Kwalula 22 - MUKANDA USANDU WA ZAMBI 1975

¹ A-Izalele ayile mu wenyi wo, mba mu yana ya Moape, mu sali lia Yordau, yasa chilombo cho ku Yeriku.

² Mbalake, mwana wa Zepore, yamona yize yeswe A-Izalele alingile kuli A-Amore.

³ Moape wevwile woma wunji wa e atu, mumu o apwile anji. Moape te kanasusamiana mumu hali A-Izalele.

⁴ Moape yamba kuli makulwana a ku Mindiane ngwenyi, Haliapwila mbunga yino kumalia yuma yeswe yinatujingilika, ngwe ngombe malia mwambu. Te Mbalake, mwana wa Zepore, ha mwaka wacho, wapwile mwanangana wa Moape.

⁵ Iye yatuma mikeji kuli Mbalau, mwana wa Mbeore, ku Petore, kwatwama hakamwihi ni Lwiji, ku chifuchi cha atu jenyi, mukumutambika, ngwenyi, Kunatuhuka atu ku Engitu, kumanyi, hashi hatakana no, kanatwama hatalanganyi ni yami.

⁶ Kashika, tweya, ungushingile wano atu; mumu o kananguhiana; hanji munguhasa kwalamba ni kwahuma ku chifuchi; mumu ngunanyingika ngwami, Kuwahisa umwe kuli yena, iye kawaha. Kushinga umwe kuli yena, iye kashingiwa.

⁷ Ni makulwana a Moape ni makulwana a Mindiane yakatuka nikumbata mu moko jo mivi ya kutaha; yaheta kuli Mbalau, yamwambulwila maliji a Mbalake.

⁸ Iye yamba kuli ayo ngwenyi, Twamenu kuno ufuku uno, mba mungunwambulwila nawa chizechene ngwe Yehova mangwamba. Miata a Moape yatwama hamwe ni Mbalau.

⁹ Zambi yaheta kuli Mbalau, yamba ngwenyi, Malunga aze ali hamwe ni yena, aya?

¹⁰ Mbalau yamba kuli Zambi ngwenyi, Mbalake, mwana wa Zepore, mwanangana wa Moape hatuma kuli yami ngwenyi,

¹¹ Hashi heswe hanatakana ni atu aze atuhukile ku Engitu, tweya haliapwila ungushingilo; hanji munguhasa kwasa no jita ni kwahuma.

¹² Zambi yamba kuli Mbalau ngwenyi, Kuchi kuya no. Kuchi kushinga e atu, mumu hanaawahisa.

¹³ Mbalau yahinduka chimenemene mbwi, yamba kuli miata a Mbalake ngwenyi, Yénu ku chifuchi chenu, mumu Yehova kasolo kungutayiza kuya ni yenu.

¹⁴ Miata a Moape yakatuka, yaya kuli Mbalake, yamba ngwo, Mbalau kasolo kwiza ni yetu.

¹⁵ Hindu cheka nawa Mbalake yatuma miata akwo, alemu ahiana.

¹⁶ Yaheta kuli Mbalau, yamba kuli iye ngwo, Chocho anambe Mbalake, mwana wa Zepore, ngwenyi, Mwane, chuma nichimwe kanda chinukwika kwiza kuli yami,

¹⁷ mumu kumungununangamisa ni ulemu wunji, cheswacho munwamba kuli yami kumungulinga; kashika tweyenu, mwane, nungushingile wano atu.

¹⁸ Mbalau yakumbulula kuli ngamba a Mbalake ngwenyi, Chipwe Mbalake mangwaha zuwo lienyi lia tò ni prata ni oru, chichi kazomboka liji lia Yehova Zambi yami, chipwe ha kulinga chikepe, chipwe chinji, ka.

¹⁹ Kashika, mwane, twamenu kuno ufuku uno nawa, hanga ngunyingike chize chikwo Yehova mangwamba.

²⁰ Zambi yaheta kuli Mbalau ha ufuku, yamba kuli iye ngwenyi, Nyi malunga heza mukukusaka, katuka uye no; hindu lie liji yami ngunakwambe, lioliene wika ukalilinge.

²¹ Mbalau yahinduka chimenemene mbwi, yakasa seleyi hali chimbulu. Yaya hamwe ni miata a Moape.

