Kwalula 24 - MUKANDA USANDU WA ZAMBI 1975

¹ Muze Mbalau hamona te chinapemena Yehova kuwahisa Izalele, kayile ngwe matangwa akwo akafupe kupanda, alioze yatalikisa meso jenyi ku puya.

² Mbalau yahetula meso jenyi, yamona Izalele o te kanatwama nikulita ni minyachi yo. Spiritu ya Zambi yapwila hali iye.

³ Yata chishima chino ngwenyi, Maliji a Mbalau, mwana Mbeore, maliji a yoze walaula meso,

⁴ Maliji a yoze wakwivwa maliji a Zambi, Iye anamono usolwelo wa Mukwa-Ndundo-Jeswe, Kanalimbuka, kanalaula meso.

⁵ Yakomba, mbalaka jenu cho kupema! Izalele, yilombo yenu cho kuwaha!

⁶ Yinalizaze ngwe yikulo, ngwe yala ya ku mbumbulu ya lwiji, Ngwe mitondo ya aloa ya kutumba kuli Yehova, Ngwe mitondo ya sedru ku sesa lia lwiji.

⁷ Meya makasupwoka ku swaha jenyi. Akwa munyachi wenyi makatwama ku meya anji. Mwanangana wenyi makapwa musuku, Agage mwilu. Wanangana wenyi kumuukanangama.

⁸ Zambi yamuchiza ku Engitu. Kumumona, ngwe iye kali ni tachi ja mbau. Kumakamanuna akwa mavungu, akwa kulimika nenyi. Kumakamakuna yifwaha yo tuyipinji. Kumakaatuwa ndusu ni mivi yenyi.

⁹ Yapotoka, yautama ngwe ndumba, ni ngwe ndumba wa chihwo, iya mamukatwisa? Kawaha eswe mawahisa yena. Kashingiwa eswe mashinga yena.

¹⁰ Utenu wa Mbalake yiukasumukina Mbalau, yalinga pwa ni moko jenyi. Mbalake yamba kuli Mbalau ngwenyi, Nakusanyikine ukashinge akwa kole jami. Kutala! Yena hiunaawahisa liakulu kano katatu.

¹¹ Kashika, haliapwila, yako, uchinyine ku mahienu. Nanyonga ngwami, Mungukunangamisa ni ulemu wunji, ahoze kumanyi, Yehova hakumina ulemu.

¹² Mbalau yamba kuli Mbalake ngwenyi, Te chambile kuli mikeji je waze waatumine kuli yami ngwami,

¹³ Kachi Mbalake mangwaha zuwo lienyi lia tò ni prata ni oru, chichi kuzomboka liji lia Yehova, mukulinga chipema, hanji chipi, cha ku mbunge ya yami mwene, ka; cheswacho mamba Yehova chenacho mungwamba yami.

¹⁴ Kumanyi, haliapwila munguya kuli atu jami: mungukulweza chize wano atu makalinga kuli atu je ha matangwa a kusula.

¹⁵ Yata chishima chino ngwenyi, Maliji a Mbalau, mwana Mbeore, maliji a yoze walaula meso,

¹⁶ Maliji a yoze wakwivwa maliji a Zambi, kananyingika yinyingi ya mwe Chitunda, Kanamono usolwelo wa Mukwa-Ndundo-Jeswe, kanalimbuka, kanalaula meso.

¹⁷ Ngunamumono, ahoze hi haliapwila ko; ngunamutale, ahoze hi hakamwihi ko: Kumukuvumbuka Lutongonoshi wa kuli Yakomba, Lukanda kumakasoloka muli Izalele. Kumakalemeka ndusu mahuma ja A-Moape. Kumakanunguna ana eswe a Shete.

¹⁸ Makakundukila Endome; Sere nawa, akwa kole jenyi, makaakundukila, shimbu Izalele machilinga ni utunu.

¹⁹ Umwe wa kuli Yakomba makayula. Kumakonwona atu a piliwij a mu membo.

²⁰ Iye yatala Amaleke, yata chishima chino ngwenyi, Amaleke wapwile mutangu wa mavungu, kusula-songo lienyi kumulikapwa ha kwonwona.

²¹ Yatala A-Kene, yata chishima chino ngwenyi, Chijima che kuchakola, chaswa che cha kutunga mu liwe;

²² Chipwe chocho A-Kene kumakahwa. Ndo mwaka uka Ashure makanutwala funge?

²³ Iye yata chishima chino ngwenyi, Mama yami! Iya matwama ni mwono muze Zambi malinga chino?

²⁴ Alioze mato meza kukatuka ku mbaka ya Kitime. Kumakayindamisa Ashure, kumakayindamisa Epere. Kwonwona muchiheta kuli iye nawa.

²⁵ Mbalau yakatuka, yaya nikuhiluka ku mahio. Ni Mbalake nawa yaya kwenyi.