Kwalula 23 - MUKANDA USANDU WA ZAMBI 1975

¹ Mbalau yamba kuli Mbalake ngwenyi, Ungutungile kuno yilumbilo shimbiali, ungululikile kuno kuji a ngombe shimbiali ni kuji a mapanga shimbiali.

² Mbalake yalinga chizechene ngwe Mbalau te hamba; ni Mbalake ni Mbalau yalambula kuji ya ngombe umuwika ni kuji ya panga umuwika ha chilumbilo ni chilumbilo.

³ Mbalau yamba kuli Mbalake ngwenyi, Umanyine yena ku mulambu we wa kulumba, yami munguya; hanji Yehova meza mukutakana ni yami; cheswacho mangulweza, yami mungukwambulwilacho. Mba iye yaya ku mulundu umwe.

⁴ Zambi yatakana ni Mbalau, mba Mbalau yamba kuli iye ngwenyi, Hinalulika yilumbilo shimbiali, hinalambula kuji ya ngombe umuwika ni kuji ya panga umuwika ha chilumbilo ni chilumbilo.

⁵ Yehova yasa liji limwe mu kanwa lia Mbalau ngwenyi, Hiluka kuli Mbalake, wambe chino.

⁶ Iye yahiluka, kutala, iye te kanamanyina ku mulambu wenyi wa kulumba, neye ni miata eswe a Moape.

⁷ Yata chishima chino ngwenyi, Mbalake wanguchijile ku Arame, iye mwanangana wa Moape yanguchiza ku milundu ya ku Chivumbuko; Ngwenyi, Tweya, ungushingile Yakomba, tweya utenukine Izalele!

⁸ Ngwe kuchi mungushinga umwe Zambi kamushingile? Ngwe kuchi mungutenukina umwe Yehova kamutenukinyine?

⁹ Ku mbulwa mawe ngunamumono iye. Ku milundu ngunamutale iye. Kutala! O kapwa atu a kutwama ukawo. Kechi kaalula mukachi ka mavungu!

¹⁰ Iya mahasa kwalula fufuta ya Yakomba? Hanji iya mahasa kuvuluka mutu ni mutu wa ku chihanda chimuwika cha ku yihanda yiwana ya kuli A-Izalele? Ngufwe ngwe mafwa mukwa ululi. Kusula-songo liami likapwe ngwe lia iye!

¹¹ Mbalake yamba kuli Mbalau ngwenyi, Kuchi wangulinga? Nakutwalanga ukashinge akwa kole jami. Kumanyi, hiunaawahisa liakulu.

¹² Iye yakumbulula ngwenyi, Te chichi kukanyama ngwambe yeswe Yehova masa mu kanwa liami, nyi?

¹³ Mbalake yamba kuli iye ngwenyi, Tweya kweka hamwe ni yami, koko muhasa kwamona. Mumona atu a ku songo wika, kuchi kwamona eswe, ka. Mba kwenako ungushingilo.

¹⁴ Yamutwala ku chifuchi cha Zofime, ndo ku mbulwa Pisiga, yatunga yilumbilo shimbiali, yalambula kuji ya ngombe umuwika, ni kuji ya panga umuwika ha chilumbilo ni chilumbilo.

¹⁵ Yamba kuli Mbalake ngwenyi, Umanyine kuno ku mulambu we wa kulumba shimbu mungutakana ni Yehova aku.

¹⁶ Yehova yatakana ni Mbalau, yasa liji limwe mu kanwa lienyi ngwenyi, Hiluka kuli Mbalake, wambe chino.

¹⁷ Yaheta kuli iye, kutala, iye te kanamanyina ku mulambu wenyi wa kulumba, ni miata ja Moape hamwe nenyi ali. Mbalake yamba kuli iye ngwenyi, Yehova kuchi hamba?

¹⁸ Yata chishima chino ngwenyi, Mbalake, katuka, wivwe! Ena, mwana wa Zepore, upanjike kuli yami!

¹⁹ Zambi hi mutu ko ahanjike mahuza, ka; chipwe mwana wa mutu, alikonyeke, ka. Hamba chimwe chuma, kechi kuchilinga? Hanji hachihanjika chimwe chuma, mba kechi kuchimanununa?

²⁰ Hinatambula shimbi ya kuwahisa. Iye hanawahisa, yami chichi kuhasa kuchalumuna.

²¹ Kamwene uhenge muli Yakomba, chipwe kumona uhuka mu Izalele, kaumweneko. Yehova Zambi yenyi hamuwika nenyi ali. Mutambi wa mwanangana uli hakachi ko.

²² Zambi yamuchiza ku Engitu. Kumumona, ngwe iye kali ni tachi ja mbau.

²³ Chamwenemwene kupanda chakuhi hali Yakomba, chipwe kutaha kuchishiko hali Izalele. Haliapwa machihanjika hali Yakomba ni hali Izalele ngwo, Yuma yipwa haha Zambi hanalingi!

²⁴ Kutala! E atu kanakatuka ngwe ndumba wa chihwo, kanahetuka ngwe ndumba. Kechi kautama nawa ndo malia yifwo iye hashiha, ndo manwa manyinga a waze iye hashiha.

²⁵ Mbalake yamba kuli Mbalau ngwenyi, Chipwe kwashinga kanda washinga nichimwe, chipwe kwawahisa yena kanda wawahisa nichimwe.

²⁶ Hindu Mbalau yakumbulula kuli Mbalake ngwenyi, Chakwambile ngwami, Yeswe Yehova mamba changutamba kulinga nyi?

²⁷ Mbalake yamba kuli Mbalau ngwenyi, Tweya haliapwila, mungukutwala kweka; hanji muchipemena Zambi ukangushingilo kuze.

²⁸ Mbalake yatwala Mbalau ku mbulwa Peore, kwa kutalikisa ku mwanda ku puya.

²⁹ Mbalau yamba kuli Mbalake ngwenyi, Ungutungile kuno yilumbilo shimbiali, ungululikile kuno kuji a ngombe shimbiali ni kuji a mapanga shimbiali.

³⁰ Mbalake yalinga ngwe Mbalau hamba. Yalambula kuji ya ngombe umuwika ni kuji ya panga umuwika ha chilumbilo ni chilumbilo.