²² Utenu wa Yehova yiukasumuka mumu te iye haya; mungelo wa Yehova wamanyine mu jila akapwe mukwa kole ni kulimika nenyi. Te iye kanende ha chimbulu chenyi, ngamba jenyi aali hamuwika nenyi ali.

²³ Mwe chimbulu yamona mungelo wa Yehova nikumana mu jila, katana kenyi wa kutomona mu kwoko lienyi. Chimbulu yakondoloka ku jila, yanjila mu yambu. Mbalau yalamba chimbulu mukumuchindulwila mu jila.

²⁴ Hohene mungelo wa Yehova wamanyine mu jila yikehe mukachi ka minda ya uva; chipaka ku sali likwo ni chipaka ku sali likwo.

²⁵ Chimbulu yamona mungelo wa Yehova, mba yalishinjika ku chipaka, yapalakenya kulu lia Mbalau ku chipaka. Iye yamulamba nawa.

²⁶ Mungelo wa Yehova yasenya kulutwe, yamana mu jila yikehe muze mwakuhi mwa kutewulukila, chipwe ku chindume, chipwe ku chimeso.

²⁷ Chimbulu yamona mungelo wa Yehova, yautama mushi lia Mbalau. Utenu wa Mbalau wakasumukine, yalamba mwe chimbulu ni mulumbu wenyi.

²⁸ Yehova yapakula kanwa lia chimbulu, mwe chimbulu yamba kuli Mbalau ngwenyi, Yika nakulinga, se wangulamba kano katatu?

²⁹ Mbalau yamba kuli chimbulu ngwenyi, Mumu te yena wangukekuna. Kachi katana wapwa mu kwoko liami, kachi nakushiha.

³⁰ Chimbulu yamba kuli Mbalau ngwenyi, Yami, hi chimbulu che ko nyi? Hali yami hiunende miaka ye yeswe ndo musono. Te napwile nikukulinga chocho kunyima? Iye ngwenyi, Ka.

³¹ Hohene Yehova yalawisa meso a Mbalau, iye yamona mungelo wa Yehova nikumana mu jila, kanakwata katana kenyi wa kutomona mu kwoko lienyi. Yahetamisa mutwe wenyi, yafulamana hashi.

³² Mungelo wa Yehova yamba kuli iye ngwenyi. Kuchi te hiwalamba chimbulu che kaze katatu? Kutala! Yami hinatuhuka mukupwa mukwa kole, mumu jila ye kuyahenga kumeso jami.

³³ Mwe chimbulu kangumona mba kakondoloka kumeso jami kaze katatu. Kachi iye kakondolokele kuli yami kachi chamwenemwene nakushiha haliapwila, kachi namufunga iye ni mwono.

³⁴ Mbalau yamba kuli mungelo wa Yehova ngwenyi, Hinavulumuna; mumu Chanyingikine yena wamana mu jila mukulimika ni yami. Haliapwila, kashika, nyi chinakupihila, munguhiluka kunyima.

³⁵ Mungelo wa Yehova yamba kuli Mbalau ngwenyi, Yako hamwe ni e malunga; alioze lie liji yami mungukwamba, lioliene wika ukahanjike. Chocho Mbalau wayile hamwe ni miata a Mbalake.

³⁶ Muze Mbalake hevwa ngwo, Mbalau heza, yatuhuka mukumupatwiza ndo ku limbo lia Moape, liatwama ku njiza ya Amone, lienalio liatwama ku songo lia njiza.

³⁷ Mbalake yamba kuli Mbalau ngwenyi, Ami chatumine kuli yena nikuliumba, ni kukusanyika nyi? Kuchi te yena kwahetele kuli yami? Te yami Chahashile kukunangamisa ni ulemu nyi?

³⁸ Mbalau yamba kuli Mbalake ngwenyi, Kutala! Hineza kuli yena. Alioze te mungupwa ni tachi ja kuhanjika liji limwe? Lie liji Zambi masa mu kanwa liami lienalio munguhanjika.

³⁹ Mbalau yaya hamwe ni Mbalake, o yaheta ku Kiriate-Huzote.

⁴⁰ Mbalake yalambula yitapo ya ngombe ni mapanga, yatuma kuli Mbalau ni kuli miata aze apwile hamwe nenyi.

⁴¹ Mba ha chimene Mbalake yatwala Mbalau, yamuhetesa ku manangamo a Mbale. Yamonako atu a ku songo.