Kwalula 29 - MUKANDA USANDU WA ZAMBI 1975

¹ Ha kakweji wamuchishimbiali, lie tangwa litangu lia mwe kakweji, nukapwe ni chikungulwila chisandu, kanda nukalingaho milimo niyeyimwe ya kuhondangana. Kuliapwa kuli yenu tangwa lia kwimba yitavwi.

² Nukalambule mulambu wa kulumba, wa lupembo mupema kuli Yehova, te chimbembe wa kuji umuwika, ni kuji ya panga umuwika, ni kuji a mapanga shimbiali a mwaka umuwika, keshi chipa;

³ ni mulambu wo wa wunga, te wunga wafufunuka, wa kuchinga ni maji, yihanda yitatu ya ku kumi lia yihanda hali mwe chimbembe wa kuji; yihanda yiali ya ku kumi lia yihanda hali mwe kuji ya panga;

⁴ chihanda chimuwika cha ku kumi lia yihanda hali mwanapanga mweswe wa kuli ana-mapanga shimbiali;

⁵ ni kuji ya pembe umuwika akapwe mulambu ha shili, wa kunufukila yenu.

⁶ Kuweza ku mulambu wa kulumba wa ha kakweji mwaha, ni mulambu wawo wa wunga, ni mulambu wa kulumba wa matangwa eswe, ni mulambu wawo wa wunga, ni milambu yayo ya kunwa, nikulita ni chiyulo chayo, yikapwe lupembo mupema, mulambu wa kahia kuli Yehova.

⁷ Ha tangwa liamuchikumi lia yono kakweji wamuchishimbiali nukapwe ni chikungulwila chisandu, nukafwichise mbunge jenu. Kanda nukalingaho milimo niyeyimwe, ka.

⁸ Nukalambule kuli Yehova mulambu wa kulumba wa lupembo mupema: te chimbembe wa kuji umuwika, ni kuji ya panga umuwika, ni kuji a mapanga shimbiali a mwaka umuwika. Akapwe kuli yenu keshi chipa.

⁹ Ni mulambu wo wa wunga, te wunga wafufunuka, wa kuchinga ni maji, yihanda yitatu ya ku kumi lia yihanda hali mwe chimbembe wa kuji; yihanda yiali ya ku kumi lia yihanda hali mwe kuji ya panga;

¹⁰ chihanda chimuwika cha ku kumi lia yihanda hali mwanapanga mweswe wa kuli ana-mapanga shimbiali;

¹¹ ni kuji ya pembe umuwika akapwe mulambu ha shili, kuweza ku mulambu ha shili wa kufuka, ni mulambu wa kulumba wa matangwa eswe, ni mulambu wawo wa wunga, ni milambu yayo ya kunwa.

¹² Ha tangwa kumi ni liamuchitano lia kakweji wamuchishimbiali nukapwe ni chikungulwila chisandu. Kanda nukalingaho milimo niyeyimwe ya kuhondangana. Nukafungile Yehova chiwanyino cha matangwa shimbiali.

¹³ Nukalambule mulambu wa kulumba, mulambu wa kahia, wa lupembo mupema kuli Yehova, te, yimbembe a kuji kumi ni atatu, ni kuji a mapanga aali, ni kuji a mapanga a mwaka umuwika kumi ni awana. Akapwe keshi chipa.

¹⁴ Ni mulambu wo wa wunga, te wunga wafufunuka, wa kuchinga ni maji, yihanda yitatu ya ku kumi lia yihanda hali chimbembe wa kuji mweswe wa kuli e yimbembe a kuji kumi ni atatu; yihanda yiali ya ku kumi lia yihanda hali kuji ya panga mweswe wa kuli e kuji a mapanga aali;

¹⁵ chihanda chimuwika cha ku kumi lia yihanda hali mwanapanga mweswe wa kuli ana-mapanga kumi ni awana;

¹⁶ ni kuji ya pembe umuwika akapwe mulambu ha shili, kuweza ku mulambu wa kulumba wa matangwa eswe, ni mulambu wawo wa wunga, ni mulambu wawo wa kunwa.

¹⁷ Ha tangwa liamuchiali nukalambule yimbembe a kuji kumi ni aali, ni kuji a mapanga aali, ni kuji a mapanga a mwaka umuwika kumi ni awana, keshi chipa,

¹⁸ ni mulambu wo wa wunga, ni milambu yo ya kunwa hali e yimbembe a kuji, ni hali kuji a mapanga, ni hali ana-mapanga, nikulita ni kwalula cho, ku chiyulo.

¹⁹ Kuji ya pembe umuwika akapwe mulambu ha shili, kuweza ku mulambu wa kulumba wa matangwa eswe, ni mulambu wawo wa wunga, ni milambu yayo ya kunwa.

