Kwalula 21 - MUKANDA USANDU WA ZAMBI 1975

¹ Mwanangana wa Arata, Ka-Kanana, wa kutwama ku Negeve wevwile ngwo, Izalele kanejilila ku jila ya Atirama; iye yasa jita ni Izalele, yatwala amwe funge.

² Izalele yalakenya chilakenyo kuli Yehova ngwo, Nyi chamwenemwene mukunjika mu kwoko liami wano atu, mba yami kumungwonwona liakulu membo jo.

³ Yehova yahalakana ku liji lia Izalele. Yakunjika A-Kanana. Yaonwona liakulu ni membo jo nawa. Yaluka chihela acho jina ngwo, Horoma.

⁴ O yaya mu wenyi wo katuke ku mulundu wa Hore, ku jila ya kuya ku Kalunga-lwiji Muchila, akajinge chifuchi cha Endome. E atu te kanazangajala mu jila.

⁵ Atu ahanjikile nikulimika ni Zambi, ni kulimika ni Mose ngwo, Kuchi te nwatuchijile ku Engitu? Kumanyi, tufwile mu puya nyi? Mumu kulia kuchishiko, ni meya akuhi. Mbolo yino yamokomoko, hiyatusekela.

⁶ Yehova yatuma tupela a kahia hakachi ka e atu. O yaasuma. Atu anji a kuli A-Izalele yafwa.

⁷ Atu yaheta kuli Mose, yamba ngwo, Hitwavulumuna, mumu twahanjikanga nikulimika ni Yehova ni kulimika ni yena. Ulembe kuli Yehova, atuchize e tupela. Mose yalembela e atu.

⁸ Yehova yamba kuli Mose ngwenyi, Ulifulile kapela wa kahia umunangike ha mutondo usuku, mba mweswawo masumiwa, muze mamutala, kumakatwama ni mwono.

⁹ Mose yafula kapela wa unengu, yamunangika ha mutondo usuku. Chapwile, nyi kapela wasumine mutu mweswawo, muze atalile kuli kapela wa unengu, yatwama ni mwono.

¹⁰ A-Izalele yaya mu wenyi, yasa chilombo cho mu Obote.

¹¹ A-Izalele yakatuka ku Obote, yasa chilombo cho ku Iye-Aparime mu puya, kwalitalangana ni Moape, kwa kutalikisa ku Chivumbuko cha tangwa.

¹² Katuke koko o yaya mu wenyi, yasa chilombo cho mu chikulo cha Zerede.

¹³ Katuke koko yaya mu wenyi, yasa chilombo cho mu sali lia Amone, mu puya, yenayo ya kuheta ndo ku njiza ya A-Amore; mumu Amone kuyapwa njiza ya Moape, hakachi ka Moape ni A-Amore.

¹⁴ Kashika kanambe mu mukanda wa Jita ya Yehova ngwo, Ku Vahebe mu Sufa, ni mu yikuto ya Amone,

¹⁵ Ni mihwahwa ya yikuto ya kuya ndo kwatwama Are, Yakuheta ndo ku njiza ya Moape.

¹⁶ Katuke koko ayile mu wenyi ndo ku Mbia, shima liolio te shima lize Yehova wambile kuli Mose ngwenyi, Ukungulule atu hamuwika, mungwaaha meya.

¹⁷ Kwenako embile A-Izalele mwaso uno ngwo, Ena shima, vwelwoka! Limbilenu mwaso.

¹⁸ Lie shima liolio ashimine kuli miata, lie lize alifulile kuli yilolo a atu, ni ku lukanda ni ku milumbu yo. Katuke ku puya o yaya mu wenyi ndo ku Matana.

¹⁹ Katuke ku Matana lambie-e ndo ku Nahaliele. Katuke ku Nahaliele lambie-e ndo ku Mbamote.

²⁰ Katuke ku Mbamote ndo ku chikulo chatwama ku chifuchi cha Moape, ndo ku mbulwa Pisiga kwalitalikisa ku mwanda ku puya.

²¹ A-Izalele atumine mikeji kuli Sahone, mwanangana wa A-Amore ngwo,

²² Ngutayizenu kama, ngupalike ku chifuchi chenu. Kutuchi kahambulukila mu minda, hanji mu minda ya uva. Kutuchi kanwa meya a mu mashima. Mutukapalika ha tapalo lia mwanangana, ndo hitwazomboka njiza jenu.

²³ Mwe Sahone katayijile A-Izalele kupalika ku chifuchi chenyi. Alioze Sahone wakungulwile atu jenyi eswe hamuwika, yatuhuka akalimike ni A-Izalele mu puya, yaheta ku Yahaze. Yasa jita ni A-Izalele.

²⁴ A-Izalele yamushiha ni katana. Yatambula chifuchi chenyi katuke ku Amone ndo ku Yapoke, te ndo kuli A-Amone, mumu njiza ya A-Amone yapwile ya tachi.

²⁵ A-Izalele yalwa membo aze eswe. A-Izalele yatwama mu membo eswe a A-Amore, ku Heshebone ni mu yihunda yako yeswe.

²⁶ Mumu Heshebone liapwile limbo lia Sahone, mwanangana wa A-Amore, mwenawo washile jita ni mwanangana mutangu wa Moape, iye yalwa chifuchi chenyi cheswe ku kwoko lienyi, ndo ku Amone.

²⁷ Kashika akwa kuta yishima ngwo, Tweyenu ku Heshebone; lie limbo lia Sahone alitunge, likakole.

²⁸ Mumu kahia katuhuka ku Heshebone, mulengi wa kahia mwimbo lia Sahone; Kalesa Are ya ku Moape, ni miata a ku manangamo a ku Amone.

²⁹ Lamba lie, ena Moape! Enu akwa Chemoshe, mala kunwatoka! Hahana ana jenyi a malunga waze achinyine, ni ana jenyi a mapwo akapwe funge, kuli Sahone, mwanangana wa A-Amore.

³⁰ Twaasa. A-Heshebone hakuwa ku Ndibone. Twapupa ndo ku Nofa, kuze kwatwala ku Medeba.

³¹ Chocho A-Izalele atwamine mu chifuchi cha A-Amore.

³² Mose yatuma atu akasembule chifuchi cha Yazere. O yalwa yihunda yacho. Yahuma A-Amore apwileko.

³³ O yatewuluka ni kukandukila ku jila ya ku Mbashane. Oge, mwanangana wa Mbashane, watuhukile nikulimika no, neye ni atu jenyi eswe, mukwasa no jita ku Endreya.

³⁴ Yehova yamba kuli Mose ngwenyi, Kanda umuvwila woma, mumu hinamukunjika mu kwoko lie, ni atu jenyi eswe, ni chifuchi chenyi. Yena ulinge kuli iye chizechene ngwe walingile kuli Sahone, mwanangana wa A-Amore, yoze Watwamine ku Heshebone.

³⁵ Chocho o yamushiha, ni ana jenyi a malunga, ni atu jenyi eswe; kukwasalile kuli iye niumwe. O yatambula chifuchi chenyi.