Kwalula 27 - MUKANDA USANDU WA ZAMBI 1975

¹ Hohene kwakundamine ana a mapwo a Zelofehade, mwana wa Hefere, mwana wa Ngiliate, mwana wa Makire, mwana wa Manase, a kuli akwa minyachi ya Manase, mwana wa José. Majina ja ana jenyi a mapwo ano, Mala, ni Noe, ni Hogala, ni Milika, ni Tiriza.

² O yamana kumeso ja Mose ni kumeso ja sasendote Eleazare, ni kumeso ja miata ni chikungulwila cheswe, ku chikolo cha mbalaka ya chikungulwila, ngwo,

³ Tata wafwile mu puya, iye kapwile hakachi ka mbunga ya atu alikungulwile nikulimika ni Yehova, mu mbunga ya Kora, hindu iye yafwa ni mutonga wenyi mwene. Kapwile ni ana a malunga.

⁴ Kuchi te jina lia tata malichiza kuli akwa munyachi wenyi mumu kapwile ni mwana wa lunga? Atwehe, tukazuke hakachi ka ana-akwo a tata.

⁵ Mose yahetesa chikuma cho kumeso ja Yehova.

⁶ Yehova yamba kuli Mose ngwenyi,

⁷ Ana a mapwo a Zelofehade pundu anahanjika. Chamwenemwene ukaahe akazuke chihinga hakachi ka ana-akwo a tato. Ukaahingise chihinga cha tato.

⁸ Amba kuli A-Izalele ngwe, Nyi mafwa umwe lunga keshi mwana wa lunga, mba ukahingise mwanenyi wa pwo chihinga chenyi.

⁹ Nyi iye keshi mwana wa pwo, Ukahane chihinga chenyi kuli ana-akwo.

¹⁰ Nyi keshi ana-akwo Ukahane chihinga chenyi kuli ana-akwo a tato.

¹¹ Nyi tato keshi ni ana-akwo, Ukahane chihinga chenyi kuli usoko wenyi walihata nenyi wa kuli atu jenyi, iye akachizuke. Chikapwe kuli A Izalele chiyulo cha upatwilo, chizechene ngwe Yehova wambile Mose.

¹² Yehova yamba kuli Mose ngwenyi, Ukanduke ha mulundu uno wa Aparime utale chifuchi hingunahana kuli A-Izalele.

¹³ Muze hiwachimona makutwala nawa kuli atu je, ngwe atwalile yayenu Arone.

¹⁴ Mumu te nwakolemene liji liami mu puya ya Zini ha kulitachika cha chikungulwila, ha chikuma cha kungusela ku usandu ku chikuma cha meya kumeso jo. Meya ano, meya a Meripa ku Kandeshe mu puya ya Zini.

¹⁵ Mose yamba kuli Yehova ngwenyi,

¹⁶ Yehova, Zambi ya maspiritu a atu eswe, asakule umwe lunga wa helu lia chikungulwila,

¹⁷ akapwe nikutuhwoka kulutwe lio, akapwe nikunjilanjila kulutwe lio, akapwe nikwatwala haze, akapwe nikwanjisa, kuchina chikungulwila cha Yehova muchipwa ngwe mapanga keshi kafunga.

¹⁸ Yehova yamba kuli Mose ngwenyi, Utwale Yoshua, mwana wa Nune, lunga muli iye Spiritu mwali, usayike kwoko lie hali iye.

¹⁹ Umusele kumeso ja sasendote Eleazare, ni kumeso ja chikungulwila cheswe, ukamwehe shimbi kumeso jo.

²⁰ Usele hali iye chihanda cha ulemu we, hanga chikungulwila cheswe cha A-Izalele akazeye.

²¹ Amane kumeso ja sasendote Eleazare, iye mamuhulila ku upatwilo wa Urimi kumeso ja Yehova; ku liji lienyi o akapwe nikutuhwoka, ni ku liji lienyi akapwe nikunjilanjila, neye ni A-Izalele eswe hamwe nenyi, che chikungulwila cheswe.

²² Mose yalinga chizechene ngwe Yehova amwambile; yatwala Yoshua, yamusela kumeso ja sasendote Eleazare, ni kumeso ja chikungulwila cheswe.

²³ Yasayika moko jenyi hali iye, yamwaha shimbi chizechene ngwe Yehova ambile ku kanwa lia Mose.