²⁰ Ha tangwa liamuchitatu, yimbembe a kuji kumi ni umuwika, ni kuji a mapanga aali, ni kuji a mapanga a mwaka umuwika kumi ni awana, keshi chipa,

²¹ ni mulambu wo wa wunga, ni milambu yo ya kunwa hali e yimbembe a kuji, ni hali kuji a mapanga, ni hali ana-mapanga, nikulita ni kwalula cho, ku chiyulo.

²² Kuji ya pembe umuwika akapwe mulambu ha shili, kuweza ku mulambu wa kulumba wa matangwa eswe, ni mulambu wawo wa wunga, ni mulambu wawo wa kunwa.

²³ Ha tangwa liamuchiwana, yimbembe a kuji kumi, ni kuji a mapanga aali, ni kuji a mapanga a mwaka umuwika kumi ni awana, keshi chipa,

²⁴ ni mulambu wo wa wunga, ni milambu yo ya kunwa hali e yimbembe a kuji, ni hali kuji a mapanga, ni hali ana mapanga, nikulita ni kwalula cho, ku chiyulo.

²⁵ Kuji ya pembe umuwika akapwe mulambu ha shili, kuweza ku mulambu wa kulumba wa matangwa eswe, ni mulambu wawo wa wunga, ni mulambu wawo wa kunwa.

²⁶ Ha tangwa liamuchitano, yimbembe a kuji livwa, ni kuji a mapanga aali, ni kuji a mapanga a mwaka umuwika kumi ni awana, keshi chipa,

²⁷ ni mulambu wo wa wunga, ni milambu yo ya kunwa hali e yimbembe a kuji, ni hali kuji a mapanga, ni hali ana-mapanga, nikulita ni kwalula cho, ku chiyulo.

²⁸ Kuji ya pembe umuwika akapwe mulambu ha shili, kuweza ku mulambu wa kulumba wa matangwa eswe, ni mulambu wawo wa wunga, ni mulambu wawo wa kunwa.

²⁹ Ha tangwa liamuchisambano, yimbembe a kuji nake, ni kuji a mapanga aali, ni kuji a mapanga a mwaka umuwika kumi ni awana, keshi chipa,

³⁰ ni mulambu wo wa wunga, ni milambu yo ya kunwa hali e yimbembe a kuji, ni hali kuji a mapanga, ni hali ana-mapanga, nikulita ni kwalula cho, ku chiyulo.

³¹ Kuji ya pembe umuwika akapwe mulambu ha shili, kuweza ku mulambu wa kulumba wa matangwa eswe, ni mulambu wawo wa wunga, ni mulambu wawo wa kunwa.

³² Ha tangwa liamuchishimbiali, yimbembe a kuji shimbiali, ni kuji a mapanga aali, ni kuji a mapanga a mwaka umuwika kumi ni awana, keshi chipa,

³³ ni mulambu wo wa wunga, ni milambu yo ya kunwa hali e yimbembe a kuji, ni hali kuji a mapanga, ni hali ana-mapanga, nikulita ni kwalula cho, ku chiyulo.

³⁴ Kuji ya pembe umuwika akapwe mulambu ha shili, kuweza ku mulambu wa kulumba wa matangwa eswe, ni mulambu wawo wa wunga, ni mulambu wawo wa kunwa.

³⁵ Ha tangwa liamuchinake nukapwe ni chikungulwila chilemu. Kanda nukalinga milimo niyeyimwe ya kuhondangana.

³⁶ Nukalambule mulambu wa kulumba, mulambu wa kahia, wa lupembo mupema kuli Yehova: chimbembe wa kuji umuwika, ni kuji ya panga umuwika, ni kuji a mapanga shimbiali a mwaka umuwika, keshi chipa,

³⁷ ni mulambu wo wa wunga, ni milambu yo ya kunwa hali mwe chimbembe wa kuji, ni hali kuji ya panga, ni hali ana mapanga, nikulita ni kwalula cho, ku chiyulo.

³⁸ Kuji ya pembe umuwika akapwe mulambu ha shili, kuweza ku mulambu wa kulumba wa matangwa eswe, ni mulambu wawo wa wunga, ni mulambu wawo wa kunwa.

³⁹ Ye yino nukalambule kuli Yehova ha yiwanyino yenu ya kutongola, kuweza ku milambu yenu ya yilakenyo, ni milambu yenu ya mbunge, yikapwe milambu yenu ya kulumba, yikapwe milambu yenu ya wunga, yikapwe milambu yenu ya kunwa, yikapwe milambu yenu ya sambukila.

⁴⁰ Mose yambulwila A-Izalele nikulita ni yeswe Yehova ambile Mose.