Kwalula 20 - MUKANDA USANDU WA ZAMBI 1975

¹ Chikungulwila cheswe cha A-Izalele ahetele ku puya ya Zini ha kakweji mutangu. E atu yatwama ku Kandeshe. Kokwene afwilile Miriame. Yamufundako.

² Kukwapwile meya niamwe ha chikungulwila, mba o yalikungulula nikulimika ni Mose ni Arone.

³ E atu yalitachika ni Mose, yamba ngwo, Mala, kachi twafwile muze afwile akwetu kumeso ja Yehova!

⁴ Kuchi te yenu hinwahetesa chikungulwila cha Yehova ku puya yino? Kumanyi, hanga tufwileko nyi, ni yetu ni yimuna jetu?

⁵ Yika te nwatuchijile ku Engitu? Kumanyi, mukutuhetesa kuma kuno kupi nyi? Ku kuno hi kwa mbuto ko, hanji kwa makuyu, hanji kwa mitondo ya uva, hanji kwa romana, ka. Chipwe meya a kunwa keshiko.

⁶ Mose ni Arone yakatuka kumeso ja chikungulwila, yaya ku chikolo cha mbalaka ya chikungulwila, yafulamana hashi. Ulemu wa Yehova wasolokele kuli ayo.

⁷ Yehova yamba kuli Mose ngwenyi,

⁸ Anda mulumbu, ukungulule chikungulwila, ni yena ni yayenu Arone. Hanjika ku liwe lili kumeso jo, hanga lituhwise meya. Watuhwishile meya a mu liwe; chocho muhana meya ku chikungulwila ni ku yimuna jo.

⁹ Mose yanda mulumbu kumeso ja Yehova, chizechene ngwe amwambile.

¹⁰ Mose ni Arone yakungulula chikungulwila kulutwe lia lie liwe, yamba kuli ayo ngwenyi, Enu akwa kukolema, panjikenu haliapwila. Kumanyi, tunutuhwishile meya a mu liwe lino nyi?

¹¹ Mose yazundula kwoko lienyi, yalamba liwe kaali ni mulumbu wenyi. Haze hene meya alusukile. Chikungulwila yanwa ni yimuna jo nawa.

¹² Yehova yamba kuli Mose ni Arone ngwenyi, Mumu te kunwafulielele yami, mukungusela ku usandu kumeso ja A-Izalele, kashika kunuchi kahetesa chino chikungulwila ku chifuchi hingunaahecho.

¹³ Meya ano, meya a Meripa, mumu te A-Izalele alitachikile ni Yehova. Iye yalisolola musandu hakachi ko.

¹⁴ Mose yatuma mikeji ku Kandeshe kuli mwanangana wa Endome ngwenyi, Chocho anambe mwanakwenu Izalele ngwenyi, Yena unanyingika lamba lize liatuwanyine yetu;

¹⁵ ngwe tulamba twetu apalumukine ku Engitu, yetu twatwamine ku Engitu miaka yinji. A-Engitu yatulinga chipi ni yetu ni tulamba twetu nawa.

¹⁶ Muze twatetele kuli Yehova, iye yevwa liji lietu, yatuma mungelo, yatuchiza ku Engitu; kumanyi ku Kandeshe tuli, ku limbo liatwama ku songo lia njiza je.

¹⁷ Mwane, tutayizenu kama, tupalikile ku chifuchi chenu. Kutuchi kapalika mu minda, hanji mu minda ya uva, hanji kunwina ku meya ali mu mashima, kutuchi kaanwa. Kumutukakaula tapalo lia mwanangana. Kutuchi kahambuluka ku chindume, chipwe ku chimeso, ndo hitwazomboka njiza jenu.

¹⁸ Endome yamba kuli iye ngwenyi, Kanda upalika kuli yami kuchina mungutuhuka nikulimika ni yena ni katana.

¹⁹ A-Izalele yamba kuli iye ngwo, Mutukakandukila ku tapalo; nyi mutukanwa a ku meya jenu, ni yami ni yimuna jami, mba kumungukanwaha ndando yo; ngutayizenu kama, ngupalike hashi, chenacho wika.

²⁰ Iye yamba ngwenyi, Kanda upalika. Endome watuhukile ni atu anji hanga akalimike nenyi ni kwoko lia tachi.

²¹ Chocho Endome katayijile Izalele apalike ku chifuchi chenyi. Kashika Izalele yakondoloka kuli iye.

²² O yakatuka ku Kandeshe. A-Izalele, te chikungulwila cheswe, yaheta ku mulundu wa Hore.

²³ Ku mulundu wa Hore, ku sesa lia njiza ja Endome, Yehova yamba kuli Mose ni Arone ngwenyi,

²⁴ Kumatwala Arone kuli atu jenyi; mumu iye kechi kanjila mu chifuchi nahanyine kuli A-Izalele, se nwakolemene liji liami ku meya a Meripa.

²⁵ Utwale Arone ni mwanenyi wa lunga Eleazare, wakandwise mulundu wa Hore.

²⁶ Uzule Arone mazalo jenyi, mwanenyi wa lunga Eleazare umujiko iye. Himatwala Arone kuli atu jenyi. Iye kumafwilako.

²⁷ Mose yalinga ngwe Yehova amwambile. O yakanduka mulundu wa Hore kumeso ja chikungulwila cheswe.

²⁸ Mose yazula Arone mazalo jenyi, mba yaajika kuli mwanenyi wa lunga Eleazare. Arone yafwila ha mbulwa mulundu. Mose ni Eleazare yapalumuka ku mulundu.

²⁹ Muze chikungulwila cheswe amwene ngwo, Arone hafwa, yalila Arone makumi atatu a matangwa, te vungu lieswe lia Izalele.