Kwalula 25 - MUKANDA USANDU WA ZAMBI 1975

¹ A-Izalele atwamine ku Shitime, e atu yaputuka kulinga ukoi hamwe ni ana-mapwo a Moape.

² Mumu o yasanyika e atu ku yitapo ya tuzambi two. Atu yaha, yafukama ku tuzambi two.

³ A-Izalele yalinunga ni Mbale-Peore. Utenu wa Yehova yiukasumukina A-Izalele.

⁴ Yehova yamba kuli Mose ngwenyi, Utwale akwa lutwe eswe a atu, wasukike kumeso ja Yehova ha mwalwa, hanga utenu usasu wa Yehova ukakatuke kuli A-Izalele.

⁵ Mose yamba kuli akwa kuyula a A-Izalele ngwenyi, Mutu ni mutu ashihe malunga jenyi waze unalinungu ni Mbale-Peore.

⁶ Kumanyi! Kwahetele umwe wa kuli A-Izalele nikutwala kuli usoko wenyi umwe pwo Ka-Mindiane kumeso ja Mose ni kumeso ja chikungulwila cheswe cha A-Izalele, shimbu o machilila masoji ku chikolo cha mbalaka ya chikungulwila.

⁷ Finehase, mwana wa Eleazare, mwana wa sasendote Arone, ha kuchimona, yakatuka hakachi ka chikungulwila, nikukwata kunga mu kwoko lienyi.

⁸ Yahanga mwe lunga Ka Izalele ndo mu mbalaka, yaatuwa ndusu, eswe ni aali, ni mwe Ka-Izalele, ni mwe pwo ndusu mu mujimba wenyi. Chocho chilungo yichihwa kuli A-Izalele.

⁹ Hindu afu a ku chilungo apwile makumi aali a tununu ni tununu awana.

¹⁰ Yehova yamba kuli Mose ngwenyi,

¹¹ Finehase, mwana wa Eleazare, mwana wa sasendote Arone, hanakondolola utenu wami kuli A-Izalele, mumu te iye yevwa ukwa umuwika ni uze yami nevwile nawa. Chocho chamanwine A-Izalele ni ukwa wami.

¹² Kashika, amba ngwe, Ngunanwehe iye usendo wami wa sambukila.

¹³ Kumuukapwa kuli iye ni kuli ana jenyi kulutwe lienyi, we usendo wa usasendote wa mutolo; mumu te iye yevwa ukwa mumu hali Zambi yenyi, yafukila A-Izalele.

¹⁴ Achi, jina lia mwe lunga Ka-Izalele yoze amushihile, amushihile hamwe ni mwe pwo Ka-Mindiane, liapwile Zimiri, mwana wa Salu, mwata wa akwa jiko lia tato hakachi ka A-Simeone.

¹⁵ Jina lia mwe pwo Ka-Mindiane, yoze amushihile, liapwile Ko shipi, mwana wa pwo wa Zure. Zure wapwile mukwa lutwe wa akwa jiko limwe mu Mindiane.

¹⁶ Yehova yamba kuli Mose ngwenyi,

¹⁷ Pinjisenu A-Mindiane, nwalambe,

¹⁸ mumu o kananupinjisa yenu ni yongo yo, hananwongo nayo ku chikuma cha Peore, ni ku chikuma cha Koshipi, mwana wa pwo wa mwata wa A-Mindiane, ndumbwo, amushihile ha tangwa lia chilungo, ku chikuma cha Peore.