Kwalula 28 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Amba A-Izalele ngwe, Mulambu wami, kulia chami cha milambu yami ya kahia, ya lupembo mupema kuli yami, nukanyame kungutambula ha miaka yayo.

³ Wambe kuli ayo ngwe, Mulambu wa kahia nukalambule kuli Yehova, uno: kuji a mapanga aali a mwaka umuwika, keshi chipa, aali ha tangwa, aali ha tangwa, akapwe mulambu wa kulumba wa matangwa eswe.

⁴ Mwanapanga umuwika ukamulambule ha chimene, ni umuwika ukamulambule ha chingoloshi;

⁵ ni chihanda chimuwika cha ku kumi lia yihanda ya efa ya wunga wafufunuka chikapwe mulambu wa wunga, wa kuchinga ni chihanda chimuwika cha ku yihanda yiwana ya hine ya maji a kusohola.

⁶ Kuchapwa mulambu wa kulumba wa matangwa eswe, aukolesele ku mulundu wa Sinai, ukapwe lupembo mupema, mulambu wa kahia kuli Yehova.

⁷ Ni mulambu wawo wa kunwa ukapwe wa chihanda chimuwika cha ku yihanda yiwana ya hine, hali mwanapanga umuwika. Muma musandu Ukazujile Yehova mulambu wa kunwa chisasu.

⁸ Mwanapanga mukwo, ukamulambule ha chingoloshi, chizechene ngwe wakulambula mulambu wa wunga ni mulambu wawo wa kunwa ha chimene, mulambu wa kahia, wa lupembo mupema kuli Yehova.

⁹ Ha tangwa lia Sambata kuji a mapanga aali a mwaka umuwika keshi chipa, ni yihanda yiali ya ku kumi lia yihanda ya efa ya wunga wafufunuka, yikapwe mulambu wa wunga, wa kuchinga ni maji, hamwe ni mulambu wawo wa kunwa.

¹⁰ Uno we mulambu wa kulumba, Sambata ha Sambata, kuwezaho mulambu wa kulumba wa matangwa eswe ni mulambu wawo wa kunwa.

¹¹ Ha kuputuka cha tukweji twenu, nukalambule kuli Yehova mulambu wa kulumba: yimbembe aali a kuji, ni kuji ya panga umuwika, ni kuji a mapanga shimbiali a mwaka umuwika, keshi chipa;

¹² ni yihanda yitatu ya ku kumi lia yihanda ya efa ya wunga wafufunuka yikapwe mulambu wa wunga, wa kuchinga ni maji, hali chimbembe mweswe; ni yihanda yiali ya ku kumi lia yihanda ya wunga wafufunuka yikapwe mulambu wa wunga, wa kuchinga ni maji, hali mwe kuji ya panga;

¹³ ni chihanda chimuwika cha ku kumi lia yihanda ya wunga wafufunuka, wa kuchinga ni maji, chikapwe mulambu wa wunga hali mwanapanga mweswe; mukupwa mulambu wa kulumba, wa lupembo mupema kuli Yehova, mulambu wa kahia.

¹⁴ Ni milambu yo ya kunwa yikapwe ya chihanda cha hakachi cha hine ya vinyu hali chimbembe wa kuji, ni chihanda chimuwika cha ku yihanda yitatu ya hine hali mwe kuji ya panga, ni chihanda chimuwika cha ku yihanda yiwana ya hine hali mwanapanga. Uno we mulambu wa kulumba wa kakweji ha kakweji, ndusu tukweji twa mwaka.

¹⁵ Kuji ya pembe umuwika akapwe mulambu ha shili kuli Yehova: akaulambule kuweza ku mulambu wa kulumba wa matangwa eswe ni mulambu wawo wa kunwa.

¹⁶ Ha kakweji mutangu, ha tangwa kumi ni liamuchiwana lia mwe kakweji chapwa Chizomboka cha Yehova.

¹⁷ Ha tangwa kumi ni liamuchitano lia kakweji yoze chiwanyino chikapweko. Akalie mbolo kuyishi futunwiso ha matangwa shimbiali.

¹⁸ Ha tangwa litangu hakapwe chikungulwila chisandu. Kanda nulingaho milimo niyeyimwe ya kuhondangana.

¹⁹ Nukalambule mulambu wa kahia, mulambu wa kulumba kuli Yehova: yimbembe aali a kuji, ni kuji ya panga umuwika, ni kuji a mapanga shimbiali a mwaka umuwika; o akapwe kuli yenu keshi chipa.

²⁰ Ni mulambu wo wa wunga, te wunga wafufunuka, wa kuchinga ni maji: yihanda yitatu ya ku kumi lia yihanda ukalambwile chimbembe wa kuji mweswe. Yihanda yiali ya ku kumi lia yihanda hali mwe kuji ya panga.

²¹ Chihanda chimuwika cha ku kumi lia yihanda ukalambwile mwanapanga mweswe wa kuli ana-mapanga shimbiali.

²² Kuji ya pembe umuwika akapwe mulambu ha shili, wa kunufukila yenu.

²³ Nukalambule yino ya kuweza ku mulambu wa kulumba wa chimene kuwapwa mulambu wa kulumba wa matangwa eswe.

²⁴ Nukalambule nikulita ni ndako yino tangwa ha tangwa, ha matangwa shimbiali, kulia cha mulambu wa kahia, cha lupembo mupema kuli Yehova. Nukachilambule kuweza ku mulambu wa kulumba wa matangwa eswe ni mulambu wawo wa kunwa.

²⁵ Ha tangwa liamuchishimbiali nukapwe ni chikungulwila chisandu. Kanda nukalingaho milimo niyeyimwe ya kuhondangana.

²⁶ Ha tangwa lia mbuto yitangu nawa, ha kulambula kuli Yehova mulambu waha wa wunga, ha chiwanyino chenu cha masemana, nukapwe ni chikungulwila chisandu. Kanda nukalingaho milimo niyeyimwe ya kuhondangana.

²⁷ Alioze nukalambule mulambu wa kulumba, wa lupembo mupema kuli Yehova, te yimbembe aali a kuji, ni kuji ya panga umuwika, ni kuji a mapanga shimbiali a mwaka umuwika;

²⁸ ni mulambu wo wa wunga, te wunga wafufunuka, wa kuchinga ni maji: yihanda yitatu ya ku kumi lia yihanda hali chimbembe wa kuji mweswe. Yihanda yiali ya ku kumi lia yihanda hali kuji ya panga mweswe.

²⁹ Chihanda chimuwika cha ku kumi lia yihanda hali mwanapanga mweswe wa kuli ana-mapanga shimbiali.

³⁰ Kuji ya pembe umuwika akanufukile.

³¹ Kuweza ku mulambu wa kulumba wa matangwa eswe, ni mulambu wawo wa wunga, nukaalambule, ni milambu yo ya kunwa, o akapwe kuli yenu keshi chipa.