo kuli makulwana.

¹⁶ Mose yaalula nikulita ni liji lia Yehova, chizechene ngwe Yehova amwambile.

¹⁷ Ana a malunga a Levi, ku majina jo, wano: ni Ngeshone, ni Kohate, ni Merari.

¹⁸ Majina a ana a malunga a Ngeshone, mu minyachi yo, wano: ni Lipini, ni Shimei.

¹⁹ Ana a malunga a Kohate, mu minyachi yo, wano: ni Amarame, ni Izehare, ni Heprone, ni Uziele.

²⁰ Ana a malunga a Merari, mu minyachi yo, wano: ni Mahile, ni Mushi. Wano te minyachi ya A-Levi, nikulita ni majiko ja atato.

²¹ Munyachi wa A-Lipini ni munyachi wa Shimei a kuli Ngeshone. Wano e minyachi ya A-Ngeshone.

²² Ha kwalula malunga eswe, chize kuli akwa kakweji umuwika ndo kuli makulwana, a kwalula yapwa tununu shimbiali ni kulakaji atano.

²³ Minyachi ya A-Ngeshone akajikile mbalaka jo kunyima lia tabernakulu, ku sali lia ku Chitokelo.

²⁴ Eliasafe mwana Laele akapwe mwata wa jiko lia atato a A-Ngeshone.

²⁵ A-Ngeshone makalayila mu mbalaka ya chikungulwila yuma yino: ni tabernakulu ni mbalaka ni chifuko chayo, ni hina lia kufuka ku chikolo cha mbalaka ya chikungulwila,

²⁶ ni mahina a kuzezeleka a ku yize, ni hina lia kufuka ku chikolo cha yize yajingilika tabernakulu ni chilumbilo, ni mihipu yayo ya ha milimo yayo yeswe.

²⁷ Munyachi wa A-Amarame, ni munyachi wa A-Izehare, ni munyachi wa A-Heprone, ni munyachi wa A-Uziele a kuli Kohate. Wano e minyachi ya A-Kohate.

²⁸ Ha kwalula malunga eswe, chize kuli akwa kakweji umuwika ndo kuli makulwana, yapwa tununu nake ni kulakaji asambano, akulayila yuma ya muma musandu.

²⁹ Minyachi ya A-Kohate akajikile mbalaka jo ku sali lia ku Sule lia tabernakulu.

³⁰ Elizafane mwana Uziele akapwe mwata wa jiko lia atato, akwa minyachi ya A-Kohate.

³¹ Yuma o makalayila yino: ni mushete, ni mesa, ni chikwachilo cha ndeya, ni yilumbilo, ni yikashi ya muma musandu ya kuvumbikila, ni hina lia kufuka nalio, hamwe ni uvumbiko wamo weswe.

³² Eleazare, mwana wa sasendote Arone, akapwe mwata wa miata eswe a kuli A-Levi. Iye akapwe helu lia akwa kulayila yuma ya muma musandu.

³³ Munyachi wa A-Mahile ni A-Mushi a kuli Merari. Wano e minyachi ya Merari.

³⁴ Ha kwalula malunga eswe, chize kuli akwa kakweji umuwika ndo kuli makulwana, a kwalula yapwa tununu asambano ni kulakaji aali.

³⁵ Zuriele mwana Abiale akapwe mwata wa jiko lia atato, akwa minyachi ya Merari. O akajikile mbalaka jo ku sali lia ku Norte lia tabernakulu.

³⁶ Yasela A-Merari akalayile yuma yino: ni matabua a ku tabernakulu, ni njalo jo, ni manguji jo, ni yimanyino yo, hamwe ni yikashi yo yeswe, ni uvumbiko wayo weswe;

³⁷ ni manguji a ku yize ya kujingilika, ni yimanyino yo, ni mbambo jo, ni mihipu yo.

³⁸ Akwa kujikila mbalaka jo kulutwe lia tabernakulu ku sali lia ku Chivumbuko, kwe kulutwe lia mbalaka ya chikungulwila, ku Chivumbuko cha tangwa akapwe Mose ni Arone ni ana jenyi a malunga, akalayile yuma ya muma musandu, akalayile A-Izalele. Nyi mukukundama umwe mukwo, akamushihe.

³⁹ Eswe a kwalula a kuli A-Levi, a kwalula kuli Mose ni Arone ku liji lia shimbi ya Yehova, mu minyachi yo, malunga eswe chize kuli akwa kakweji umuwika ndo kuli makulwana, yapwa; makumi aali a tununu ni tununu aali.

⁴⁰ Yehova yamba kuli Mose ngwenyi, Alula malunga eswe tupula-majimo a A-Izalele, chize kuli akwa kakweji umuwika ndo kuli makulwana. Ualule ku majina jo.

⁴¹ Ungutambwile A-Levi—Yami Yehova—mukusalakana tupula-majimo eswe hakachi ka A-Izalele; yimuna ja A-Levi mukusalakana tupula-majimo eswe hakachi ka yimuna ja A-Izalele.

⁴² Mose yalula tupula-majimo eswe hakachi ka A-Izalele chizechene ngwe amwambile kuli Yehova.

⁴³ Malunga eswe tupula-majimo, nikulita ni kwalula cha majina, chize kuli akwa kakweji umuwika ndo kuli makulwana, a kwalula yapwa makumi aali a tununu ni tununu aali ni kulakaji aali ni makumi shimbiali ni atatu.

⁴⁴ Yehova yamba kuli Mose ngwenyi,

⁴⁵ Tambula A-Levi mukusalakana tupula-majimo eswe hakachi ka A-Izalele; yimuna ja A-Levi mukusalakana yimuna jo. A-Levi kumakapwa a yami. Yami Yehova.

⁴⁶ Ha ukule wa tupula-majimo a A-Izalele, waze halisalaho ha kwalula A-Levi, te kulakaji aali ni makumi shimbiali ni atatu,

⁴⁷ mutu mweswe anjile shekele jitano, nikulita ni shekele ya muma musandu. Shekele yimuwika yafwika makumi aali a ngera.

⁴⁸ Je mbongo ja kukula najo atu halisalaho ukajihane kuli Arone ni kuli ana jenyi a malunga.

⁴⁹ Mose yatambula mbongo ja ukule kuli e atu halisalaho kuli waze aakulile kuli A-Levi.

⁵⁰ Yatambula je mbongo kuli tupula-majimo a A-Izalele. Kanunu ka shekele ni kulakaji atatu ni makumi asambano hi shekele jitano, nikulita ni shekele ya muma musandu.

⁵¹ Mose yahana je mbongo ja ukule kuli Arone ni kuli ana jenyi a malunga, nikulita ni liji lia Yehova, chizechene ngwe Yehova ambile Mose.